Kasi Baibolo Likuti Wuli pa Nkhani ya Kusoŵa kwa Maji pa Charu Chose?

JULANI

Tose tikukhumbikwira maji yawemi kuti tiŵe na umoyo. Mulembi Mulara wa UN António Guterres wakayowoya kuti: “Pakuti ŵanthu ŵanandi pa charu chose ŵakukhumbikwira maji, kweni pasono pali suzgo likuru kuti maji ghawemi ghasangike.” Ŵanthu ŵanandi pa charu chapasi wakusuzgika kuti ŵasange maji ghawemi.

Strdel/AFP via Getty Images

Kasi taŵanthu tose pa charu chapasi tizamuŵapo na maji ghakukwana? Panji nyengo zose tilutilirenge waka kulimbana na suzgo la maji ili? Kasi Baibolo likuti wuli?

Ivyo Baibolo likulayizga pa nkhani ya maji

Baibolo likuti zuŵa linyake kuzamuŵavya suzgo la kusoŵa kwa maji. M’malo mwake kuzamuŵa maji ghanandi kweniso ghawemi.

Baibolo likuti: “Pakuti maji ghazamubwibwituka mu mapopa na tumilonga twa maji mu chipalamba. Charu chambura maji chizamuŵa visapa vya maji, charu chakomira gwaa chizamuŵa mbwiwi za maji.”—Yesaya 35:6, 7.

Chifukwa wuli tikwenera kugomezga ivyo Baibolo lili kulayizga? Wonani ivyo Baibolo likuyowoya vyakukhwaskana na umo charu chapasi chili kulengekera.

Ivyo Baibolo likuyowoya vyakukhwaskana na charu kweniso umo maji ghakwendera

Baibolo likuti: “[Chiuta] wakachilenga waka yayi, [charu chapasi] kweni wakachipanga kuti ŵanthu ŵakhalengemo.—Yesaya 45:18.

Pakuti Chiuta wakalenga charu kuti mukhalenge vyamoyo, wali kuŵikaso m’malo mwake vyose vyakukhumbikwa kuti vipelekenge maji ghanandi ghawemi.

Baibolo likuti: [Chiuta] “Wakukwezga manthonyezi gha maji; ghakusongonoka kuzgoka vula kufuma pa nyakhuŵinda wake. Ndipo mabingu ghakupungulira pasi, ghakulokwera pa ŵanthu.”—Yobu 36:27, 28.

Munthowa yipusu lemba ili likulongosora za nthowa iyo Chiuta wali kupanga kuti nyengo zose maji ghalutilirenge kuŵapo. Nthowa iyi yikupangiska maji gha pano pasi na gha mu nyanja kuti ghakwere kuchanya na kukapanga vula, iyo yikupeleka maji ghawemi ku ŵanthu kweniso vinyama.—Mupharazgi 1:7; Amosi 5:8.

Baibolo likuti: “Namumulokweskerani vula pa nyengo yake. Charu chamupambika vyakurya vyake ndipo makuni ghamuthondo ghamupambika vipasi vyake.”—Levitiko 26:4.

Kale Chiuta wakalayizga Ŵaisrayeli kuti waŵatumbikenge mwakuŵapasa maji kuti ŵaŵe na vuna yinandi. Iyo wakumanya kuti ŵanthu ŵakukhumbikwira vula yakukwana kuti ŵasange chakurya.

Ivyo Chiuta wakachita kwa Ŵaisrayeli ndivyo wachitengeso sonosono apa pa charu chapasi. (Yesaya 30:23) Pasono mu vyaru vinandi suzgo la kusoŵa kwa maji likukulirakulira ndipo kusoŵa kwa vula ndiko kukupangiska suzgo ili. Kasi ntchivichi chinyake icho Baibolo likuyowoya pa nkhani ya umo Chiuta wazamumazgira suzgo la kusoŵa kwa maji?

Umo suzgo la kusoŵa kwa maji lizamumalira

Baibolo likuti Chiuta, kwizira mu Ufumu wake wazamuwuskapo masuzgo agho ghali pa charu, kusazgapo suzgo la kusoŵa kwa maji mazuŵa ghano. (Mateyu 6:9, 10) Ufumu wa Chiuta ni boma ilo lili kuchanya ilo lizamulamulira pa charu chapasi. (Daniyeli 2:44; Chivumbuzi 11:15) Nakuti Ufumu uwu uzamuchita vinthu ivyo maboma gha ŵanthu ghangakwaniska yayi kuchita ndipo uzamumazga ivyo vikupangiska kuti paŵe suzgo la maji.

