Chaka chilichose kukuchitika vindindindi masauzandi ghanandi chomene. Nangauli vinandi vikuŵa vichokovichoko, kweni vinyake vikusakaza katundu munandi chomene, kwambiska masuzgo ghakupambanapambana, kweniso kukoma ŵanthu. Nyengo zinyake vikwambiska tsunami uyo wakukhwaska chomene vigaŵa vya mumphepete mwa nyanja na kukoma ŵanthu ŵanandi ŵa mu vigaŵa ivi. Kasi Baibolo likayowoyerathu kuti kuzamuŵa vindindindi vikuru?

Mu nkhani iyi

•  Kasi Baibolo likayowoyerathu kuti kuzamuŵa vindindindi?

•  Kasi vindindindi ivyo vikuchitika mu nyengo yithu yino vikufiska uchimi wa mu Baibolo?

•  Kasi uchimi wa mu Baibolo wakuyowoya vya vindindindi ukutikhwaska wuli?

•  Mautesi pa nkhani ya uchimi wa mu Baibolo na vindindindi

 Baibolo likuzunura vindindindi mu uchimi uwo Yesu wakayowoya. Mazgu ghake ghali kulembeka mu mabuku ghatatu gha mu Baibolo agha:

 “Mtundu uzamuwukirana na mtundu unyake, ufumu na ufumu unyake. Kweniso kuzamuŵa njara na vindindindi mu malo na malo.”—Mateyu 24:7.

 “Mtundu uzamuwukirana na mtundu unyake, ufumu na ufumu unyake. Kuzamuŵa vindindindi mu malo na malo. Kuzamuŵaso njara.”—Mariko 13:8.

 “Kuzamuŵa vindindindi vikuru, kweniso njara na nthenda zakwambukira mu malo na malo.”—Luka 21:11.

 Yesu wakayowoyerathu kuti kuzamuŵa “vindindindi vikuru” “mu malo na malo” kweniso nyengo yeneyiyo kuzamuŵaso nkhondo, njara, na nthena zakwambukira. Para vinthu vyose ivi vikuchitika, chizamuŵa chimanyikwiro chakuti tikukhala mu nyengo ya “umaliro wa charu,” panji kuti “mazuŵa ghaumaliro.” (Mateyu 24:3; 2 Timote 3:1) Para tasanda makora uchimi wa mu Baibolo, tikuwona kuti “mazuŵa ghaumaliro” ghakamba mu 1914 ndipo ghachali m’paka sono.

 Enya. Uchimi wa Yesu kusazgapo na ivyo wakayowoya pa nkhani ya vindindindi, ukukolerana chomene na ivyo vikuchitika mazuŵa ghithu ghano. Kufuma mu 1914, pachitika vindindindi vyakujumpha 1,950, ndipo vyakoma ŵanthu ŵakujumpha 2 miliyoni. a Wonani viyelezgero vichoko waka ivi.

 2004—Indian Ocean. Chindindindi cha nkhongono yakukwana 9.1 chikambiska tsunami uyo wakakhwaska vyaru vinandi ndipo ŵanthu pafupifupi 225,000 ŵakafwa.

 2008—China. Chindindindi cha nkhongono yakukwana 7.9 chikasakaza vikaya na matawuni, ndipo vikupulikikwa kuti chikakoma ŵanthu 90,000, na kupweteka ŵanyake 375,000, kweniso ŵanthu mamiliyoni ghanandi ŵakaŵavya pakukhala.

 2010—Haiti. Chindindindi cha nkhongono yakukwana 7.0 kweniso tuvindindindi tunyake tuchokotuchoko, vikakoma ŵanthu ŵakujumpha 300,000 ndipo ŵanthu ŵakujumpha 1 miliyoni ŵakasoŵa pakukhala.

 2011—Japan. Chindindindi cha nkhongono yakukwana 9.0 na tsunami uyo chikambiska, vikakoma ŵanthu pafupifupi 18,500 na kuleka ŵanthu masauzandi ghanandi ŵalije pakukhala. Mashini ghakupanga nkhongono ya magesi mwakugwiliskira ntchito nyukuliya ku Fukushima yikasweka, ndipo ivi vikapangiska kuti paŵe ngozi yikuru. Pati pajumpha vyaka 10, ŵanthu pafupifupi 40,000 ŵakatondekanga nipera kuwelera ku nyumba zawo izo zikaŵa kufupi na mashini agha chifukwa cha kopa kupwetekeka.

 Uchimi wa mu Baibolo wakuyowoya vya vindindindi ukutovwira kumanya ivyo vichitikenge sonosono panthazi apa. Yesu wakati: “Para mukuwona vinthu ivi vikuchitika, manyani kuti Ufumu wa Chiuta uli pafupi.”—Luka 21:31.

 Baibolo likulongosora kuti Ufumu wa Chiuta ni boma lanadi lakuchanya ilo Themba lake ni Yesu Khristu. Ufumu uwu ndiwo Yesu wakasambizga ŵalondezgi ŵake kuti ŵawulombenge.—Mateyu 6:10.

 Para Ufumu wa Chiuta wamba kuwusa pa charu chapasi, Chiuta wazamulekeska masoka gha chilengiwa ghose, kusazgapo na vindindindi kuti vileke kupweteka ŵanthu. (Yesaya 32:18) Nakuti chikuru chomene wazamupembuzga na kuchizga wose awo ŵakhwaskika na vindindindi ivyo vikuchitika mazuŵa ghano. (Yesaya 65:17; Chivumbuzi 21:3, 4) Kuti mumanye vinandi, ŵazgani nkhani yakuti, “Kasi Ufumu wa Chiuta Uzamuchita Vichi?”