Pa charu chose chapasi, ŵanthu ŵanyake ŵakugega kurya nyama panji kuti chinthu chilichose chandopa.

•   “Ŵanthu awo ŵakuleka kurya nyama ŵakuchita ivi na chilato chakuti ŵavikilire vinyama ku nkhaza za mtundu wakupambanapambana, nga nkhukoma nyama na chilato chakuti ŵasange chakurya, vyakuvwara panji kusangako vinthu vinyake.”—The Vegan Society.”

 Nangauli ŵakufipira mtima vinyama, kweni ŵanji ŵali kusankha kuleka kurya nyama chifukwa ŵakukhumba kupwelelera chilengiwa, umoyo wawo, panji ŵali kuleka pa vifukwa vya chisopa.

•   “Mwakupambana na ŵanji awo ŵakusankha kuleka kurya vyakurya vinyake, awo ŵakuleka kurya nyama ŵakuchita ivi chifukwa cha ivyo ŵakugomezga, kweniso ŵakuwona kuti ndicho ntchinthu chakwenelera kuchita kuti vinthu viŵe makora pa charu.”—Britannica Academic.

 Kasi kuleka kurya nyama ndiyo ni nthowa yiwemi yakuti ŵanthu ŵaŵe na umoyo uwemi pa charu? Kasi Baibolo likuti wuli?

 Baibolo likulongora kuti Mlengi withu, Yehova Chiuta, a wakuwona kuti ŵanthu mbakuzirwa chomene pakuyaniska na vinyama kweniso wali kuŵapa mazaza ŵanthu pa vinyama. (Genizesi 1:27, 28) Pamanyuma, Chiuta wakazomerezga ŵanthu kuti ŵambe kurya nyama. (Genizesi 9:3) Ndipouli Chiuta wakukhumba yayi kuti ŵanthu ŵachitirenge nkhaza vinyama.​—Zintharika 12:10.

 Kuyana na ivyo Baibolo likuyowoya, kurya nyama panji kuleka kurya ntchisankho cha munthu waliyose payekha. b Tingaŵa ŵawemi pamaso pa Chiuta chifukwa cha kurya nyama panji kuleka kurya yayi. (1 Ŵakorinte 8:8) Ntheura munthu waleke kususka munyake pa nkhani ya icho wakukhumba kurya, kwali ni nyama panji yayi.—Ŵaroma 14:3.

 Baibolo likuyowoya kuti ivyo tikusankha pa moyo withu vingamazga yayi masuzgo mu charu. Masuzgo ghanandi ghakuchitika chifukwa cha ndyali, kusankhana mitundu, kweniso kuleka kwenda makora kwa vyachuma mu charu. Ndipo masuzgo agha munthu wangaghamazga yayi. Baibolo likuti:

•   “Chinthu icho ntchakubendera chinganyoloskeka chara.”​—Mupharazgi 1:15.

 Mlengi withu wazamumazga masuzgo ghose agho tikusangana nagho. Baibolo likugwiliskira ntchito mazgu ghakuyelezgera pa ivyo Chiuta wachitenge.

•   “Nkhawona kuchanya kuphya na charu chapasi chiphya, pakuti kuchanya kwakale na charu chapasi chakale vikafumapo, ndipo nyanja kulijeso.”​—Chivumbuzi 21:1.

 Chiuta wazamuwuskapo maboma gha ŵanthu, panji kuti “kuchanya kwakale,” na kuwezgerapo “kuchanya kuphya,” ilo ni boma lake lakuchanya. Ufumu wake uzamuwuskapo “charu chapasi chakale,” panji kuti ŵanthu awo ŵakuchita viheni, ndipo uzamuwusa “charu chapasi chiphya,” panji kuti awo ŵakupulikira na mtima wose.

 Ni mu Ufumu wa Chiuta pera umo ŵanthu ŵazamusambira kukhala makora na vinyama kweniso chilengiwa chose.​—Yesaya 11:6-9.