“Ni kale viŵi yayi, apo tikawonanga kuti ntchakusuzga chomene kupokera chakurya chauzimu kwizira pa Intaneti.” Kasi mukukolerana nagho mazgu agha? Mazgu agha chikaŵa chigaŵa cha nkhani yakukhozga iyo wakayowoya Mubali Geoffrey Jackson mu Lipoti Lakufuma ku Wupu Wakulongozga la 2020 #6. Iyo wakalutilizga kuti: “Kweni pasono, mu nyengo ya muliri iyi, tikumanya yayi kuti manyi mphanyi tachitanga wuli tiŵavyenge vinthu nga ni JW Library. Yehova watovwiranga mu vyaka vyose ivi, kuti tinozgekere vinthu ivyo vizamuchitika mu nyengo yakusuzga yakuŵa nga ni iyi.”

 Kasi Yehova watinozgekereskanga wuli? Kasi ni ntchito wuli iyo yikachitika kuti ŵapange JW Library app, ndipo ntchivichi chikukhumbikwa kuti JW Library app yilutilire kugwira makora ntchito?

 Mu May 2013, Wupu Wakulongozga ukaphalira dipatimenti ya MEPS Programming ku likuru lithu la pa charu chose, kuti yipange app iyo yiŵe na Baibolo la kunozgekaso la Mang’anamuliro gha Charu Chiphya. Paul Willies uyo wakuteŵetera ku dipatimenti ya MEPS Programming wakati: “Kuzakafika chaka ichi, tikaŵa kuti tindafumiskepo app ya pa foni ku app stores. Kweni tikakhazikiska timu ndipo tikayimiska dankha milimo yinyake kuti tigwire ntchito na madipatimenti ghanyake kuti tipange app na kuwona vinthu ivyo vingaŵamo. Kanandi tikalombanga ndipo na wovwiri wa Yehova, app iyi yikafumiskika pa ungano wa pa chaka pati pajumpha waka myezi 5!”

 Suzgo linyake ilo likaŵapo likaŵa lakuti tipange app iyi kuti yiŵe layibulare nadi mwakuti yiŵe na mabuku, mavidiyo kweniso yiŵe na viyowoyero vinandi. Kuzakafika mu January 2015, mabuku ghithu ghanandi gha Chingelezi ghakaŵa kuti ghamba kusangika mu app iyi ndipo pakati pajumpha myezi 6 ŵanthu ŵakambapo ku dawuniloda mabuku na mavidiyo mu viyowoyero vinyake vinandi.

 Kufuma waka panyengo iyo, ŵabali ŵithu ŵanozga app iyi munthowa zakupambanapambana; ŵasazgirapo mavidiyo, ŵaŵika mabuku ghose na mavidiyo gha pa maungano pa chigaŵa chimoza, kweniso ŵanthu ŵangawona maliferensi mu Buku Lakupenjera Nkhani kufuma pa vesi ilo ŵarenga mu Baibolo.

 Zuŵa lililose, JW Library yikujulika pa vinthu ya tekinoloje vyakujumpha 8 miliyoni kweniso pa vinthu vya tekinoloje vyakujumpha 15 miliyoni mwezi uliwose! Ntchivichi chikukhumbikwa kuti app iyi yigwirenge makora ntchito pa vinthu ivi? Mubali Willies wakulongosora kuti: “App ya pa foni yikumarapo yayi kunozgeka. Nyengo zose tikugwira ntchito kuti tisazgirepo vinthu vinyake viphya kweniso kupanga app iyi kuti yiŵe yakovwira chomene na yambura kusuzga kuyigwiliskira ntchito. Chifukwa chakuti nthowa yakugwiliskira ntchito vinthu vya pa Intaneti yikupangika apudeti kanandi waka, nase nyengo zose tikukhumbikwira kusintha app iyi kuti yikolerane na vinthu vyasono ivyo vyasintha. Kweniso tikukhumbikwira kunozga na kupanga apugiredi software yithu chifukwa cha mabuku kweniso vinthu vyakujambulika ivyo vikulutilira kusazgikira pa JW Library.” Para tasazga pamoza viyowoyero vyose, pasono pa JW Library pali mabuku pafupifupi 200,000 kweniso vinthu vyakujambulika vyakuchita kutegherezga waka na mavidiyo vyakujumpha 600,000!

 Kuti app iyi yilutilire kugwira makora ntchito, pakukhumbikwira vinthu vinandi padera pa makomupyuta pera. Tikukhumbikwiraso kulipira mapurogiramu (software licenses) ghanyake gha pa kompyuta. License yimoza ŵakulipira madora 1,500 gha ku America pa chaka chimoza. Kweniso ŵa MEPS Programming ŵakulipira madora gha ku America pafupifupi 10,000 chaka chilichose ku makamupani agho ghakupanga vinthu vya tekinoloje kuwoneseska kuti app iyi yilutilire kugwira makora ntchito pa makomupyuta ghaphya, matabuleti, na mafoni.

