Lipoti lakufuma ku United Nations:

•   Kufuma pa 7 October m’paka pa 23 October, 2023, nkhondo ya pakati pa Gaza na Israel yakomeska ŵanthu ŵakujumpha 6,400 ndipo ŵanyake 15,200 ŵali kupwetekeka chomene. Ŵanandi mwaŵanthu aŵa mbanthu waka kuti mbasilikari yayi. Mwakusazgirapo, ŵanthu ŵanyake ŵanandi ŵali kuleka vikaya vyawo na kuchimbira.

•   Kufika pa 24 September, 2023; nkhondo yapakati pa Russia na Ukraine yakoma ŵanthu ŵakukwana 9,701 awo mbasilikari yayi ndipo ŵanyakhe 17,748 ŵali kupwetekeka chomene ku Ukraine.

 Kasi Baibolo likupeleka chigomezgo wuli kwa awo ŵakusuzgika chifukwa cha nkhondo?

 Baibolo likayowoyerathu kuti Chiuta wazamulekeska “nkhondo pa charu chose chapasi.” (Salimo 46:9) Iyo wazamugwiliskira ntchito boma lakuchanya panji kuti ufumu wakuchanya uwo uzamunjira m’malo mwa maboma ghose gha ŵanthu. (Daniyeli 2:44) Ufumu wa Chiuta uwu ndiwo uzamuponoska ŵanthu.

 Wonani ivyo Yesu uyo ni Themba la Ufumu wa Chiuta wazamuchita:

•   “Wazamuthaska mukavu uyo wakulilira wovwiri, wakuyuyuka na yose uyo walije movwiri. Wazamuchitira chitima wakuyuyuka na mukavu, ndipo wazamuponoska umoyo wa ŵakavu. Wazamuŵathaska ku kuyuzga na nkhaza.”—Salimo 72:12-14.

 Kwizira mu Ufumu wake, Chiuta wazamumazga masuzgo ghose agho ghakuchitika chifukwa cha nkhondo na viwawa.

•   “Wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya. Vinthu vyakale vyafumapo.”—Chivumbuzi 21:4.

 Sonosono apa Ufumu wa Chiuta umazgenge viheni vyose ivyo vikuchitika pa charu. Baibolo likayowoyerathu za ‘nkhondo na malumbiri gha zinkhondo’ ivyo tikuwona pasono. (Mateyu 24:6) Nkhondo na vinyake ivyo vikuchitika vikulongora kuti tili mu “mazuŵa ghaumaliro” gha maboma gha ŵanthu.—2 Timote 3:1.