Chaka chilichose, ŵateŵeti ŵapadera ŵanyengozose ŵakuchemekanga kuti ŵakanjire Sukulu ya Giliyadi, iyo yikuchitikira ku Watchtower Educational Center ku Patterson, New York. a Para ŵali ku sukulu iyi, ŵana ŵa sukulu ŵakusambira ivyo ŵangachita kuti ŵafiske mauteŵeti ghakupambanapambana mu gulu la Yehova. Ivyo ŵakusambira vikovwira kuti mipingo yikaŵe yakukhora kweniso kuti vinthu vikendenge makora pa ofesi ya munthavi.

 Ŵanthu kufuma pa charu chose chapasi ŵakuchemeka kuti ŵakasambizgike. Mwachiyelezgero, kilasi nambara 147 ilo likachitika mu 2019 likaŵa na ŵana ŵa sukulu ŵakukwana 56, ndipo ŵakafuma mu vyaru 29. Awo ŵakuluta ku sukulu iyi, ŵakuŵa kuti ŵakuchita uteŵeti wapadera wanyengozose, nga awo ŵakuteŵetera pa Beteli, ŵalaŵiliri ŵa dera, ŵamishonale, panji ŵapayiniya ŵapadera.

 Ntchito yakunozgekera kilasi lililose yikwamba kuchitika kuchali nyengo yinandi pambere kilasi lindambe. Mwachiyelezgero, Dipatimenti Yakuwona Vyamaulendo ya pa Charu Chose (World Headquarters Travel Department) yikudumulirathu matikiti gha ndege gha ŵabali na ŵadumbu awo ŵakwiza ku sukulu iyi. Pa kilasi la nambara 147 la Giliyadi, gulu likagwiliskira ntchito madora pafupifupi 1, 075 gha ku America pakuchema mwana wa sukulu wa mu charu chinyake kuti wize kuti Patterson na kuwelera kwawo. Kweni ŵana ŵasukulu awo ŵakafuma ku Solomon Islands waliyose ŵakamulipilira madora pafupifupi 2,300 gha ku America. Vikaŵa nthena chifukwa chakuti ŵakenda mtunda wa makilomita pafupifupi 35,400, kuluta na kuwera ku sukulu iyi. Kuti gulu lileke kunanga chomene ndalama, Dipatimenti Yakuwona Vyamaulendo ya pa Charu Chose, yikugwiliskira ntchito pulogiramu yinyake ya pa kompyuta kuti yimanyenge ndege izo zili na mitengo yiwemiko. Pulogiramu iyi yikulutilira kupenja usange mitengo yakhirako nanga ŵangaŵa kuti ŵakabuka kale, ndipo ivi vikuchitika nanga kungaŵa kuti kuchali masabata panji myezi. Dipatimenti ya Vyamaulendo yikugwiliskiraso ntchito matikiti agho ŵabali ŵanyake ŵapeleka ku gulu nga ntchawanangwa.

 Ŵana ŵasukulu ŵanandi ŵakukhumbikwira pasipoti (visa) yakwendera kuluta ku United States. Dipatimenti Yakuwona Vyamalango ya pa Charu Chose ndiyo yikovwira kuti ŵana ŵa sukulu ŵasange mapasipoti (visa). Kuti mwana wa sukulu wasange pasipoti (visa) na makalata ghanyake ghakuzirwa, gulu likugwiliskira ntchito madora 510 gha ku America pa mwana waliyose.

 Kasi ivyo ŵakusambira ku Giliyadi vikutovwira wuli? Hendra Gunawan ni mulara mu mpingo unyake ku Southeast Asia. Mu mpingo uwu muli mubali na muwoli wake awo ŵakasambirako sukulu ya Giliyadi. Hendra Gunawan wakati: “Pakwamba, mu mpingo withu mukaŵavya ŵapayiniya ŵanyengozose. Kweni mubali na mudumbu uyu ŵakati ŵafika, mwamphu wawo pa mulimo wakupharazga ukawovwira chomene kuti ŵanyake mu mpingo ŵambe upayiniya wanyengozose. Nakuti mudumbu munyake m’paka wakanjira Sukulu ya Ŵapharazgi ŵa Ufumu!”

 Sergio Panjaitan wakuteŵetera pa Beteli ku Southeast Asia lumoza na ŵabali awo ŵali kusambirako Sukulu ya Giliyadi. Iyo wakati: “Ivyo ŵanthu aŵa ŵali kusambira vikovwira iwo pera yayi, kweni vikovwiraso na ise wuwo. Iwo ŵali kusambira vinandi chomene! Kweni m’malo mwakuti ŵambe kujitukumura chifukwa cha ivyo ŵali kusambira, ŵakutiphalirako ivyo ŵali kusambira. Ivyo ŵakutiphalira vikutovwira chomene ndipo nase tikovwira navyo ŵanyakeso.”

 Kasi gulu likuzisanga nkhu ndalama zakwendeskera sukulu iyi? Kwizira mu vyawananga ivyo ŵanthu ŵakupeleka pa charu chose chapasi, ndipo ŵanandi ŵakugwiliskira ntchito nthowa izo zikusangika pa webusayiti yithu pa donate.pr418.com. Tikumuwongani chomene chifukwa cha vyawanangwa vinu ivyo mukupeleka, vikovwira kuti sukulu iyi yendenge makora.