Mu January 2021, Wupu Wakulongozga ukapharazga vya kufumiskika kwa buku liphya lakusambilira Baibolo la mutu wakuti, Mungakondwa na Umoyo Kwamuyirayira! a Kasi mukajipulika wuli na chipharazgo ichi? Matthew, wa ku Canada, wakati: “Nkhakondwa chomene! Nakuti apo nkhategherezganga nkhani na kuwonelera mavidiyo ghakulongosora chifukwa icho buku ili lapangikira kweniso umo ŵakaliyezgera dankha pambere lindafumiskike, ndipo chimwemwe chane chikasazgikiranga chomene. Nkhulindilira waka mwakunweka kuzakaliwona buku ili na kwamba kuligwiliskira ntchito.”

 Buku la Mungakondwa na Umoyo Kwamuyirayira! lili na nthowa yiphya ya kusambizgira ŵanthu Baibolo. Ndipouli, ni ivi pera yayi ivyo vikupangiska kuti buku ili liŵe lakupambanako na mabuku agho tagwiliskiranga ntchito kumasinda uku. Para muli na buku lakuchita kupulinta la Mungakondwa na Umoyo Kwamuyirayira! panji mungawona kuti likuwoneka mu nthowa yinyake. Kuti mumanye chifukwa icho likuwonekera lakupambanako na ghanyake, tiyeni tiwone umo buku ili lili kupangikira.

 Mapepara ghakomi. Chifukwa wuli ŵakagwiliskira ntchito mapepara agha? Buku la Mungakondwa na Umoyo Kwamuyirayira! lili na vithuzi vyakuŵara vyakujumpha 600, panji titi vikujumpha na maulendo pafupifupi 10 kuyaniska na vithuzi ivyo vili mu buku la Baibolo Likutisambizga Vichi? Buku ili liliso na mapeji ghanandi agho mulije malemba, panji chithuzi chilichose. Vinthu viŵiri ivi vikupangiska kuti paŵe suzgo: Para pepara ndakuveluka, ntchipusu kuti vithuzi vyakuseri viwonekerenge, nanga vingaŵa kuti vikuwoneka makora viŵi yayi. Kuti ŵamarane na suzgo ili, ŵabali ŵa mu Dipatimenti Yakupulinta ku Likuru lithu (International Printing Department (IPD)), ku Wallkill, New York, U.S.A., ŵakayezga mitundu yinayi ya mapepara agho tikugwiliskira ntchito ku malo ghithu ghakupulintira. Komiti Yakulemba ya Wupu Wakulongozga yikasanda mapepara ghose agho ŵakayezgelerapo na kusankha mtundu uwo ukaŵa ukomi pa ghose. Nangauli mtundu wa mapepara agha ngwakudura, panji tingati pafupifupi 16 peresenti kuluska mitundu yinyake ya mapepara agho tikugwiliskiranga ntchito pa kupulinta mabuku ghanyake. Kweni ukovwira chomene kuti para munthu wakuŵazga buku la Mungakondwa na Umoyo Kwamuyirayira! waleke kutimbanizgika na vithuzi ivyo vili ku peji lakuseri.

 Chikopi chakupambanako. Chikopi cha buku liphya ili chikupambanako na vikopi vya mabuku ghanyake chifukwa chili kupangika na mtundu unyake wa pepara uwo ukovwira kuti liŵe lakuvikilirika. M’malo mwa mtundu wa pepara uwo tikugwiliskira ntchito kanandi pakupanga vikopi vya mabuku ghanyake, chikopi cha buku ili chili kupangika mu nthowa yakuti chithuzi icho chili pawaro pake chiwonekenge chakutowa chomene. Nthowa iyo chikopi ichi chili kupangikira yikovwira kuti buku ili lileke kutchujuka luŵiro chifukwa cha kuligwiliskira ntchito pafupipafupi. Ndipouli, vinthu ivyo tikagwiliskira ntchito pakupanga chikopi cha buku ili ni vyakudura chomene, panji maulendo 5 kuluska ivyo tikugwiliskira ntchito nyengo zose. Ntheura maofesi gha munthavi ghanandi ghakakolerana pakugura vinthu vyakukhumbikwa ivi pa mtengo wakukhilirapo.

 Chifukwa wuli tikasankha kugwiliskira ntchito vinthu vyakudura ivi pakupanga chikopi cha buku ili? Mubali munyake uyo wakugwira mu Dipatimenti Yakupulinta ku likuru lithu wakalongosora kuti: “Tikukhazga kuti ŵanthu ŵazamuligwiliskira ntchito makora buku ili, ntheura tikukhumba kuti lizakalutilire kuwoneka makora nanga vingaŵa kuti lagwiliskirika ntchito kwa nyengo yitali.” Eduardo, uyo wakuteŵetera ku Ofesi Yakupulinta mabuku iyo yili ku Brazil, wakuti: “Ndise ŵakukondwa chomene kuwona umo gulu la Yehova lagwiliskira ntchito vinthu vyapachanya ivi kuti buku ili liŵe lakutowa, lakukhora, na lakudokeka pakulilaŵiska, kweni panyengo yimozamoza tikuwoneseska kuti tagwiliskira ntchito mwakwenelera vyawanangwa ivyo ŵanthu ŵakupeleka.”

