Mu mwezi wa July 2022, vyaru vinandi pa charu chose vikapeleka lipoti lakuti kwamba kotcha chomene kuluska kumasinda kose uku:

•    “Charu cha China chapeleka lipoti lakuti misumba pafupifupi 70 yasangana na suzgo lakotcha chomene mwezi uwu kuluska kumasinda kose uku.”—July 25, 2022, CNN Wire Service.

•    “Moto uwo ukwamba wekha mu thengere ku Europe wasuzga chomene chifukwa cha kotcha mwakujumphizga uko kukuya munthazi.”—July 17, 2022, The Guardian.

•    “Pa Sabata, mu misumba yinandi ku United States mukawotcha mwakujumphizga ndipo suzgo ili likakhwaskaso nanga ni vigaŵa vyose vya mumphepete mwa nyanja cha kumafumiro gha dazi kweniso vigaŵa vya kumwera na cha kumanjiliro gha dazi.”—July 24, 2022, The New York Times.

 Kasi ivi vikung’anamurachi? Kasi charu chifikenge pakuti taŵanthu titondekenge na kukhalamo? Kasi Baibolo likutipo wuli?

 Enya. Kotcha chomene kwa charu chose kukufiska vinthu ivyo Baibolo likayowoyerathu kuti vizamuchitika mu nyengo yithu yino. Mwachiyelezgero, Yesu wakachima kuti tizamuwona vinthu “vyakofya,” panji kuti “vyachilendo na vyakutenthemeska.” (Luka 21:11; Good News Translation) Kotcha chomene kwa charu kukupangiska kuti ŵanthu ŵanandi ŵambe kufipa mtima kuti ŵanthu ŵanangirengethu charu chapasi.

 Yayi. Chiuta wakalenga charu chapasi kuti chiŵe chikaya cha ŵanthu muyirayira. (Salimo 115:16; Mupharazgi 1:4) M’malo mwa kuzomerezga kuti ŵanthu ŵachinangirethu, Chiuta wakulayizga kuti wazamuparanya “awo ŵakunanga charu chapasi.—Chivumbuzi 11:18.

 Wonani mauchimi ghaŵiri agho ghakulongora ivyo Chiuta wachitenge:

•    “Mapopa na charu chambura maji vizamusekelera, chipalamba chizamukondwa na kuzota nga ni luŵa la safuroni.” (Yesaya 35:1) Chiuta wazomerezgenge yayi kuti charu chizgoke chipalamba chakuti ŵanthu ŵatondeke na kukhalamo, kweni wazamunozga vyose ivyo vyanangika.

•    “Mukupwelelera charu chapasi, mwachipa vipasi vyakuzara na usambazi unandi.” (Salimo 65:9) Yehova wazamutumbika charu chapasi ndipo chizamuzgoka paradiso.

 Kuti mumanye vinandi pa nkhani ya umo kusintha kwa nyengo kukufiskira uchimi wa mu Baibolo, ŵerengani nkhani yakuti, “Ivyo Baibolo Likuyowoya pa Nkhani ya Kusintha Kwa Nyengo na Ivyo Vikwiza Kunthazi.”

 Kuti mumanye vinandi vyakukhwaskana na ivyo Baibolo likulayizga pa nkhani yakunozga charu kuti chiŵe chiwemi, ŵerengani nkhani yakuti, “Ninjani Waponoskenge Charu Ichi?”