“Wupu Wakulongozga wadumura kuti mwakukolerana na malango agho boma lililose laŵika, chingaŵa chiwemi kuti mipingo yose yambireso kuchita maungano maso na maso kwambira mu sabata ya April 1.” Chipharazgo ichi chikaŵikika pa jw.org kukwambilira kwa mwezi wa March 2022, ndipo Ŵakaboni ŵa Yehova pa charu chose ŵakakondwa nacho chomene. Kweni muliri wa COVID-19 undamare. a Ntheura ni vinthu wuli ivyo vyasintha, kweniso ivyo vikukhumbikwa, kuti ŵabali na ŵadumbu ŵaŵenge ŵakuvikilirika ku muliri uwu para ŵawungana pamoza? Pamanyuma pa vyaka viŵiri kwambura kuwungana maso na maso, kasi Nyumba za Ufumu zichali ziwemi kuti tingachitiramo maungano?

 Ŵabali ŵakanozgekera kwa myezi yinandi kuti tambeso kuchitira maungano mu Nyumba za Ufumu.

 Pati pajumpha mwezi umoza pera kufuma apo tikalekera kuwungana maso na maso mu 2020, Dipatimenti ya Vyakuzenga pa charu chose iyo yili ku Warwick, New York, yikamba kuwona umo tikhwaskikirenge na muliri wa COVID-19 pa nkhani ya kuchitira maungano mu Nyumba za Ufumu, kweniso kuwona ivyo vingawovwira kuti malo ghithu gha maungano ghaŵe ghakuvikilirika.

 Vinthu ivyo vingaŵa vyakukhumbikwa ku vigaŵa vinyake vikuŵa vyakupambana chomene na ivyo vikukhumbikwa kunyake. Matthew De Sanctis, uyo ngwa mu Dipatimenti ya Vyakuzenga pa charu chose wakuti: “Mu vyaru vinyake, chinthu icho chikusuzga chomene ntchakugezerapo mu mawoko. Usange pa Nyumba ya Ufumu palije maji gha mu mipopi, ŵabali ŵakwenera kukagura panji kukateka mu madambo panji mu visimi. Apo mu vyaru vinyake boma likakhumbanga kuti ŵanthu ŵasinthe vinthu vinyake nga nkhusanuzga vindangazi vya nyumba kuti mphepo zinjirenge mwakukwana kweniso kuŵika vikhwangwani vyakuyowoya vya utozgi kuti ŵanthu ŵaŵe na umoyo uwemi na wakuvikilirika.”

 Kasi ŵabali ŵithu ŵakachita wuli kuti ŵamarane na masuzgo agha? Matthew wakuti: “Ŵabali ŵakasanga kuti vinthu vipusu, vyakutchipa vingawovwira pa Nyumba za Ufumu zinandi.” Mwachiyelezgero, ku Papua New Guinea, ŵali kunozga vyakugezerapo mu mawoko, ni mapelu ghakukwana maji malita 20, ndipo ghali na mipopi. Ntheura ŵabali ŵithu ŵakafiska kusanga vyakugezeramo mu mawoko ivyo vikakhumbikwanga pa Nyumba ya Ufumu iyo yili ku chigaŵa cha ku mizi na ndalama zakukwana madola gha ku America 40 pera. Kweni Nyumba za Ufumu ku Africa, vyakugezera mu mawoko viwemi chomene vyakujumpha 6,000 vili kugulika kufuma ku wamalonda munyake ku Asia.

 Vinyake ivyo vyasintha pa Nyumba za Ufumu, nkhunozgaso panji kuŵika mawindo na vinthu ivyo vikovwira kuti mphepo zinjirenge mwakukwana mukati na chilato chakuti muŵenge mphepo ziwemi zinandi. Mu mipingo yinandi ŵali kugura mayikirofoni gha vikolelero vitali mwakuti munthu wakudomekako waka mulomo pakuzgora kwambura kuvikora na mawoko. Kweniso ŵabali ŵakuwoneseska kuti malo agho ghakukoreka pafupipafupi nga ni vijaro ghakupuputika na munkhwala wakukoma majeremusi. Mu mipingo yinyake, ku vimbuzi ŵakuŵikangako mipopi iyo yikufumiskanga yekha maji na kujaraso kwambura munthu kukorako. Ku Chile, kuti vinthu vyose ivi viŵepo pa Nyumba ya Ufumu yiliyose, pakakhumbikwiranga ndalama zakukwana madola gha ku America 1,400.

