Mu 2022, ndalama izo vyaru vikasakaza pa nkhani ya vyankhondo zikakwana madola ya ku America 2.24 tiliriyoni. Vyaru vikasakaza ndalama izi chifukwa cha nkhondo iyo yikuchitika ku Ukraine. Mwakuyana na lipoti la mu April 2023 ilo wupu wa Stockholm International Peace Research Institute (SIPRI) likafumiska, mu chaka cha 2022:

•   Ndalama izo vyaru vya ku Europe vikasakaza “zikasazgikira na ma peresenti 13 mu chaka ichi. Uku nkhusazgikira kukuru chomene kwa ndalama izo vyaru ivi vyasakaza pa vyankhondo kufuma mu 1991.”

•   “Charu cha Russia chasazgirako ndalama izo chikusakaza pa vyankhondo na ma peresenti 9.2, ndipo pasono ni charu chachitatu icho chikusakaza chomene ndalama pa charu chose. Kumanyuma uku chikaŵa pa nambara 5.”

•   Charu cha United States ndicho chili pakwamba kusakaza “chomene ndalama pa nkhani ya vyankhondo na ma peresenti 39.”

 Dr. Nan Tian, uyo nayo njumoza wa mu wupu wa SIPRI wakayowoya kuti: “Ndalama izo zikulutilira kusakazika pa nkhani ya vyankhondo ntchilongolero chakuti tikukhala mu charu icho ntchambura kuvikilirika.”

 Baibolo likayowoyerathu kuti maboma gha ŵanthu agho ghali na nkhongono pa charu chose ghalutilirenge kulimbana kweniso likutiphalira icho chingiziska mtende pa charu chapasi.

•   Baibolo likuti pasono tikukhala mu ‘nyengo yaumaliro.’—Daniyeli 8:19.

•   Buku la Daniyeli likayowoyerathu kuti mu nyengo iyi, maboma ghankhongono ghazamulimbanirananga mazaza. Likati maboma ghankhongono agha ‘ghazamututuzgananga’ panji kuti kulimbirana mazaza. Pakulimbana uku ŵakusakaza “usambazi,” panji kuti ndalama zinandi.—Daniyeli 11:40, 42, 43.

 Kuti mumanye vinandi pa ivyo Baibolo likayowoyerathu pa nkhani iyi, wonelerani vidiyo ya mutu wakuti, Uchimi Wafiskika—Daniyeli Chaputara 11.

•   Baibolo likuti Chiuta wazamuwuskapo maboma gha ŵanthu. Iyo “wazamwimika ufumu uwo kuti uzamuparanyika chara. Ufumu uwu uzamupelekeka ku ŵanthu ŵanyake chara. Uzamuteketa na kumazga maufumu ghose agha, ndipo iwo wekha ndiwo uzamuŵako kwamuyirayira.”—Daniyeli 2:44.

•   Sonosono apa Yehova a Chiuta wachitenge vinthu ivyo ŵanthu ŵangakwaniska yayi. Iyo wakhazikiskenge mtende wambura kumara pa charu chapasi. Kasi wachitenge wuli? Ufumu wake wakuchanya uphyelengepo vilwero vyose vya nkhondo na kumazga nkhondo zose.—Salimo 46:8, 9.

 Kuti mumanye vinandi ivyo Ufumu wa Chiuta uzamuchita, ŵazgani nkhani ya mutu wakuti “Mu Ufumu wa Chiuta Muzamuŵa ‘Mtende Wakuzara.’”