Matimu ghanandi agho ghakugwira ntchito yakung’anamura, ghakugwilira ntchito yawo ku maofesi ghakung’anamulirako mabuku ndipo ghachoko waka ndigho ghakugwilira ku maofesi gha minthavi. Chifukwa wuli ndondomeko iyi njakovwira chomene? Kasi awo ŵakuchita ntchito ya kung’anamura ŵakukhumbikwira vinthu wuli kuti ŵachite makora mulimo wawo ku maofesi ghakung’anamulirako mabuku agha? Ndipo kasi chigaŵa icho kuli maofesi agha chikukhwaska wuli ntchito ya awo ŵakung’anamura?

 Maofesi ghakung’anamulirako mabuku ghakuŵa ku chigaŵa icho ŵanthu ŵanandi ŵakuyowoya chiyowoyero icho. Karin, uyo wakuchitako mulimo wa kung’anamura mu chiyowoyero cha Chilow German wakuti: “Kufuma waka apo tikasamira kuno ku ofesi yakung’anamulirako mabuku ku Cuauhtémoc, Chihuahua, Mexico, nyengo zose tikuyowoya Chilow German na awo tikugwilira lumoza ntchito ya kung’anamura, ŵanthu mu upharazgi kweniso para taluta kukagura vinthu ku msika. Tingati waka nyengo zose tikuŵa pakati pa ŵanthu awo ŵakuyowoya chiyowoyero chithu. Tikuŵapulika ŵanthu ŵakuyowoya vinthanguni ivyo tikavipulikapo ni kale chomene, ndipo chikuŵa chipusu kumanya umo ŵanthu ŵakuyowoyera pasono.”

 James, uyo wakuchitako mulimo wa kung’anamura mu chiyowoyero cha Chifrafra ku Ghana, wakuti nyengo zinyake wakuŵasoŵa ŵabali awo ŵakaŵa lumoza ku ofesi ya munthavi. Kweni wakutiso: “Nkhukondwa kuteŵetera pa ofesi yakung’anamulirako mabuku. Nkhujipulika makora mu mtima para nkhupharazga mu chiyowoyero chane na kuwona umo ŵanthu ŵakuchitira para ŵapulika uthenga uwemi.”

 Kasi ŵabali ŵakuchita wuli kuti ŵasankhe makora malo agho kungaŵa ofesi yakung’anamulirako mabuku? Joseph uyo wakuteŵetera mu Dipatimenti ya Mapulani na Kuzenga ya pa Charu Chose ku Warwick, New York, U.S.A wakati: “Suzgo limoza ilo tikukumana nalo ndakuti ku vigaŵa vinyake kukuŵavya magesi ghakugomezgeka panji maji, nanga yingaŵa Intaneti yakovwira kuti ŵapokerenge vinthu ivyo vikukhumba kung’anamurika. Ntheura para tikusankha malo agho kuŵenge ofesi yakung’anamulirako mabuku, tikusanda dankha vigaŵa vyakupambanapambana ivyo kukuyowoyeka chiyowoyero icho.”

 Kuyowoya unenesko, nthowa yaluŵiro chomene kweniso yakutchipa pakuzenga maofesi ghakung’anamulirako mabuku, ni para tagwiliskira ntchito malo ghakuchitiramo maungano ghakurughakuru, Nyumba ya Ufumu, panji nyumba izo kukakhalanga ŵamishonale. Awo ŵakuchita mulimo wa kung’anamura ŵakuchita waka kwendera kuluta kukagwira ntchito ku malo agha. Para vyose ivi palije, nyengo zinyake ŵabali ŵakuzomerezgeka kugura maofesi panji nyumba zakuzengeka kale kuti awo ŵakuchita mulimo wa kung’anamura ŵakhalengemo na kugwiliramo ntchito yawo. Para vinthu vinyake vyasintha, chikuŵa chipusu kuguliska nyumba izo na maofesi ndipo ndalama zake zikugwiliskirika ntchito pa vinthu vinyake vyakuzirwa chomene.

