Vimbundi ivyo vikuchitika na ŵalaraŵalara ŵa boma ni suzgo la pa charu chose ndipo vyakufumapo vyake vikuŵa vyakofya chomene. a Mwachiyelezgero, mu nyengo ya muliri wa COVID-19, mu vyaru vinyake ŵanthu ŵakayowoyanga kuti ŵalara ŵa boma ŵakonyera mu thumba lawo ndalama izo ntchito yake yikaŵa yakovwira awo ŵakhwaskika na muliri uwu. Vimbundi vya nthena ivi vikutondeska ŵanthu kusanga wovwiri wa ku chipatala uwo ŵakukhumbikwira, ndipo pamanyuma ŵanandi ŵakutambura na kufwa.

 Ivyo vikuchitika para boma nda vimbundi vikuŵa viheni chomene. David Cameron, uyo wakaŵa nduna yikuru ya ku United Kingdom, wakati: “Vimbundi vili nga mbutatavi ukuru ndipo vyaru vyose vikukoleka pa lutatavi uwu.”

 Ndipouli, tili na chigomezgo chose kuti sonosono apa vimbundi vyose ivyo vikuchitika mu boma vimarenge. Chifukwa wuli? Wonani ivyo Baibolo likuyowoya kuti Chiuta wazamuchita.

 Mu Baibolo muli mazgu gha Chiuta agha agho ghakuti: “Ine Yehova, nkhutemwa urunji. Nkhutinkha kupoka vyaŵene na ubendezi.” b (Yesaya 61:8) Para ŵanthu ŵakusuzgika chifukwa cha vimbundi ivyo ŵanyawo ŵakuchita, Chiuta wakumanya. (Zintharika 14:31) Iyo wakulayizga kuti: “Pakuti ŵakusuzgika ŵakuyuzgika, . . . Niwukenge na kuchitapo kanthu.”—Salimo 12:5.

 Kasi Chiuta wazamuchita vichi? M’malo mwakusintha maboma agho ghalipo kale, wazamwiza na boma lake la kuchanya ilo lizamunjira m’malo mwa maboma ghose agha. Boma ili likumanyikwa kuti “Ufumu wa Chiuta.” (Mariko 1:14, 15; Mateyu 6:10) Baibolo likuti: “Chiuta wakuchanya wazamwimika ufumu uwo . . . uzamuteketa na kumazga maufumu ghose agha, ndipo iwo wekha ndiwo uzamuŵako kwamuyirayira.” (Daniyeli 2:44) Apa Chiuta wazamumazga vimbundi vyose ivyo tikuwona vikuchitika pasono.

 Kasi tikumanya wuli kuti Ufumu wa Chiuta uzamuŵa boma lambura vimbundi? Ghanaghanirani fundo izi.

1.  1. Nkhongono. Ufumu uwu ukupokera nkhongono zake kufuma kwa Chiuta Wankhongonozose.—Chivumbuzi 11:15.

    Chifukwa wuli ntchakuzirwa: Kuti maboma ghagwire makora ntchito ghakuthemba ndalama zakufuma ku ŵenekaya. Kanandi ivi vikupangiska kuti paŵe ukhuluku, unkhungu, na kulyera ŵanthu masuku pa mutu. Ndipouli, Ufumu uwu ukovwirika na Chiuta Wankhongono zose, ntheura nyengo zose uzamuŵapanga vyakukhumbikwa awo ŵazamuŵa pasi pa ufumu uwu.—Salimo 145:16.

2.  2. Muwusi. Chiuta wali kusora Yesu Khristu kuŵa muwusi wa Ufumu uwu.—Daniyeli 7:13, 14.

    Chifukwa wuli ntchakuzirwa: Nanga ŵangaŵa ŵanthu awo ŵakumanya kuwusa makora nawo ŵangatimbanizgika na vyakuchita vya ŵanji na kuchita chinthu chinyake chiheni. (Mupharazgi 7:20) Mwakupambanako, Yesu walongora pakweru kuti wangapokera chimbundi yayi. (Mateyu 4:8-11) Chinyake ntchakuti, nyengo zose wakulongozgeka na chitemwa chanadi pa ŵanthu kweniso wakuŵafipira mtima.—Salimo 72:12-14.

3.  3. Malango. Malango gha Ufumu wa Chiuta ngakufikapo, ndipo awo ŵakughalondezga ŵakuŵa ŵakukondwa.—Salimo 19:7, 8.

    Chifukwa wuli ntchakuzirwa: Malango gha ŵanthu kanandi ghakuŵa ghakusuzga, ghakuvuska, ndipo panji ŵakuchita kuŵachichizga ŵanthu kuti ŵaghalondezgenge. Ivi vikupangiska ŵanji kuchita vimbundi. Apo malango gha Chiuta ngapusu na gha chandulo. (Yesaya 48:17, 18) Chinyake, ntchakuti malango agha ghakuyowoya vya vyakuchita pera yayi kweni ghakuyowoyaso vyakukhwaskana na vilato. (Mateyu 22:37, 39) Chiuta wakusanda mitima ndipo wangawoneseska kuti malango agha ghakulondezgeka mwalusungu.—Yeremiya 17:10.

 Tikumupemphani kuti musambire vinandi vyakukhwaskana na ivyo Baibolo likulayizga pa nkhani ya boma lambura vimbundi ilo likwiza munthazi.

•   Ŵazgani nkhani yakuti “Ufumu wa Chiuta Ni Boma Lambura Vimbundi” kuti mumanye vifukwa vinyake vitatu ivyo Ufumu wa Chiuta uzamuŵira wambura vimbundi.

•   Wonelerani vidiyo yakuti Kasi Ufumu wa Chiuta Ni Vichi? kuti mumanye vinandi vya Ufumu wa Chiuta kweniso ivyo uzamuchita pa charu chapasi.

•   Yezgani kusambira nase Baibolo munthowa yakudumbiskana kuti muwone umo mungasangira chandulo na ivyo Baibolo likulayizga.