Pa October 9, 2024, wupu wa World Wildlife Fund ukafumiska lipoti la kuzizika chomene lakukhwaskana na umo ŵanthu ŵakunangira vinyama. Lipoti ili likulongora kuti mu “vyaka 50 ivyo vyajumpha (1970-2020), unandi wa vinyama vyamuthengere wachepa na 73 peresenti.” Lipoti ili likachenjezga kuti: “Ntchakupulikikwa kuyowoya kuti ivyo vichitikenge mu vyaka vinkhondi ivyo vikwiza vizamulongora umo umoyo uzamuŵira pa charu chapasi munthazi.”

 Ntchakupulikikwa kuti ŵanthu ŵanandi ŵakuzizwa na malipoti agha. Tikuchitemwa charu chithu chakutowa ichi ndipo tikukondwa yayi para tikuwona vinyama vikusuzgika. Tikujipulika nthena chifukwa Chiuta wakatilenga kuti tivipwelelerenge vinyama.—Genizesi 1:27, 28; Zintharika 12:10.

 Ntheura mungajifumba kuti, ‘Kasi tikwaniskenge kuvikilira vyamoyo pa charu chapasi? Kasi Baibolo likuti wuli?’

 Nangauli tikuyezgayezga, kweni Chiuta ndiyo wali na mazaza ghose pa vyamoyo. Pa Chivumbuzi 11:18, Baibolo likayowoyerathu kuti Chiuta ‘wazamuparanya awo ŵakunanga charu chapasi.’ Vesi ili likutisambizga vinthu viŵiri:

1.  1. Chiuta wazamulekeska ŵanthu kuti ŵaleke kunangirathu charu.

2.  2. Chiuta wachitengepo kanthu sonosono apa. Kasi tikumanya wuli? Mu mdauko wose wa ŵanthu, sono ndipo vinthu vyafika paheni chomene mwakuti ŵanthu ŵangananga chomene vyamoyo kuluska kumanyuma.

 Kasi Chiuta wazamuchita wuli kuti wamazge suzgo ili? Wazamugwiliskira ntchito boma lake la kuchanya, panji Ufumu wake, kuti wawuse charu chose chapasi. (Mateyu 6:10) Boma ili lizamusambizga ŵanthu ŵakupulikira umo ŵangapwelelera na kuvikilira vyamoyo pa charu chapasi.—Yesaya 11:9.