 Tikamba kupulinta buku la Mungakondwa na Umoyo Kwamuyirayira! mu March 2021. Apa ndikuti muliri wa COVID-19 uli mukati, ntheura tingati pakaŵa masuzgo ghanandi. Pakuti ŵanthu ŵakakanizgika kufuma na kuluta ku maofesi ghithu gha munthavi, vikapangiska kuti chiŵe chakusuzga kuti ŵabali ŵizenge kuzakatovwirako ntchito zinyake ku malo ghithu ghanandi agho tikupulintirako mabuku kweniso tikatondeka kuchema ŵanyake kuti ŵazakambe kuteŵetera pa Beteli. Ivi vikapangiska kuti ŵanthu awo ŵakuchita milimo yakupambanapambana ku malo agho tikupulintirako mabuku ŵaŵe ŵachoko, ndipo malo ghanyake ghakajalika dankha chifukwa cha malango agho boma likaŵika.

 Kasi masuzgo agha tikamarana nagho wuli? Ku malo uko tikazomerezgekanga kupulinta, ŵabali na ŵadumbu ŵakufuma mu madipatimenti ghanyake gha pa Beteli ŵakatumikanga kuti ŵakawovwirepo mwakukolerapo waka. Joel uyo wakuteŵetera mu Dipatimenti Yakupulinta wakati: “Mzimu wakujipeleka uwo ŵakaŵa nawo kweniso chifukwa chakuti ŵakaŵa ŵakukhumbisiska kusambira milimo yiphya, vikawovwira kuti ntchito yilutilire kwenda.”

 Nangauli pakaŵa masuzgo ghose agha, kweni tafiska kupulinta mabuku mamiliyoni gha Mungakondwa na Umoyo Kwamuyirayira! Kuti tipange mabuku agha pakukhumbikwira vinthu vyakupambanapambana, kusazgapo vyakovwira pakupulinta, mapepara, inki, na guluu. Mu myezi 5 pera iyo tapulintira mabuku agha, tagwiliskira ntchito ndalama zakujumpha madola 2.3 miliyoni gha ku America. Kuti tileke kusakaza ndalama zinandi, tikuŵikapo mtima kupulinta mabuku agho mipingo yikukhumbikwira nadi.

 Kasi awo ŵakusambizga ŵanji Baibolo pamoza na ŵasambiri ŵawo ŵakujipulika wuli na buku ili? Paul, mubali wa ku Australia, wakuti: “Buku la Mungakondwa na Umoyo Kwamuyirayira! ndakunozga chomene ndipo nkhukondwa kuligwiliskira ntchito pakusambizga ŵanthu Baibolo. Lili kulembeka mu nthowa yakukopa, kweniso mu nthowa yambura kusuzga kudumbiskana na munthu. Buku ili lili na uthenga wakupulikikwa makora, mafumbo ghakufika pamtima, mavidiyo, vithuzi, matchati, na vinthu vyakuti msambiri wa Baibolo wachite. Lili kupangika mu nthowa yapadera chomene ndipo likunovwira kuti nisazgireko luso lwane lwakusambizga.”

 Msambiri wa Baibolo munyake ku United States wakati: “Nkhulitemwa chomene buku liphya ili. Vithuzi ivyo vilimo vikunovwira kuti nipulikiske fundo zikuru. Mavidiyo ghakunifika pamtima chomene ndipo ghakunovwira kuti nichitepo kanthu.” Msambiri uyu wakusambira Baibolo kaŵiri pa sabata ndipo nyengo zose wakusangikapo pa maungano.

 Pachali kukhumbikwa mabuku gha Mungakondwa na Umoyo Kwamuyirayira! mamiliyoni ghakuti tipulinte mu viyowoyero vinandi. Nakuti kufika pasono, Wupu Wakulongozga wazomerezga kuti buku ili lifumiskike mu viyowoyero 710, ndipo tingati chiŵelengero ichi chajumpha na 340 pa viyowoyero ivyo tikafumiska buku la Baibolo Likutisambizga Vichi?

 Kasi ndalama zakuti tipulintire mabuku ghose agha zikufuma nkhu? Kufuma pa vyawanangwa vyakovwira pa ntchito ya pa charu chose, ndipo vinandi vikupelekeka kwizira pa donate.pr418.com. Tikumuwongani chomene chifukwa cha mtima winu wakupa, ndipo vyawanangwa vinu vyawovwira kuti tipange mabuku ghakusambilira Baibolo agho ghawovwirenge ŵanthu awo ŵakukhumba kumanya vinandi vya Yehova na kukondwa “na umoyo muyirayira.”—Salimo 22:26.