Pa ŵanthu mamiliyoni ghanandi awo ŵakukhala ku Latin America, pali ŵanthu ŵanandi chomene awo ŵali na viyowoyero vyawo na mitheto yakupambana chomene na ya ŵanyawo. Ŵanandi mwa ŵanthu aŵa mbabali na ŵadumbu ŵithu, ndipo nawo ŵakuzirwiska mitheto yawo. Kuti ŵawovwire ŵanthu kusambira unenesko wa mu Baibolo, ŵakung’anamura na kugaŵira mabuku gha Ŵakaboni ŵa Yehova mu viyowoyero vyakujumpha 130 ivyo vikuyowoyeka na ŵanthu ŵa ku Latin America. a Ndipouli, ŵanyake mwa ŵabali ŵithu ŵakususkika chifukwa cha kusankha kuteŵetera Yehova kweniso kukana kuchitako mitheto iyo yikukolerana yayi na fundo za mu Baibolo. Kasi vyawanangwa vinu vyawovwira wuli ŵabali na ŵadumbu aŵa?

 Ku Mexico, ŵabali na ŵadumbu ŵithu ŵa mtundu wa Huichol awo ŵakukhala ku chigaŵa cha mapiri ku Jalisco State, ŵakakana mwantchindi kuchitako vinthu vyakukhwaskana na chisopa ivyo vikususkana na ivyo Baibolo likusambizga. b Kweni ivi vikakwiyiska ŵanthu ŵanyake mu chigaŵa chawo. Pa December 4, 2017, gulu linyake la chiwawa likawukira kagulu ka Ŵakaboni ŵa Yehova na ŵanyake awo ŵakaŵa lumoza. Gulu la chiwawa ili likati Ŵakaboni aŵa ŵafumemo mu chigaŵa chawo, likasakaza katundu wawo, na kuyowoya kuti waliyose uyo wamwizaso wazamukomeka.

 Ŵakaboni ŵa mu vigaŵa vyakufupi ndiwo ŵakaŵapa vyakukhumbikwa ŵabali na ŵadumbu ŵawo aŵa. Kweni kasi ntchivichi chikakhumbikwanga kuti ŵabali aŵa ŵawelereso ku vikaya vyawo? Mubali munyake zina lake Agustín wakuti, “Tikaŵavya ndalama zakukwana kuti tisange loya, ndipo tikamanyanga yayi uko tingaluta kuti ŵakatovwire pa nkhani iyi.”

 Pakuti wanangwa wa kusopa wa ŵabali ŵithu ukaŵa pa ngozi, ofesi ya munthavi ya Central America yikachitapo kanthu mwaluŵiro. Chakwamba, ŵakapempha ŵamazaza ŵa mu chigaŵa ichi kuti ŵafufuze milandu iyi. Chachiŵiri, ŵakazomerezgeka na Komiti Yakulongozga ya Wupu Wakulongozga wa Ŵakaboni ŵa Yehova kuti ŵagwire ntchito lumoza na Dipatimenti ya vya Malango ku likuru lithu, pakulemba dandauro ku khoti lakuyowoya vya ŵabali na ŵadumbu ŵithu ŵa mtundu wa Huichol. Mulandu uwu ukaluta ku Khoti Likuru Lakuwona Vyaurunji, ilo ni khoti likuru chomene ku Mexico.

 Maloya ghakufuma mu vyaru vyakupambanapambana ghakanozgekera mwakukwana nkhani iyi ndipo ghakati nga umo ŵanthu ŵakuchindikira mitheto ya ŵanthu ŵa mu vigaŵa vyakutali ivi, ndimoso ŵanthu ŵa mu vigaŵa ivi ŵakwenera kuchindikira wanangwa wa munthu waliyose uyo wakukhala mu vigaŵa vyawo. Munthu waliyose wali na wanangwa vilije kanthu kuti kwali wakukhala nkhu.

 Pa July 8, 2020, Khoti Likuru Lakuwona Vyaurunji likadumura mulandu uwu, ndipo likaŵikira kumanyuma Ŵakaboni ŵa Yehova. Likati wose awo ŵakachimbizgika, ŵakwenera kuweleraso ku vikaya vyawo. Agustín, uyo tangumuzunura kukwambilira, wakuyowoya umo iyo na ŵanyake ŵakajipulikira: “Tikuwonga chomene kweniso ndise ŵakukondwa chifukwa cha ivyo ŵabali ŵatichitira. Ŵalekenge kutovwira, mphanyi palije icho tachitapo.”

