Kasi Chisopa Chikwenera Kunjilirapo pa Ndyali?
Pa charu chose chapasi, ŵanthu ŵanandi awo ŵakuti ŵakulondezga Yesu Khristu ŵakunjilirapo pa vya ndyali. Ŵanyake ŵakukhozgera vigomezgo vya chisopa chawo kweniso ivyo ŵakuchita mwa kuŵikira kumanyuma ŵanthu ŵanyake ŵandyali panji vipani. Ivi vikupangiska kuti ŵandyali ŵagwiliskirenge ntchito fundo zakukhwaskana na umo vinthu viliri mu chigaŵa chawo kuti ŵakope ŵanthu mu visopa vyakupambanapambana. Nakuti ntchakuzizika yayi kuwona ŵalongozgi ŵa visopa ŵakuŵikapo mtima kuti ŵanthu ŵaŵavotere na chilato chakuti ŵaŵe na udindo mu chipani. Ndipo mu vyaru vinyake, chisopa “Chachikhristu” chingaŵa na udindo wapadera wakuŵa chisopa cha boma.
Kasi mukuwona wuli? Kasi ŵalondezgi ŵa Yesu ŵakwenera kunjilirapo pa vya ndyali? Zgoro mungalisanga para mungawona chiyelezgero cha Yesu. Iyo wakati: “Namupani chakuwonerapo, kuti nga umo nachitira kwa imwe, namwe ndimo muchitirenge.” (Yohane 13:15) Pakuyowoya vyakukhwaskana na ndyali, kasi Yesu wakatipa chakuwonerapo wuli?
Kasi Yesu wakanjilirangapo pa ndyali?
Yayi. Yesu wakanjilirangapo yayi pa ndyali izo zikachitikanga mu charu.
Yesu wakajipenjeranga udindo mu ndyali yayi. Iyo wakakana kupokera mazaza ghakuti waŵe muwusi wa maboma gha ŵanthu apo Satana Dyabulosi wakati wamupenge “maufumu ghose gha pa charu.” (Mateyu 4:8-10) a Ulendo unyake, ŵanthu awo ŵakawona kuti Yesu wali na mikhaliro yiwemi kuti waŵe mulongozgi wawo, ŵakayezga kumuchichizga kuti wanjizgikemo mu ndyali. Kweni Baibolo likuti: “Yesu wakati wamanya kuti ŵanthu ŵali pafupi kwiza kuti ŵamukore na kumuzgora themba, wakafumapo wakalutaso ku phiri yekha na yekha.” (Yohane 6:15) Yesu wakachita waka ivyo ŵanthu ŵakakhumbanga yayi. M’malo mwake, iyo wakakana kunjizgikamo mu ndyali.
Yesu wakakhozgeranga chigaŵa chilichose yayi pa ndyali. Mwachiyelezgero, mu nyengo ya Yesu Ŵayuda ŵakakondwanga yayi kupeleka msonkho ku boma la Ŵaroma ndipo ŵakawonanga kuti ni mphingo kuchita nthena. Apo ŵakakhumbanga kumuyezga Yesu kuti wakhozgere chigaŵa chimoza pa nkhani iyi, Yesu wakagazganapo nawo yayi nesi kuyowoya usange kuchita nthena mburunji panji yayi. Iyo wakaŵaphalira kuti: “Pelekani vinthu vya Kesare kwa Kesare, ndipo vya Chiuta kwa Chiuta.” (Mariko 12:13-17) Iyo wakanjilirapo yayi pa nkhani iyi, kweni wakalongora waka kuti misonkho iyo ŵamazaza ŵa Ŵaroma ŵakakhumbanga, ndipo yikimiranga Kesare, yikwenera kupelekeka. Pa nyengo yimozamoza, wakalongoraso kuti kupulikira ŵamazaza ŵa boma kuli na mphaka. Munthu wakeneranga yayi kupeleka ku Boma vinthu ivyo vikeneranga kupelekeka kwa Chiuta pera, nga nkhujipeleka na mtima wose na kusopa.—Mateyu 4:10; 22:37, 38.