 Mu chaka cha uteŵeti cha 2020, tagwiliskira ntchito ndalama zakukwana madola 13 miliyoni gha ku America kuti ntchito iyo yikuchitika mu maofesi ghakung’anamulirako mabuku yilutilire kwenda makora. Awo ŵakuchita mulimo wa kung’anamura ŵakukhumbikwira makompyuta, mapulogiramu ghapadera gha mu kompyuta, vyakujambulira mazgu, Intaneti na vinthu vinyake vyakukhumbikwa chomene. Mwachiyelezgero, kuti munthu yumoza waŵe na kompyuta na mapulogiramu ghake mumo, pakukhumbikwa ndalama pafupifupi madola 750 gha ku America. Mu makompyuta agha mukuŵa pulogiramu yinyake iyo tikuchita kugura kweniso na yinyake yakuchemeka Watchtower Translation System. Pulogiramu iyi yikovwira awo ŵakuchita mulimo wa kung’anamura kuti ŵagwirenge makora ntchito yawo kweniso kuti ŵavisangenge mwaluŵiro ivyo ŵakupenja pa ntchito yawo.

 Awo ŵakuchita mulimo wa kung’anamura ŵakupikaso vinthu ivyo vikuŵawovwira kuti ŵajamburenge mazgu mu maofesi mwawo. Vinthu vyakujambulira mazgu ivi vikawovwira chomene apo muliri uwu wa COVID-19 ukambanga. Vili nthena chifukwa chikaŵa chipusu kuti ŵanandi awo ŵakuchita mulimo wakung’anamura ŵalute navyo ku nyumba kwawo na kulutilira kujambura vinthu vyakutegherezga na mavidiyo uku ŵali ku nyumba.

 Ŵanyake awo ŵakujipeleka kanandi ŵakovwirapo mwa kuweleramo ivyo vyang’anamurika, kweniso kunozga maofesi agha. Cirstin, uyo wakuteŵetera pa ofesi yakung’anamulirako mabuku ya Chiafrikaans ku Cape Town, South Africa wakuti: “Ŵapharazgi ŵanandi kweniso ŵapayiniya ŵanyengozose ŵali na mwaŵi wa kugwiliskira ntchito maluso ghawo kuno.”

 Awo ŵakujipeleka ŵakukondwa chomene na ivyo ŵakuchita. Mudumbu munyake uyo wakovwirapo milimo yinyake pa ofesi yakung’anamulirako mabuku wakuti kugwira ntchito ku malo agha ntchinthu chakukondweska chomene kweniso chakukhozga. Ŵabali na ŵadumbu ŵanyake nawo ŵakovwirapo pa kuyowoya mazgu gha mu mavidiyo na vinthu vyakutegherezga waka. Juana, uyo wakuchita mulimo wa kung’anamura mu Chitotonac ku Veracruz, Mexico, wakuti: “Pakuti sono tili kufupi na matawuni agho ghakuyowoya chiyowoyero chithu, ntchipusu chomene kuti ŵabali na ŵadumbu ŵanandi ŵawovwirepo pa mulimo wa kujambura mazgu gha mu vinthu vyakutegherezga waka na mavidiyo ghithu.”

 Kweni kasi maofesi ghakung’anamulirako mabuku ghawovwira kuti ntchito ya kung’anamura yendenge makora chomene? Ŵanthu ŵanandi awo ŵakuŵerenga mabuku ghithu ŵakuti enya ghawovwira. Cédric uyo wakovwirapo pa mulimo wa kung’anamura mu Chikongo ku Democratic Republic of Congo, wakuti: “Kumanyuma uku, ŵabali na ŵadumbu ŵanyake ŵakayowoyanga kuti ivyo tikung’anamura tikugwiliskira ntchito ‘Chikongo cha m’mabuku ghithu,’ chifukwa chikapambananga chomene na icho ŵanthu ŵakayowoyanga. Kweni pasono, ŵakuyowoya kuti mabuku ghithu ghali kung’anamurika mu Chikongo icho ŵanthu ŵakuyowoya nadi pasono.”

 Andile, uyo wakovwirapo pa mulimo wa kung’anamura mu Chixhosa, nayo wali kupulikapo ŵanthu ŵakuyowoya fundo yakuyana waka ku South Africa. Iyo wakuti: “Ŵanthu ŵanandi ŵakutiphalira kuti ŵakuwona kusintha pa ivyo tikung’anamura. Nanga ŵangaŵa ŵana awo ŵakatemwanga kuŵerenga Gongwe la Mulinda la Chingelezi pasono ŵakuŵerenga la Chixhosa. Iwo ŵakutemwaso chomene Baibolo lakunozgekaso la Mang’anamuliro gha Charu Chiphya chifukwa likupulikikwa makora.”

 Ndalama zose izo zikugwira ntchito pa kuzenga, kunozga, kweniso kovwilira awo ŵakugwira ntchito ya kung’anamura zikufuma pa vyawanangwa ivyo ŵanthu ŵakupeleka mwakukhumba kwawo, kusazgapo ivyo vikupelekeka kwizira pa donate.pr418.com.