Yehova wakutemwa kusambizga ŵanthu ŵake. Ntheura gulu lake lakhazgikiska masukulu ghakupambanapambana agho ghakovwira ŵasambiri kuchita makora milimo yawo. Yimoza yake ni Sukulu ya Ŵapharazgi ŵa Ufumu (SKE). Mu vyaka vyasonosono apa, gulu la Chiuta laŵikako mahara chomene pa nkhani ya malo agho pakuchitikira masambiro agha padera pa masambiro agho ŵasambiri ŵakupokera. Chilato chikuru ntchakuti gulu likukhumba kuŵa na malo ghawemi ghakusambilirapo. Kasi vyawanangwa vinu vikovwira wuli kuti ivi vichitike?

 Kwa vyaka vinandi masukulu gha gulu la Yehova ghakachitikiranga mu Nyumba za Ufumu kweniso pa Malo Ghakuchitirapo Maungano. Kweni chifukwa wuli tikuzenga na kunozgaso malo ghanandi ghakuchitirapo masukulu? Wonani vifukwa vitatu ivi.

 Pakukhumbikwa ŵabali na ŵadumbu ŵanandi. Mubali Christopher Mavor uyo ni movwiri mu Komiti ya Uteŵeti ya Wupu Wakulongozga wakayowoya kuti: Maofesi gha Munthavi ghakutiphalira kuti pakukhumbikwa ŵabali na ŵadumbu ŵanandi mu dera lawo kuti ŵawovwire pa mulimo wa Yehova. Mwachiyelezgero, mu 2019, ofesi ya munthavi ku Brazil yikayowoya kuti pakukhumbikwa ŵabali na ŵadumbu pafupifupi 7,600 awo ŵamalizga sukulu ya SKE kuti ŵakawovwirepo pa milimo yinyake mu chigaŵa cha ofesi yawo ya munthavi.” Ofesi ya munthavi ya ku United States yikayowoya kuti pakukhumbikwa ŵapayiniya ŵanandi ŵakwenelera awo ŵangasambizga ŵanji pa umo ŵangachitira upharazgi wa ku malo uko kukusangika ŵanthu ŵanandi, kupharazga ku malo ghakukwelera sitima, kweniso ku jele. Pakukhumbikwaso ŵabali ŵanandi awo ŵangateŵetera mu Dipatimenti Yakuwona vya Mapulani na Kuzenga kweniso mu Makomiti Yakuwona vya Chipatala. Awo ŵamalizga masambiro gha SKE ŵangawovwira kugwira ntchito izi.

 Pali ŵanandi ŵakukhumba kusambira sukulu. Mu ma ofesi ghanandi gha munthavi ŵakupokera chiŵelengero chikuru cha ŵabali na ŵadumbu awo ŵakukhumba kunjira sukulu kuluska awo ŵakukhumbikwa kunjira sukulu iyi. Mwachiyelezgero, mu chaka chimoza pera, ofesi ya munthavi ya Brazil yikapokera mafomu 2,500 gha ŵabali na ŵadumbu awo ŵakukhumba kunjira sukulu ya SKE. Kweni chifukwa chakuti malo ghakuchitirapo sukulu ngachoko, ofesi ya munthavi yikasankhapo waka ŵabali na ŵadumbu 950.

 Malo ghawemi ghakugona. Para masambiro agha ghakuchitikira pa Nyumba ya Ufumu kweniso pa Malo Ghakuchitirapo Ungano, kanandi ŵasambiri ŵakugona ku nyumba za ŵabali na ŵadumbu. Ndondomeko iyi yikwenda makora mu vyaru ivyo kukuchitika makilasi ghanandi yayi pa chaka. Kweni ku malo uko kukuchitika makilasi ghanandi pa chaka chikuŵa chakusuzga ku ŵabali na ŵadumbu kupokelera ŵalendo kwa nyengo yitali. Pa chifukwa ichi, nyumba zakugona zikunozgeka kufupi na malo uko kukuchitikira sukulu ndipo chilato chake ntchakuti ŵasambiri ŵakhalengemo pa nyengo ya sukulu.

 Pakumalira ndalama zinandi za madola gha ku America kuti pazengeke kilasi lakusambiliramo kweniso nyumba yakugonamo ŵasambiri pafupifupi 30, na ŵasambizgi ŵawo kweniso vinthu vinyake.

