“Nalindilira buku ili kwa vyaka 19 sono!” Kasi mubali withu wakalindiliranga buku wuli? Baibolo la Malemba Ghakupatulika mu Mang’anamuliro gha Charu Chiphya, Mateyu-Uvumbuzi, mu Chibengali. Ŵanthu ŵanandi ŵakujipulika mwakuyana waka usange Baibolo la Mang’anamuliro gha Charu Chiphya lafumiskika mu chiyowoyero chawo. Kweni kasi muli kujifumbapo kuti chikuchitika ntchivichi kuti Mabaibolo agha ghang’anamurike na kupulintika?

 Chakwamba, Komiti Yakulemba ya Wupu Wakulongozga yikusankha timu ya awo ŵakuchita mulimo wakung’anamura. Kasi pakutora nyengo yitali wuli kuti awo ŵakuchita mulimo wakung’anamura ŵamalizge kung’anamura Baibolo? Nicholas Ahladis, uyo wakuteŵetera mu Dipatimenti yakuwona vya Ntchito Yakung’anamura ku Warwick, New York, wakulongosora kuti: “Pali vinthu vinandi ivyo vikunjizgikamo, vinthu nga unandi wa awo ŵakung’anamurako, kusuzga kwa chiyowoyero, na umo ŵanthu ŵa chiyowoyero icho ŵakupulikiskira mbiri iyo yikusangika mu Baibolo, kweniso usange chiyowoyero icho chikuyowoyeka mwakupambana mu vigaŵa na vigaŵa. Pa avereji, timu ya awo ŵakung’anamura yikutoranga vyaka vya pakati pa chimoza na vitatu kuti yimare kung’anamura Malemba Ghachigiriki pera, ndipo yikutorangaso vyaka vinayi panji kujumphirapo kuti yimalizge kung’anamura Baibolo lose lanthunthu. Para ŵakung’anamura mu chiyowoyero cha mawoko, nyengo iyi yikusazgikirakoso.”

 Ntchito yakung’anamura Baibolo yikuchitika na timu iyo yapika mulimo uwu pera yayi. Ŵabali na ŵadumbu ku mipingo, awo ŵakulira ku malo ghakupambana, ndipo nyengo zinyake ŵakufuma mu vyaru vyakupambana, ŵakuweleramo ivyo vyang’anamurika, kweni ŵakulipirika yayi, ŵakujipeleka waka. Ivyo ŵabali aŵa ŵakuyowoya para ŵamara kuweleramo, vikovwira awo ŵakuchita mulimo wakung’anamura kuti ŵang’anamure Baibolo lakupulikikwa makora, lipusu kweniso lakovwira. Munthu munyake uyo wakusambizga awo ŵakung’anamura umo ŵangachitira makora mulimo wakung’anamura Baibolo ku South Africa wakati, “Awo ŵakuchita mulimo wakung’anamura ŵakujipulika kuti ŵali na udindo ukuru chomene kwa Yehova kweniso ŵanthu awo ŵamuŵerenga Mazgu ghake.”

 Para ntchito yakung’anamura yamara, Baibolo likwenera kupulintika na kulipanga kuti liŵe buku. Kuti ivi vichitike, pakukhumbikwira vinthu ivyo vikovwira kuti ŵapulinte na kulipanga kuti liŵe buku lakuwoneka makora kweniso lakukhora. Mu 2019, ndalama zakujumpha madola 20 miliyoni gha ku America zikagwira ntchito yakugulira vinthu vyakukhumbikwa ivi. Awo ŵakuchita mulimo wa kupulinta ŵakagwira ntchito maora ghakujumpha 300,000 mu chaka ichi kuti ŵapange na kutumizga Mabaibolo agha.

 Chifukwa wuli tikuŵikapo mtima kweniso kumalira ndalama zinandi pa ntchito iyi? Joel Blue uyo wakuteŵetera mu Dipatimenti yakuwona vya ntchito yakupulinta ya pa charu chose wakati, “Baibolo ni buku lakuzirwa chomene pa mabuku ghose agho tikupanga. Ntheura tikukhumba kuti kawonekero kake kapelekenge uchindami kwa Chiuta uyo tikumusopa na uthenga uwo tikupharazga.”

 Padera pa Mabaibolo gha Mang’anamuliro gha Charu Chiphya ghose agho tikupanga, tikupangaso Mabaibolo gha ŵanthu awo ŵakusuzgikira kulaŵiska. Mwachiyelezgero, Baibolo la Mang’anamuliro gha Charu Chiphya la vilembo vya braille, likusangika mu viyowoyero 10. Kuti tipange Baibolo limoza la vilembo vya braille, tikutora maora pafupifupi 8, ndipo kuti musunge vigaŵa vyake pa shelufu, pakwenera kuŵa malo ghasani mamita 2.3. Tikupangaso Mabaibolo ghapadera gha awo ŵali mu ma jele agho ŵakuzomerezga mabaibolo agho ghapangika mu nthowa yinyake yakuti ghaleke kunangika luŵiro.

 Baibolo la Mang’anamuliro gha Charu Chiphya, likukhwaska chomene umoyo wa awo ŵakuliŵerenga. Wonani chiyelezgero chakufuma ku mpingo wa Chikiluba ku malo ghanyake ghakuchemeka Tombe, agho ghali ku Democratic Republic of the Congo. Chigaŵa cha Tombe chili pa mtunda wa makilomita ghakujumpha 1,700 kufuma ku msumba ukuru wa charu ichi. Ŵakaboni ŵa uku ŵakaŵa waka na Baibolo limoza pera la chiyowoyero cha Chikiluba ndipo likaŵaso lakale chomene. Ŵabali ŵakachitanga kubwerekana Baibolo ili kuti ŵanozgekere makora vigaŵa ivyo ŵapika pa maungano. Kweni chakukondweska ntchakuti kwamba mu August 2018, ŵabali aŵa ŵakapokera Baibolo lose la Mang’anamuliro gha Charu Chiphya mu Chikiluba ndipo sono waliyose wali na Baibolo lake.

 Pa kuyowoya vya Baibolo la Mang’anamuliro gha Charu Chiphya ili, mudumbu munyake uyo wakuyowoya Chigerman wakati: “Pasono nkhuchitaso kujikumbuska kuti nkhwenera kuŵerenga Baibolo yayi. M’malo mwake, nkhujifumba kuti, ‘Kasi ni nyengo wuli iyo ningaŵerenga vinandi?’” Mukayidi munyake wakalemba kuti: “Nkhapika Baibolo la Mang’anamuliro gha Charu Chiphya, ndipo likunovwira chomene kuti nisinthe umoyo wane. Kale nkhapulikiskanga yayi Mazgu gha Chiuta, kweni sono na Baibolo ili ndipo nkhupulikiska makora chomene. Nkhukhumba kumanya vinandi vya Ŵakaboni ŵa Yehova kweniso umo ningachitira kuti nane niŵe yumoza wawo.”

 Ŵanthu wose awo ŵakuŵerenga Baibolo la Mang’anamuliro gha Charu Chiphya ŵakuwonga chomene vyawanangwa ivyo vikovwira kuti Mabaibolo agha ghapangike. Vyawanangwa ivi vikupelekeka kuti viwovwire pa ntchito ya pa charu chose, ndipo vikwizira pa nthowa izo zikusangika pa donate.pr418.com. Tikumuwongani chomene chifukwa cha mtima winu wakupa.