 Chifukwa cha app ya JW Library tikunanga ndalama zichoko pa nkhani ya kupurinta, kupanga mabuku, na kutumizga mabuku agha ku malo ghakupambanapambana. Mwachiyelezgero, ghanaghanirani tumabuku twa Kusanda Malemba Zuŵa na Zuŵa. Mu 2013 tikapurinta tumabuku twa Kusanda Malemba Zuŵa na Zuŵa pafupifupi 12 miliyoni. Kweni mu 2020, tikapurinta tumabuku utu pafupifupi 5 miliyoni nangauli ŵapharazgi pafupifupi 700,000 ŵakasazgikira pa charu chose. Chifukwa wuli paŵa kusintha uku? Ntchifukwa chakuti pasono ŵabali na ŵadumbu ŵithu ŵanandi ŵakuŵerenga lemba la zuŵa pa JW Library. a

 JW Library yikutovwiraso munthowa zinandi. Geneviève, uyo wakukhala ku Canada, wakuwona kuti chifukwa cha app iyi vikumovwira kuti nyengo zose wasambirenge payekha. Iyo wakulongosora kuti: “Kuyowoya unenesko, viŵenge kuti nkhuwunjika dankha mabuku ghose pamoza agho nkhukhumba kuti nisambire, nkhukayika usange mphanyi nkhusambira mulenji uliwose. Kweni chifukwa cha app iyi, nkhunyamura waka tabuleti yane ndipo nkhuŵa na vyose ivyo nkhukhumba. Chifukwa chakuti nyengo zose nkhusambira, chipulikano chane chakhora chomene kweniso nili paubwezi uwemi na Yehova.”

 App ya JW Library yawovwira chomene mu nyengo ya muliri wa COVID-19 iyi. Charlyn, wa ku United States, wakulongosora kuti: “Chifukwa cha muliri wa COVID-19 uwo wakhwaska charu chose, chaka chajumpha sono nindapokerepo mabuku ghithu ghakuchita kupurinta. Kweni chifukwa cha JW Library, tili na vyose ivyo tikukhumbikwira kuti chipulikano chithu chilutilire kuŵa chakukhora, ndipo nkhumuwonga chomene Yehova chifukwa chakutipa chawanangawa ichi.”

 Ŵanthu ŵanandi ŵakujipulika nga ni Faye uyo wakukhala ku Philippines. Iyo wakuti: “Nkhugwiliskira ntchito App yakovwira chomene iyi kuti nilutilire kuŵa paubwezi wakukhora na Yehova. Ndiyo nkhuŵerenga para kwacha waka mulenji. Ndiyo nkhutegherezga apo nkhugwira ntchito za pa nyumba. Ndiyo nkhugwiliskira ntchito para nkhusambira vinthu vya pa maungano. Ndiyo nkhugwiliskira ntchito para nkhunozgekera sambiro lane la Baibolo. Nkhuwonelera mavidiyo pa app iyi para nili na m’pata. Nkhuŵerenga nkhani panji Baibolo pa app iyi para nili pa mzere nkhulindilira chinthu chinyake. App iyi njakuzirwa chomene.”

 App iyi njakuzirwa chomene mu uteŵeti. Mwachiyelezgero, apo wakaŵa mu uteŵeti, mudumbu munyake ku Cameroon wakakhumbanga kugwiliskira ntchito lemba ilo wakawona mudumbu munyake wakagwiliskira ntchito masabata ghachoko waka agho ghakaŵa kuti ghajumphapo. Kweni wakaŵa kuti waluwa vesi lake. Iyo wakuti: “Mwamwaŵi, nkhakumbuka mazgu ghanyake gha mu vesi ilo. Nkhajura app ya JW Library, nakuluta pa Baibolo, na kulemba mazgu agho nkhakumbuka gha mu vesi ilo. Mwaluŵiro, nkhalisanga lemba ilo nkhakhumbanga. Para nkhugwiliskira ntchito app ya JW Library, nkhusanga mavesi ghanandi agho nyengo zinyake nkhuŵa kuti naluwa.”

 Vyawanangwa vinu ivyo mukupereka kwizira munthowa zakupambanapambana izo zili pa donate.pr418.com vyawovwira kuti tipange app ya JW Library, tiyipwelelere na kuyinozga mwakuti ŵabali na ŵadumbu ŵithu pa charu chose ŵalutilire kuyigwiliskira makora ntchito. Tikumuwongani chomene chifukwa cha mtima winu wakupereka mwawanangwa.

1. October 2013—App yikafumiskika ndipo yikaŵa na Baibolo la kunozgekaso la Mang’anamuliro gha Charu Chiphya

2. January 2015—Mabuku ghanyake gha Chingelezi ghakamba kusangika pa app iyi, ndipo pamanyuma mabuku gha mu viyowoyero vinandi ghakamba kusangikaso

3. November 2015—Tunthu twakushedera tukaŵikikapo

4. May 2016—Chigaŵa cha maungano chikaŵikikapo

5. May 2017—Chigaŵa chakulembapo manosi chikaŵikikapo

6. December 2017—Pakaŵikika ulongozgi wa Study Bible

7. March 2019—Mwaŵi wakudawuniloda vinthu vyakutegherezga waka vyakuchita kujambura, kuwonelera vidiyo (stream video), kweniso pakaŵikika Buku Lakupenjera Nkhani kuti munthu waŵe na mwaŵi wakuwona maliferensi

8. January 2021—Pakaŵikika vinthu vyakukhwaskana na buku la Mungakondwa na Umoyo Kwamuyirayira