 Pasono, ŵabali ŵithu ku San Juan de Ilumán, muzi unyake ku Ecuador uwo mukukhala ŵanthu ŵanandi ŵa mtundu wa Otavalo Valley, nawo ŵakusangana na suzgo lakuyana waka. Mu 2014, ŵakamba kuzenga Nyumba ya Ufumu ŵati ŵazomerezgeka na ŵamazaza. Ndipouli, wasembe munyake wakadangilira gulu linyake la ŵanthu ŵakujumpha 100 kuti ŵalekeske ntchito ya kuzenga iyi. Kufuma apo, ŵakaŵalekeska Ŵakaboni ŵa Yehova ŵa mu chigaŵa ichi kuti ŵawunganenge pamoza.

 Madipatimenti gha vya malango ku ofesi ya munthavi ya Ecuador na ku likuru lithu ghakagwira ntchito lumoza pakuvikilira wanangwa wa kusopa wa ŵabali ŵithu ŵa mu mpingo uwu. Ŵabali ŵakaluta na nkhani iyi ku khoti. Ivi vikapangiska kuti ŵanthu ŵa mu chigaŵa ichi ŵaleke kutambuzga ŵabali na kuzomerezga kuti ŵambireso kuwungana pamoza kweniso kumalizga ntchito yawo ya kuzenga Nyumba ya Ufumu. Kweni kuti vyanthena ivi vizakaleke kuchitikaso kunthazi, awo ŵakatiyimiliranga pa mulandu uwu ŵakapempha makhoti ghakurughakuru kuti ghadumure nkhani yakuzirwa chomene yakuti: Kasi ŵanthu ŵa mu vigaŵa vyakutali ivi nawo ŵakwenera kuchindika wanangwa uwo munthu wali nawo?

 Pa July 16, 2020, Khoti la vya Malango ku Ecuador, ilo ni khoti likuru chomene mu chigaŵa ichi, likategherezga mulandu uwu. Ŵabali awo ni maloya ku Ecuador ndiwo ŵakayimira mpingo uwu. Ŵabali ŵanyakeso ŵanayi awo ŵagwira ntchito ya uloya kwa nyengo yitali, ndiwo ŵakalongosora nkhani iyi ku khoti. Chifukwa cha muliri wa COVID-19, ŵabali aŵa ŵakaŵa mu vyaru vyakupambana ndipo ŵakayowoyeskananga kwizira pa videoconference. Aka nkhakwamba kuti khoti lizomerezge maloya agho ghakwimira Ŵakaboni ŵa Yehova pa charu chose kugwiliskira ntchito nthowa iyi. c Ŵabali aŵa ŵakalongosolera khoti kuti lipulikiske fundo yakuti ŵanthu awo ŵakukhala ku vigaŵa vyakutali ŵangaleka yayi kuŵa na wanangwa uwo munthu waliyose wakwenera kuŵa nawo chifukwa waka chakuti mba mtundu unyake.

 Ŵabali ŵithu ŵa mtundu wa Otavalo Valley ŵakulindilira waka ivyo Khoti la vya Malango lidumurenge. Pasono ŵabali aŵa ŵakuwonga chomene chifukwa cha wovwiri uwo ŵali kupokera. César, uyo ni mulara mu mpingo wa Ilumán Quichua, wakuti: “Yehova pera kwizira mu gulu lake, ndiyo wangachitira vinthu vinandi nthena ŵanthu ŵachoko waka.”

 Maloya ghose agho ghakawovwirapo pa milandu iyi Mbakaboni ŵa Yehova, ndipo ghakukondwa kovwirapo kwawanangwa. Kweni nipera, pakukhumbikwa nyengo na ndalama kuti ŵalembe, kunozgekera, na kuluta nayo ku khoti milandu iyi. Maloya ghithu na ŵabali ŵanyake ŵakumalira maora ghakujumpha 380 kuti ŵanozgekere milandu iyi kweniso ghanyake ghakujumpha 240 kuti ŵang’anamure vinthu ivyo ŵamudumbiskana ku khoti la ku Mexico. Pafupifupi maloya 40 ghakufuma mu vyaru vyakupambanapambana ghakamalira maora ghanandi chomene pa mulandu wa ku Ecuador. Kasi ntchivichi chikutovwira kuti tifiske kulipira vyakukhumbikwa vyose pakuvikilira wanangwa wa kusopa wa ŵabali ŵithu? Ntchifukwa cha vyawanangwa vinu ivyo mukupeleka kwizira mu nthowa zakupambanapambana izo zili pa donate.pr418.com Tikumuwongani chomene chifukwa cha mtima winu wakupa.