 Kanandi sukulu zikuŵa ku malo ghambura chiwawa, pataliko na tawuni yikuru kweniso ku malo agho mendero ngambura kusuzga. Kanandi ŵakusankha ku malo uko kuli ŵapharazgi ŵanandi awo ŵangawovwirapo pa vinyake na vinyake vya pa sukulu kweniso kunozga ivyo vyanangika.

 Pa malo agha pakuŵanga malayibulare, malo ghakuŵerengerako, makompyuta, vyakupulintira, na vinyake vyantheura. Kweniso kanandi pakuŵangaso chipinda chakulyeramo icho ŵasambiri na awo ŵakusambizganga ŵakulyeranga pamoza chakurya. Pakuŵangaso malo ghanyake agho ŵabali na ŵadumbu ŵakuchitirangako maseŵera ghakukhozga thupi kweniso vinthu vinyake vyakukondweska.

 Chipinda chakusambiliramo chikunozgeka mwapadera. Troy uyo ngwa mu Dipatimenti Yakuwona vya Mapulani na Kuzenga ku Warwick, New York, wakayowoya kuti: “Tikufumbanga ulongozgi ku Dipatimenti ya Sukulu za Uteŵeti kuti yitovwire umo tinganozgera makilasi kuti ghaŵe malo ghawemi kusambiliramo. Ŵabali ŵakutipa ulongozgi pa nkhani ya umo makilasi ghakwenera kuŵira, kweniso umo tingaŵikira magesi, vyakukuzgira mazgu na vyakuwoneskera mavidiyo.” Pa nkhani ya umo ŵangaŵikira vyakukuzgira mazgu, Mubali Zoltán, uyo ni msambizgi wa sukulu ya SKE ku Hungary, wakayowoya kuti: “Pakwamba tikaŵavya mayikolofoni yiliyose, ntheura kanandi tikaŵakumbuskanga ŵasambiri kuti ŵayowoyenge mwakukwezga mazgu. Kweni pasono suzgo ili lili kumara chifukwa pa desiki lililose pali mayikolofoni.”

 Kasi malo ghaphya agho ghazengeka ghakovwira wuli ŵasambiri na ŵasambizgi? Angela, uyo wakasambirako sukulu ya SKE ku Palm Coast, Florida, U.S.A wakayowoya kuti: “Ni malo ghawemi chomene ghamtende. Chilichose chikuŵa chakunozgeka makora, kusazgapo makilasi na vipinda vyakugona. Ivi vikutovwira kuŵika maghanoghano ghithu pa ivyo tikusambira kweniso kuŵerenga.” Csaba, uyo ni msambizgi ku Hungary, wakuwonga chomene mwaŵi wakulyera lumoza chakurya na ŵasambiri. Iyo wakayowoya kuti, “panyengo ya chakurya ŵasambiri ŵakufwatuka chomene kuyowoya umo vinthu viliri kwa iwo kweniso ivyo vili kuŵachitikirapo. Ivi vikovwira kuti tiŵamanye makora. Ntheura tikwamba kuŵasambizga mwakuyana na umo vinthu viliri kwa iwo.”

 Ŵasambiri pamoza na ŵasambizgi ŵawo ŵakuwona malo agho pakuchitikira sukulu kuŵa thumbiko lakufuma kwa Msambizgi withu Mukuru, Yehova. (Yesaya 30:20, 21) Mudumbu munyake wa ku Philippines uyo wakanjira sukulu ya SKE pa malo agho ghanozgekaso wakayowoya kuti: “Malo agho tikuchitirapo sukulu iyi ghakutikumbuska kuti ndise ŵasambiri kweniso ŵalendo ŵapadera ŵa Yehova. Iyo wakukhumba kuti tikondwenge apo tikusambira Mazgu ghake mwakupwelelera.”

 Malo ghaphya chakuchitirapo sukulu ghakuzengeka, kweniso kunozgekaso chifukwa cha vyakupeleka vinu ndipo vinandi mwa vyakupeleka ivi mukupeleka pa donate.pr418.com. Tikumuwongani chomene chifukwa cha vyawanangwa ivyo mukupeleka.