Mwezi uliwose tikukhumbisiska kuwonelera mapulogiramu na mavidiyo agho ghafumiskika pa JW Broadcasting. Ndipouli, ŵabali ŵithu ŵanandi ku Africa ŵalije mwaŵi wakuwonelera mapulogiramu agha pa Intaneti. Chifukwa wuli?

 Mu vigaŵa vinandi ku Africa mulije Intaneti. Ndipo uko yikusangika, yikuŵa yankhongono viŵi yayi panji yikudura chomene. Mwachiyelezgero, mulaŵiliri wadera ku Madagascar wakapanga dawunilodi pulogiramu ya JW Broadcasting ya mwezi unyake ku malo ghanyake uko kukuŵa Intaneti. Wakalipira ndalama zakukwana madola 16, izo ni ndalama zinandi kuluska izo ŵanthu ŵanyake ŵakusanga pa sabata yimoza! a

 Nangauli pali masuzgo ghose agha, kweni pasono ŵanthu mamiliyoni ghanandi ku Africa ŵangawonelera JW Broadcasting kwambura Intaneti. Mu nthowa wuli?

 Kufuma mu 2017, JW Broadcasting yikuŵikika pa tchanelo cha satellite pa TV kuti awo ŵakukhala ku sub-Sahara Africa ŵaŵe na mwaŵi wakuwonelera. Tchanelo ichi ntchaulere, ndipo chikuwoneka kwa maora 24, kwa sabata yose, mu viyowoyero 16.

 Kuti ivi vichitike, Ŵakaboni ŵa Yehova ŵakulipira kuti mapulogiramu ghawo ghawonekenge pa tchanelo ichi. Tchanelo cha pa satellite icho ŵakugwiliskira ntchito chikuwoneka mu vyaru pafupifupi 35 ku sub-Sahara Africa. Ŵakulipira ndalama zakujumpha madola 12,000 pa mwezi. Nyengo na nyengo, ŵakulipiraso tchanelo chinyake ndalama zakusazgikira kuti ŵawoneske mapulogiramu agho ghakuchitika nyengo yeneyiyo. Ivi vikovwira kuti ŵanthu masauzandi ŵawonelere maungano gha chigaŵa panji mapulogiramu ghapadera kweniso para ku ofesi ya munthavi kwiza mulendo uyo wafuma ku ofesi yithu yikuru.

 Ŵanthu ŵanandi, na awo Mbakaboni ŵa Yehova yayi, ŵakuwonelera tchanelo cha JW pa satellite uku ŵali kunyumba kwawo. Ndipouli, ŵabali ŵithu ŵanandi ŵangafiska yayi kugura ivyo vikukhumbikwa kuti ŵawonelere tchanelo ichi pa satellite. Kuti ŵawovwirike, Nyumba za Ufumu zakujumpha 3,670 zili kupika vinthu ivyo vikukhumbikwira kuti ŵabali na ŵadumbu ŵawonelerenge tchanelo ichi cha JW Broadcasting kwenekuko. Vyose ivyo vikukhumbikwa, na thirasipoti vikukwana madola pafupifupi 70 para Nyumba ya Ufumu yili kale na TV panji projector. Para yilije, vyose vyakukhumbikwa vikukwana pafupifupi madola 530.

 Ŵabali na ŵadumbu ŵithu ŵakuwonga chomene chifukwa cha tchanelo ichi. Mulara munyake ku Cameroon wakuti: “Vili nga tili pakati pa chipalamba ndipo tapokera mana.” Odebode, uyo ni mubali ku Nigeria, wakuti: “Tikuwonelera tchanelo ichi katatu pa sabata nga ni mbumba. Ŵana ŵane ŵakukondwa chomene ndipo nyengo zose ŵakulindilira mwakunweka nyengo iyo tikuwonelera tchanelo ichi. Nyengo zinyake ŵakuchita kupempha kuti tijure tchanelo cha JW.” Rose, uyoso ngwa ku Nigeria, wakuti: “Ndine wakukondwa kuti tchanelo cha JW pa satellite chanjira m’malo mwa matchanelo gha nkhani agho nkhatemwanga kuwonelera. Para nawonelera nkhani, nkhakhwaskikanga chomene na ivyo nawona ndipo BP yikakweranga. Kweni tchanelo cha JW Broadcasting ntchakukhozga chomene ndipo mtima wane ukuŵa m’malo para nkhuwonelera! Ni tchanelo cha pa mtima kwa ine. Ntchawanangwa chapadera chomene chakufuma kwa Yehova.”

 Mulaŵiliri wadera ku Mozambique wakati mu chigaŵa chake, Nyumba za Ufumu zili na ivyo vikukhumbikwa kuti ŵabali ŵawonelerenge tchanelo ichi. Ŵabali ŵa mu mipingo iyi ŵakwizanga mwakutendekera, ora limoza panji kujumphirapo pambere nyengo yindakwane, kuti ŵazakawonelere JW Broadcasting kwizira pa satellite.

 Pa ungano wa mitundu yose wa mu 2019 ku Johannesburg, South Africa, ŵakagwiliskira ntchito tchanelo ichi kuti ŵawoneske nkhani zikuruzikuru, kweniso izo zikayowoyeka na mubali wa mu Wupu Wakulongozga, ku vigaŵa vinyake 9. Sphumelele, uyo ngwa mu Broadcasting Department ku ofesi ya munthavi ya South Africa, wakati: “Pakwamba tikawoneskanga nkhani kwizira pa Intaneti. Kweni kuti viyende pakakhumbikwanga Intaneti yankhongono kweniso kulipira. Tchanelo cha JW pa satellite ntchaulere kweniso chakugomezgeka.”

 Vyawanangwa vinu vyakovwira pa ntchito ya pa charu chose ivyo mukupeleka, vikovwira kuti ŵabali na ŵadumbu ŵithu ŵanandi ku Africa ŵawonelere tchanelo cha JW Broadcasting kwizira pa satellite. Tikumuwongani chomene chifukwa cha vyawanangwa ivyo mukupeleka kwizira mu nthowa zakupambanapambana izo zili pa donate.pr418.com.