Suzgo: Kusintha kwa nyengo kwapangiskaso kuti paŵe suzgo pa nkhani ya maji ndipo ivi vikupangiska kuti mu vigaŵa vinyake muŵe vilangalanga kweniso kututuka kwa maji chifukwa cha vula yankhongono.

Nthowa yakumazgira: Ufumu wa Chiuta uzamunozgaso vyose ivyo vyanangika mwakuti vinthu vizamuŵaso makora pa charu chapasi. Chiuta wali kulayizga kuti: “Wonani! Nkhupanga vinthu vyose kuŵa viphya.” (Chivumbuzi 21:5) Mu malo ghose ghakomira muzamuŵa maji ghanandi ndipo muzamukhala vyamoyo. (Yesaya 41:17-20) Ufumu wa Chiuta kwizira mwa Yesu Khristu uzamuŵa na nkhongono kuti masoka ghachilengiwa ghaleke kuchitika.

Apo Yesu wakaŵa pa charu chapasi, wakalekeska chimphepo chankhongono, ndipo ivyo wakachita apa chikaŵa chakuwonerapo cha nkhongono izo Chiuta wakamupa. (Mariko 4:39, 41) Mu Ufumu wa Chiuta apo Yesu Khristu wazamulamulira kuzamuŵavya masoka ya chilengiwa. Ŵanthu ŵazamukondwa na mtende wanadi kweniso ŵazamuŵa ŵakuvikilirika ndipo ŵazamuwopa soka lililose yayi.

Suzgo: Ŵanthu kweniso makampani ŵakunanga milonga, nyanja, kweniso vinthu ivyo vikovwira kuti maji ghasungike pasi pa charu, ntheura ivi vyapangiska kuti maji ghawemi ghasoŵe pa charu.

Nthowa yakumazgira: Chiuta wazamutozga charu kusazgapo milonga, nyanja, na dongo. Charu chapasi chizamuŵa paradiso. Lekani Baibolo likuti : “Mapopa na charu chambura maji vizamusekelera, chipalamba chizamukondwa na kuzota nga ni luŵa la safuroni.”—Yesaya 35:1.

Kasi ntchivichi chizamuchitikira wose awo ŵakunanga chilengiwa na kutondeka kughanaghanira ŵanyawo? Chiuta wali kulayizga kuti wazamuparanya wose “awo ŵakunanga charu chapasi.”—Chivumbuzi 11:18; Zintharika 2:21, 22.

Suzgo: Ŵanthu wakunanga luŵiro chomene maji mwakuti maji ghawemi ghakusakazika luŵiro kuluska agho charu chingapeleka.

Nthowa yakumazgira: Ufumu wa Chiuta uzamuchitiska kuti khumbo lake “lichitike pano pasi” m’malo mwa khumbo la ŵanthu ŵaryezi. (Mateyu 6:9, 10) Ufumu wa Chiuta uzamupeleka masambiro ghapachanya chomene ku ŵanthu ŵake. Lemba la Yesaya 11:9 likuti: “Charu chapasi chizamuzura na kumanya Yehova. a” Ŵanthu ŵazamupwelelera makora chomene charu chapasi kweniso vinthu ivyo vilimo chifukwa ŵazamuzura na vinjeru vya Chiuta, kumutemwa kweniso kutemwa ivyo wali kulenga.

Kuti mumanye vinandi ivyo Ufumu wa Chiuta uzamuchita, wonani nkhani ya mutu wakuti, “Kasi Ufumu wa Chiuta Uzamufiska Vichi?”
Wonani mu Baibolo mu buku la Yesaya chaputara 35 kuti muwone umo charu chapasi chizamuzgokera paradiso.
Kuti mumanye vinandi pa chifukwa icho Chiuta wali kulengera charu chapasi na ŵanthu, wonelerani vidiyo ya mutu wakuti, Chifukwa wuli Chiuta Wakalenga Charu?