Kasi Uchigeŵenga Uzamumara?
Pamanyuma pakuti vigeŵenga vyakuwukira, nyengo zinyake ungajifumba kuti: ‘Kasi Chiuta wakunipwelelera? Chifukwa wuli vinthu vyanthena ivi vikuchitika? Kasi uchigeŵenga a uzamumara? Kasi nifiskenge kukhala mwawofi nthena?’ Baibolo likupeleka mazgoro ghakukhorweska gha mafumbo agha.
Kasi Chiuta wakujipulika wuli na uchigeŵenga?
Chiuta wakutinkha nkhaza na uchigeŵenga. (Salimo 11:5; Zintharika 6:16, 17) Kweniso Yesu, mwimiliri wa Chiuta, nyengo yinyake wakasuska ŵasambiri ŵake ŵati ŵachita vinthu mwankhaza. (Mateyu 26:50-52) Nangauli ŵanthu ŵanyake ŵakuchita nkhaza mu zina la Chiuta, iyo wakuŵazomerezga yayi kuti ŵachitenge vinthu viheni ivi. Unenesko ngwakuti, iyo wakupulika na kupulika wuwo yayi malurombo ghawo.—Yesaya 1:15.
Chiuta wakuŵapwelelera ŵanthu wose awo ŵakusuzgika, kusazgapo awo ŵakhwaskika na vigeŵenga. (Salimo 31:7; 1 Petrosi 5:7) Baibolo likulongora kuti Chiuta wazamuchitapo kanthu kuti wamazge nkhaza.—Yesaya 60:18.
Icho chikwambiska uchigeŵenga
Baibolo likulongosora chifukwa cheneko icho chikwambiska uchigeŵenga, likuti: “Munthu wakuwusa munyake na kumupweteka.” (Mupharazgi 8:9) Kwamba kale chomene, ŵanthu awo ŵali na nkhongono ŵakugwiliskira ntchito vigeŵenga kuti ŵakandilizge ŵanyawo. Pamanyuma pake, ŵanthu awo ŵakandilizgika nawo ŵakugwiliskira ntchito vigeŵenga kuti ŵawezgere.—Mupharazgi 7:7.
Umo uchigeŵenga uzamumalira
Chiuta wakulayizga kuti wawuskengepo wofi na nkhaza, ndipo wazamukhazikiska mtende pa charu chapasi. (Yesaya 32:18; Mika 4:3, 4) Iyo:
Wazamuwuskapo icho chikwambiska uchigeŵenga. Chiuta wazamuwuskapo maboma gha ŵanthu na kuŵikapo boma lake ilo lizamuwusa pa charu chose chapasi. Muwusi wa boma la Chiuta uyo ni Yesu Khristu, wazamuchita vinthu mwambura kutemwera, ndipo wazamuwuskapo kukandilizgana na nkhaza. (Salimo 72:2, 14) Panyengo iyo, pazamuŵavya munthu uyo wazamuchitaso uchigeŵenga. Ŵanthu “ŵazamukondwa chomene na mtende ukuru.”—Salimo 37:10, 11.
Wazamuwuskapo masuzgo ghose agho ghiza chifukwa cha uchigeŵenga. Chiuta wazamuchizga ŵanthu wose awo ŵasangana na masuzgo chifukwa cha uchigeŵenga kwali ŵali kuchita kupwetekeka muthupi panji mu maghanoghano. (Yesaya 65:17; Chivumbuzi 21:3, 4) Wakulayizga kuti wazamuwuska nanga ŵangaŵa ŵakufwa kuti ŵazakaŵe na umoyo wamuyirayira pa charu chapasi icho pazamuŵa mtende.—Yohane 5:28, 2.
Baibolo likupeleka vifukwa viwemi vyakugomezgera kuti Chiuta wachitengepo kanthu mwasonosono kuti wawuskepo masuzgo ghose. Ndipouli, mungajifumba kuti, ‘Chifukwa wuli pasono Chiuta wandamazge uchigeŵenga?’ Kuti musange zgoro la fumbo ili, wonelerani vidiyo ya mutu wakuti Chifukwa Wuli Chiuta Walekelera Uheni na Suzgo?
a Mazgu ghakuti “Uchigeŵenga” kanandi ghakuyowoya za kuchitira ŵanthu nkhaza panji kuŵawofya, chomenechomene ŵanthu bweka na chilato chakuti vinthu visinthe pa nkhani ya ndyali, chisopa, panji vinthu vinyake mu charu. Kweni ŵanthu ŵanyake ŵangakolerana nayo yayi fundo iyi kuti kuchita nthena mbuchigeŵenga.
Panji Mungatemwa Kuŵerengaso Nkhani Izi
NKHANI ZINYAKE
Ivyo Mungachita kuti Muleke Kwenjerwa
Kasi ni fundo wuli zakovwira na mavesi gha mu Baibolo agho ghangamovwirani kuti muleke kwenjerwa chomene?
NKHANI ZINYAKE
Chigomezgo Chakuti Kunthazi Vinthu Vizamusintha
Chifukwa wuli ivyo Baibolo likulayizga vikupambana chomene na ivyo ŵanthu ŵakulayizga panji kuyowoyerathu?
MAFUMBO AGHO BAIBOLO LIKUZGORA
Kasi Ufumu wa Chiuta Ni Vichi?
Chifukwa wuli boma la Chiuta ndapachanya chomene?
GONGWE LA MULINDA
Kasi Ufumu wa Chiuta Uzamufiska Vichi?
Yesu wakamanyanga kuti ni Ufumu wa Chiuta pera uwo ungamazga masuzgo pa charu chapasi. Kasi ni vichi ivyo Ufumu wa Chiuta uli kuchita kale ndipo ni vichi ivyo ufiskenge?
NKHANI ZINYAKE
Kasi Vingachitika Kuti pa Charu Pachitikenge Vinthu Vyaurunji?
Baibolo likulongora kuti urunji wenecho ukufuma kwa Chiuta, uyo wakuzirwiska umoyo wa munthu waliyose.
VISAMBIZGO VYAKUZIRWA VYA MU BAIBOLO
Chifukwa Wuli Chiuta Walekelera Uheni na Suzgo?
Ŵanthu ŵanandi ŵakufumba kuti ‘chifukwa wuli ŵanthu ŵakusuzgika?’ Baibolo lili na zgoro la fumbo ili.