Yesu wakakhozgeranga na kusambizga ŵanthu vya boma lakuchanya, Ufumu wa Chiuta. (Luka 4:43) Iyo wakanjizgikangamo yayi mu ndyali chifukwa wakamanyanga kuti ni Ufumu wa Chiuta pera ndiwo uzamufiska khumbo la Chiuta pano pa charu, maboma gha ŵanthu yayi. (Mateyu 6:10) Iyo wakamanyangaso makora kuti Ufumu wa Chiuta uzamugwiliskira ntchito maboma gha ŵanthu yayi, kweni uzamunjira m’malo ghawo.—Daniyeli 2:44.
Kasi Ŵakhristu ŵakwambilira ŵakanjilirangapo pa ndyali?
Yayi. Ŵalondezgi ŵa Yesu ŵakapulikiranga dango ilo ŵakapika lakuti ŵaleke kuŵa “chigaŵa cha charu.” (Yohane 15:19) Iwo ŵakalondezga chiyelezgero cha Yesu ndipo ŵakanjilirangapo yayi pa ndyali. (Yohane 17:16; 18:36) M’malo mwa kunjilirapo pa ndyali, iwo ŵakatangwanikanga na ntchito iyo Yesu wakaŵatuma, kupharazga na kusambizga vya Ufumu wa Chiuta.—Mateyu 28:18-20; Milimo 10:42.
Ŵakhristu ŵakwambilira ŵakawonanga kuti chakuzirwa chomene nkhupulikira Chiuta, ndipo ŵakamanyangaso kuti ŵakwenera kuchindika ŵamazaza. (Milimo 5:29; 1 Petrosi 2:13, 17) Iwo ŵakapulikiranga malango na kupeleka misonkho. (Ŵaroma 13:1, 7) Nangauli ŵakanjilirangapo yayi pa ndyali, kweni ŵakavikilirikanga na malango gha boma kweniso kusanga chandulo na vinyake ivyo boma likachitanga.—Milimo 25:10, 11; Ŵafilipi 1:7.
Mazuŵa ghano napo Ŵakhristu ŵakunjilirapo yayi pa vya ndyali
Baibolo likulongora pakweru kuti Yesu na ŵalondezgi ŵake ŵakanjilirangapo yayi pa ndyali. Pa chifukwa ichi, pakuŵa Ŵakhristu, Ŵakaboni ŵa Yehova pa charu chose chapasi, ŵakunjilirapo yayi pa ndyali. Nga umo ŵakachitiranga Ŵakhristu ŵakwambilira, nawo ŵakuchita ntchito iyo Yesu wakaŵatuma—ŵakupharazga “makani ghawemi agha gha Ufumu.”—Mateyu 24:14.
a Apo Yesu wakakananga, wakasuska yayi fundo yakuti Satana wali na mazaza ghakumupa vinthu ivi. Nakuti pamanyuma wakazakayowoya kuti Satana ni “fumu ya charu.”—Yohane 14:30
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Chifukwa Wuli Ŵakaboni ŵa Yehova Ŵakuchitako Yayi Ndyali?
Kasi boma likwenera kopa Ŵakaboni ŵa Yehova?
MUŴENGE MASO!
Chisopa na Nkhondo ku Ukraine—Kasi Baibolo Likutipo Wuli?
Ŵalongozgi ŵa visopa ku vigaŵa vyose viŵiri ŵakuchita vinthu vyakupambana chomene na ivyo Yesu wakasambizga ŵalondezgi kuti ŵakwenera kuchita kweniso ivyo ŵakwenera kuleka kuchita.
VISAMBIZGO VYAKUZIRWA VYA MU BAIBOLO
Kasi Ufumu wa Chiuta Ni Vichi?
Pa uteŵeti wake wa pa charu chapasi, Yesu wakapharazga chomene vya Ufumu wa Chiuta. Kwa vyaka vinandi, ŵalondezgi ŵake ŵalutilira kulomba kuti Ufumu uwu wize.
GONGWE LA MULINDA
Kasi Ufumu wa Chiuta Uzamufiska Vichi?
Yesu wakamanyanga kuti ni Ufumu wa Chiuta pera uwo ungamazga masuzgo pa charu chapasi. Kasi ni vichi ivyo Ufumu wa Chiuta uli kuchita kale ndipo ni vichi ivyo ufiskenge?