 Apo tikuyezgayezga kuti Nyumba za Ufumu ziŵe na vinthu vyakukhumbikwa kuti ŵanthu ŵaŵe ŵakuvikilirika, ŵabali ŵakuŵikapo mtima kuti vyawanangwa vileke kusakazika waka. Mwachiyelezgero, mu vyaru vinyake para ŵagulenge vyakugezeramo mu mawoko panji mayikirofoni gha vikolelero vitali, boma likukhizgako msonkho pa katundu uyo wagulikenge. Maofesi gha munthavi ghakakolerana kuti ghagulenge katundu munandi pa nyengo yimoza na chilato chakuti ŵagure mwakutchipa ndipo ndalama zileke kusakazika. Kanandi waka maofesi gha Munthavi na Dipatimenti ya Kugura Katundu pa charu chose, ŵakukolerananga kuti ŵagure katundu ku makampani agho ghakupanga. Ivi vikawovwira kuti ndalama zileke kusakazika kweniso kuti katundu wakafike luŵiro uko watumizgikenge.

 Ndondomeko yakuti pa Nyumba ya Ufumu paŵe vinthu vyakukhumbikwa kuti ŵanthu ŵaŵe ŵakuvikilirika, yawovwira kuti ŵabali awo ŵambaso kuwungana maso na maso ŵajiwonenge kuti mbakuvikilirika. Mudumbu Dulcine, wa ku Peru, wakati wakaŵa na “tuwofi pachoko” wati wapulika kuti tambengeso kuwungana mu Nyumba za Ufumu. Wakati: “Muliri wa COVID-19 wati wamba waka, nane nkhasangika nayo nthenda iyi. Ntheura nkhachitanga wofi kuluta ku Nyumba ya Ufumu chifukwa nkhawopanga kuti matenda agha ghanganikoraso kachiŵiri. Kweni nati nafika ku Nyumba ya Ufumu, nkhawona kuti ŵabali ŵaŵika kale nthowa zose zakujivikilira ku matenda agha, nga nkhuŵa na chakugezerapo mu mawoko na munkhwala wakukomera mabakiteriya, mayikirofoni ghavikolelero vitali, kweniso ndondomeko yakutozga makora malo pambere maungano ghandambe na para ghamara. Vyose ivi vikanovwira kuti nijiwone kuti ndine wakuvikilirika pakuti ndivyo nkhakhumbanga.” b

 Sara, mudumbu wa ku Zambia, wakasangana na suzgo lakupambanako. Wakuti: “Mu myezi iyo yajumpha, mfumu wane wali kufwa na COVID-19. Nkhajifumbanga umo vinthu vizamuŵira kwa ine para tambaso kuwungana maso na maso kwambura iyo.” Kasi sono wakujipulika wuli? Sara wakuti: “Kuchita maungano maso na maso ntchilongolero chakuti Yehova wali nase mu nyengo zaumaliro izi. Ntheura kuluska kumanyuma kose uku, apa ndipo nkhakhozgeka chomene, nkhawona chitemwa kweniso chivikiliro kufuma ku ŵabali ŵalara na ku ŵabali kweniso ŵadumbu ŵane wose.”

 Ŵabali ŵithu ŵakutemweka pa charu chose chapasi mbakukondwa kuŵaso na mwaŵi wa kuwungana maso na maso mu Nyumba za Ufumu. Tikuwonga chomene vyawanangwa vinu, ndipo ŵanandi mwa imwe mukupeleka vyawanangwa vinu kwizira pa donate.pr418.com. Vyawanangwa ivi vikovwira kuwoneseska kuti malo ghithu ghakusoperapo ghaŵe ghawemi na ghakuvikilirika.