Yesu wakaphalira ŵasambiri ŵake kuti: “Muzamuŵa ŵakaboni ŵane . . . ku vigaŵa vyakutali chomene vya charu chapasi.” (Milimo 1:8) Mazuŵa ghano, Ŵakaboni ŵa Yehova ŵakuŵikapo mtima chomene kuchita ivyo Yesu wakayowoya apa. Ndipouli, mu vigaŵa vinyake vya charu chapasi, nga ni vigaŵa ivyo ni vikuru kweniso kuli ŵanthu ŵanandi, makani ghawemi ghachali ghandapharazgike mwakukwana. Nakuti mu vyaru vinyake muli Ŵakaboni ŵa Yehova ŵachoko chomene. (Mateyu 9:37, 38) Kasi tikuchita wuli kuti tifiske kupharazgira ŵanthu ŵanandi chomene?

 Kuti chiŵe chipusu kupulikira dango la Yesu ili, Komiti ya Uteŵeti ya Wupu Wakulongozga wa Ŵakaboni ŵa Yehova, yikutuma ŵamishonale ku vigaŵa ivyo vikukhumbikwa ŵapharazgi ŵanandi pa charu chose. Pasono pali ŵamishonale 3,090 awo ŵakuteŵetera mu vigaŵa vyakupambanapambana pa charu chose. a Ŵanandi ŵakasambira sukulu yakusambizga Baibolo, nga ni Sukulu ya Ŵapharazgi ŵa Ufumu. Ŵamishonale mbakunozgeka kuleka vikaya vyawo na kuluta kukateŵetera mu vyaru vinyake. Iwo ŵakovwira pa kuthandazga makani ghawemi ndipo ntchiyelezgero chiwemi ku ŵasambiri ŵaphya, ntheura tikuŵawonga chomene chifukwa cha kukura kwawo mwauzimu, ivyo ŵali kusambira, na ivyo ŵakuchita.

 Pa ofesi ya munthavi yiliyose, Ofesi Yakulaŵilira Ŵateŵeti ŵa ku Filudi iyo yili pasi pa Dipatimenti ya Uteŵeti yikugwira ntchito na Komiti ya Munthavi kuti yipwelelere vyakukhumbikwira vya ŵamishonale, nga nkhuŵalipilira nyumba yakukhala, wovwiri wa ku chipatala, na ndalama yichoko waka yakovwira kugulira vinthu vyakukhumbikwa chomene pa umoyo. Mu chaka cha uteŵeti cha 2020, Ŵakaboni ŵa Yehova ŵakagwiliskira ntchito ndalama pafupifupi madola 27 miliyoni gha ku America pa kovwira ŵamishonale. Ivi vikovwira kuti ŵamishonale ŵaŵike mtima na kugwiliskira ntchito nkhongono zawo zose pa kuchita uteŵeti, kweniso kukhozga mpingo uwo ŵakuteŵetera.

 Kasi ŵamishonale ŵawovwira wuli pa ntchito ya kupharazga? Frank Madsen, uyo ngwa mu Komiti ya Munthavi ya Malawi, wakuti: “Chifukwa cha chikanga kweniso maluso agho ŵamishonale ŵali nagho, vyawovwira mipingo iyo ŵakuteŵeteramo kwamba kupharazga ku vigaŵa vyakusuzga kupharazgako, nga ni ivyo kuli nyumba za mipanda kweniso uko ŵakuyowoya viyowoyero vinyake. Pakutiso ŵakuŵikapo mtima kusambira chiyowoyero na mitheto ya uko ŵakuteŵetera, vikupeleka chiyelezgero chiwemi chomene ku ŵanji kweniso ku ŵawukirano awo nawoso ŵakukhumba kuzakachita uteŵeti wanyengozose munthazi. Tikuwonga chomene Yehova chifukwa cha ŵamishonale.”

 Munyakeso uyo wakuteŵetera mu Komiti ya Munthavi ya charu chinyake wakuti: “Ŵamishonale ŵakupeleka ukaboni wakuti ŵanthu ŵa Yehova mbakukolerana pa charu chose. Nanga ni ŵanthu awo Mbakaboni yayi ŵakujiwonera ŵekha kuti tikusankhana mitundu chifukwa cha kupambana mitheto yayi, kweni Baibolo latovwira kuti tiŵe ŵanthu ŵakukolerana nga mbumba yimoza.”

 Kasi ŵamishonale ŵakovwira wuli ŵapharazgi ŵa mu mipingo yawo? Paulo, wa ku Timor-Leste, wakuwonga chomene ŵamishonale awo ŵakatumika mu mpingo uwo wakuwungana. Iyo wakuti: “Ku chigaŵa chithu nkhwakotcha chomene. Nangauli ŵamishonale aŵa ŵali kufuma ku malo ghakuzizima, kweni ŵakuleka yayi kupharazga chifukwa cha umo kuno kuliri. Nyengo zose ŵakusangikapo pa ungano wa kunozgekera uteŵeti. Kanandi nkhuŵawona ŵakuluta ku maulendo ghakuwelerako muhanya pakati, apo kukotcha chomene kweniso na ku mise wuwo ŵakuluta kukapharazga. Ŵawovwira ŵanthu ŵanandi chomene kusambira unenesko, kusazgapo na ine wuwo. Iwo mbakulimbikira ndipo ŵakuŵikapo mtima kuteŵetera Yehova na umoyo wawo wose, ndipo ivi vikovwira kuti mpingo wose uteŵetere Yehova mwakukwana.”

 Ketti, uyo ni mupayiniya wanyengozose ku Malawi, wakulongosora umo ŵakutorana ŵanyake awo ŵakaŵa ŵamishonale ŵakawovwilira banja lake: “Mbumba yinyake ya ŵamishonale yikatumika ku mpingo withu, ine nkhaŵa nekha Kaboni mu mbumba mwane. Kweni mbumba iyi yikanovwira chomene, ndipo yikamba kutemwana chomene na ŵamumbumba mwane. Chiyelezgero chawo chiwemi chikawovwira ŵana ŵane kuwona umo wamunthu ukuŵira wakukondwa na umoyo para ukuteŵetera Yehova. Nkhuwonga chomene chiyelezgero chiwemi cha ŵamishonale aŵa, chifukwa pasono ŵana ŵane ŵasungwana ŵatatu ŵakuchita upayiniya wanyengozose ndipo mfumu wane wali kwamba kuwungana.”

 Kasi ndalama zakovwilira ŵamishonale aŵa zikufuma nkhu? Zikufuma pa vyawanangwa vyakovwira pa ntchito yithu ya pa charu chose, ndipo vinandi vikupelekeka kwizira pa nthowa zakupambanapambana izo zikusangika pa donate.pr418.com. Tikuwonga chomene chifukwa cha vyawanangwa ivyo mukupeleka.