Baibolo likayowoyerathu kuti mu mazuŵa ghithu ghano kuzamuŵa nkhondo, vindindindi, miliri, na vinyake “vyakofya.” (Luka 21:10, 11) Mazgu gha uchimi agha ghakalutilira kufiskika mu chaka cha uteŵeti cha 2022. a Mwachiyelezgero, nkhondo ya ku Ukraine yikulutilira kuchitika, ndipo yikakhwaska ŵanthu mamiliyoni ghanandi. Kweniso ŵanthu pa charu chose ŵachali kusuzgika chifukwa cha masuzgo agho ghakaŵapo chifukwa cha muliri wa COVID-19. Kweniso ŵanthu ŵanandi chomene ŵali kukhwaskika na masoka ghachilengiwa, nga vindindindi ku Haiti na vimphepo vyakofya ku Central America, ku Philippines, ndiposo kumwera kwa mafumiro gha dazi kwa Africa. Kasi Ŵakaboni ŵa Yehova ŵakawovwira wuli awo ŵakakhwaskika?

 Mu chaka cha uteŵeti cha 2022, gulu lithu likapeleka wovwiri ku ŵanthu awo ŵakakhwaskika na masoka ghachilengiwa pafupifupi 200! Ndipo ndalama zose izo tikagwiliskira ntchito pakovwira ŵanthu awo ŵakakhwaskika zikakwana madola pafupifupi 12 miliyoni. b Wonani umo ndalama izo ŵabali na ŵadumbu ŵakapeleka zikagwilira ntchito pakovwira awo ŵakakhwaskika na masoka ghachilengiwa ghaŵiri.

 Pa August 14, 2021, chindindindi chikuru chikachitika kumwera kwa charu cha Haiti. Chachitima ntchakuti ŵabali ŵithu ŵatatu ŵali kufwa, ŵadumbu ŵaŵiri na mubali yumoza. Awo ŵakapona ŵakapwetekeka kweniso ŵakasuzgikanga maghanoghano chifukwa cha chindindindi ichi. Mubali Stephane wakuti: “Mu tawuni yithu yose, ŵanthu ŵanandi ŵakafwa mwakuti sabata yiliyose ŵakasunganga nyifwa zinandi kwa myezi yakujumpha yiŵiri.” Mubali munyake Éliézer, wakuti: “Ŵakaboni ŵanandi ŵakaŵavya malo ghakukhala, vyakuvwara, skapato, na vinthu vinyake vyakukhumbikwa pa umoyo. Kwa myezi yinandi, ŵanthu ŵanandi chomene ŵakakhalanga mwa wofi chifukwa cha vindindindi vinyake ivyo vikalutilira kuchitika.”

 Gulu lithu likachitapo kanthu mwaluŵiro chomene. Ofesi ya munthavi ku Haiti yikapeleka chakurya chakujumpha matani 53, mathenti, malona, matiresi, na masora ghakutchajira ma foni. Kweniso mu chaka cha uteŵeti cha 2022, nyumba zakujumpha 100 zili kuzengekaso panji kunozgeka waka. Ndipo ndalama zakujumpha madola 1 miliyoni ndizo zikagwira ntchito pakovwira ŵanthu awo ŵakakhwaskika na masoka ghachilengiwa.

 Ŵabali na ŵadumbu ŵithu ŵakuwonga chomene. Lorette wakuti: “Chindindindi ichi chikasakazirathu nyumba yithu ndipo bizinesi yithu yikatimbanizgika. Tikaŵavya chakuti tingarya. Kweni gulu la Yehova likatovwira chomene, likatipa chilichose icho tikakhumbikwiranga.” Micheline wakuti: “Chindindindi chikananga nyumba iyo nkhakhalangamo ine na ŵana ŵane ŵaŵiri. Nkhamanyanga yayi chakuti nichite padera pa kulomba kwa Yehova kuti wanovwire, ndipo wakanizgora kwizira mu gulu lake. Sono tili na nyumba yakuzengeka makora chomene iyo tikukhalamo. Nili wakukhumbisiska kuchita chilichose icho ningafiska kuti nilongore kuti nkhumuwonga chomene Yehova.”

 Ŵalaraŵalara ŵa boma ŵakawona ivyo tikachita pakovwira ŵanthu awo ŵakakhwaskika na masoka. Mulara uyo wakulaŵilira tawuni ya L’Asile wakayowoya kuti: “Nkhumuwongani chomene chifukwa mukawovwirapo mwaluŵiro. Nkhumuwonganiso chifukwa mukulongora kuti mukuchindika ŵalara ŵaboma. Nili wakukondwa chomene kuwona kuti mukukhumba kusangirapo ndalama yayi. Kweni mukukhumba waka kovwira ŵanthu. Mukuchita vyose ivi chifukwa cha chitemwa.”

 Pa January 24, 2022, Chimphepo Chankhongono cha Ana chikananga vinthu ku Mozambique ndipo chikajumphilira m’paka cha kumanjiliro gha dazi kwa Malawi. Chimphepo ichi chikaŵa chakofya chomene ndipo chikiza na vula yankhongono, chikachimbiranga makilomita 100 pa ora limoza. Chikawiska mapolo gha magesi, mabuliji, kweniso chikapangiska kuti maji ghasefukire.

 Chimphepo ichi chikakhwaska Ŵakaboni ŵakujumpha 30,000 ku Malawi na ku Mozambique. Charles, mubali uyo wakawovwirapo pa ntchito yakovwira para kwachitika masoka wakayowoya kuti: “Nati nawona masuzgo agho ŵabali ŵakasangana nagho kweniso vinthu ivyo ŵakataya, nkhaŵa na chitima chomene ndipo nkhasoŵa na chakuchita.” Vinthu vikaŵa paheni chomene chifukwa vyakurya kweniso mbewu izo ŵakapanda, vyose vikaluta na maji. Ŵanandi nyumba zawo zikanangikirathu. Chachitima ntchakuti mubali munyake, muwoli wake wali kufwa pamoza na ŵana ŵake ŵaŵiri ŵasungwana, boti ilo ŵakakwera kuti ŵaponeremo lati labira.

 Chimphepo ichi chikaŵa chakofya chomene. Ku Nchalo ku Malawi, mbumba ya Sengeredo yikapulika kupoma kwa maji cha m’ma 1 koloko usiku wa mulenji. Milonga yiŵiri yikatutuka chomene! Mubali Sengeredo wakaghanaghana vyakuchimbirapo waka pa nyumba yawo. Ivyo wakachita vikaŵa vyakwenelera chifukwa nyengo yichoko waka maji ghakawiska nyumba. Katundu wawo wakanangika kweniso wakayegheka na maji. Mbumba iyi yikasankha kuchimbilira ku Nyumba ya Ufumu, ndipo kufuma pa nyumba yawo ni mtunda wa maminiti 30. Kweni pa zuŵa ili, ŵakenda maora ghaŵiri. Ŵakafika pa Nyumba ya Ufumu ŵakuzumbwa kweniso ŵakavuka chomene, kweni ŵakafika makora.

 Ofesi ya munthavi ku Malawi na ku Mozambique, mwaluŵiro ghakamba kuchitapo kanthu kovwira ŵanthu awo ŵakakhwaskika. Ŵakamanyiska ŵalaŵiliri ŵadera na ŵalara mu mpingo kuti ŵawone vinthu ivyo vikukhumbikwira ku ŵabali na ŵadumbu awo ŵakakhwaskika kweniso kuŵakhozga. Pakasoreka Makomiti Ghakovwira Para Kwachitika Masoka kuti ghawovwire pa ntchito yakovwira ŵabali ŵithu, ndipo mwaluŵiro makomiti agha ghakamba kupeleka chakurya na vinthu vinyake vyakukhumbikwa. Ndalama zakujumpha madola 33,000 zikagwira ntchito kovwilira ŵanthu ndipo zinyake zakujumpha madola 300,000 zikagwira ntchito pakunozga na kuzenga nyumba izo zikanangika.

 Makomiti Ghakovwira Para Kwachitika Masoka ghakugwiliskira ntchito ndalama mwakupwelelera chomene, ndipo ivyo ŵakachita vikaŵa vyakwenelera chifukwa cha kukwera mitengo kwa vinthu. Mwachiyelezgero, mu myezi 7 yakwamba, mtengo wa ufu wa ngoma ku Malawi ukakwera na maperesenti pafupifupi 70. Mafuta nagho ghakakwera chomene. Kuti paleke kusakazika ndalama zinandi, ŵabali ŵakaguranga vyakurya na vinthu vyakuzengera mu charu chawo ndipo ŵakaguranga vinandi pa nyengo yimoza. Ntheura ŵakaŵakhizgirangako mitengo kweniso pakunyamura katundu wakasankhanga galimoto zakutchipirako.

 Ntchito yakovwira ŵanthu para kwachitika masoka ghachilengiwa yikaŵakhwaska chomene ŵabali na ŵadumbu. Felisberto, mubali wa ku Mozambique wakayowoya kuti: “Nindawonepo gulu ilo likupeleka vinthu vinandi nthena: nga vyakuzengera, vyakwendapo, ŵanthu ŵakugwira ntchito, chakurya, kweniso ulongozgi wachitemwa. Wovwiri uwo ukapelekeka ukaŵa chiyelezgero chiwemi chomene ku ŵabali chomenechomene pa nkhani ya chitemwa icho Yesu wakayowoya pa Yohane 13:34, 35.” Ester, mudumbu uyo ni chokoro ku Malawi uyo nyumba yake yikanangikirathu, wakati: “Nkhasoŵa chakuchita chifukwa nkhaŵa na ndalama yichoko chomene mwakuti mphanyi nkhafiska yayi kuzenga nyumba yinyake. Kweni ŵabali ŵakati ŵiza na kunizengera nyumba yinyake, nkhajipulika nga nanjira kale mu Paradiso.”

 Apo tili pafupi kunjira mu charu chiphya, tikulindizga kuti tiwonenge masoka ghachilengiwa ghanandi. (Mateyu 24:7, 8) Nangauli vili nthena, tikuwonga chomene chifukwa cha mtima winu wakupa ndipo tili na chigomezgo chose kuti ŵanthu ŵa Yehova ŵapokerenge wovwiri uwo ŵakukhumbikwira. Nthowa za umo mungapelekera ndalama zikulongosoreka makora pa donate.pr418.com. Tikuwonga chomene chifukwa cha mtima winu wakupa.