Gongwe la Mulinda la Juni 1, 1912, likati: “Vingachitika kuti ŵanthu ŵanandi awo ŵakuŵerenga mabuku ghithu, ŵakumanya ŵanthu awo mbambura kuwona. Nawo ŵangaŵa na mabuku agho ŵangaŵerenga makora . . . . Mabuku gha ŵanthu ŵachibulumutira ghakupulintika mu vilembo vya ŵanthu ŵambura kuwona mwakuti nawo ŵangaŵerenga.” Gongwe la Mulinda ili likayowoyaso kuti: “Ŵanthu ŵanandi ŵambura kuwona ŵakuwonga chomene kupulika uthenga wakuti pa charu chapasi pizenge vitumbiko viwemi.”

 Apo mazgu agha ghakalembekanga, vyaru vyakupambanapambana ivyo vikayowoyanga Chingelezi vikaŵa na nthowa zakupambana zakulembera vilembo vya ŵanthu ŵambura kuwona panji kuti braille. Ndipouli, panyengo iyo Ŵakaboni ŵa Yehova ŵakaŵa kuti ŵali kale na mabuku ghakukhwaskana na unenesko wa mu Baibolo mu “vilembo vya ŵanthu ŵambura kuwona” panji kuti braille. Ndipo m’paka sono tichali nagho! Pasono tikupanga mabuku mu vilembo vya ŵanthu ŵambura kuwona mu viyowoyero vyakujumpha 50. Kasi tikuchita wuli?

 Chinthu chakwamba icho chikuchitika nkhusintha malemba kuti ghaŵe mu vilembo vya ŵanthu ŵambura kuwona panji kuti braille. Michael Millen uyo wakuteŵetera mu dipatimenti Yakuwona vya Kulemba ku Patterson, New York, wakati: “Kale, tikagwiliskiranga ntchito pulogiramu yapakompyuta yakusinthira malemba kuti ghaŵe mu braille iyo tikachitanga kugura, kweni pulogiramu iyi yikakoranga yayi kugwiliskira ntchito pa viyowoyero vyose ivyo tikukhumba. Pasono tikugwiliskira ntchito pulogiramu yapakompyuta yakuchemeka Watchtower Translation System, iyo yikovwira kusintha malemba gha viyowoyero vinandi chomene ivyo vikuyowoyeka pa charu chapasi kuŵa mu vilembo vya ŵanthu ŵambura kuwona. Nkhugomezga kuti palije pulogiramu yakuyana na iyi kulikose.”

 Padera pa mazgu agho ghali mu buku la Braille, pakuŵaso mazgu ghakulongosora vithuzi ivyo vili mu buku. Mwachiyelezgero, chithuzi cha pa chikopi cha buku la Mungakondwa na Umoyo Kwamuyirayira! chili kulongosoreka kuti: “Mwanalume wakwenda munthowa yakuzgombazgomba iyo mumphepete mwake muli vyakumera vyakutowa, tuvikwezga na mapiri.” Jamshed uyo ni muteŵeti wakovwira kweniso mupayiniya wambura kuwona, wakati: “Mazgu ghakulongosora vithuzi agha, ngakuzirwa chomene kwa ine.”

 Para malemba ŵaghasintha kuŵa mu vilembo vya braille, mafayero ghakutumizgika ku ofesi ya munthavi kuti ŵakapange mabuku gha braille. Para vyafika, vilembo ivi ŵakuviŵika pa mapepara ghakomi agho ghangadoroka yayi panji kukonyeka para ŵakupanga mabuku. Kufuma apo, ŵakusazga pamoza mapeji ghose, kupanga buku, ndipo paumaliro ŵakutumizga ku mipingo pamoza na mabuku ghanyake gha nyengo zose panji kutumizga ku positi ofesi usange yikupokera mabuku gha “ŵanthu ŵambura kuwona kwaulelere.” Para ntchakwenelera, minthavi yingagwiliskira ntchito nthowa yaluŵiro chomene yakutumizgira mwakuti ŵabali na ŵadumbu ŵambura kuwona ŵasange mabuku agho ghakukhumbikwa kuti ŵagwiliskire ntchito pa maungano gha mpingo.

 Ntchito yose iyi yikukhumbikwira nyengo yinandi kweniso ndalama. Mwachiyelezgero, ofesi yithu yakupurintirako mabuku ku Wallkill, New York, nyengo iyo yikumalira pakupanga Mabaibolo 50,000 agho tose tikugwiliskira ntchito yikuyana waka na nyengo iyo yikumalira pakupanga waka Mabaibolo ghaŵiri gha braille. Pali mavoliyumu 25 mu Baibolo la Chingelezi la Braille, ndipo vinthu ivyo vikukhumbikwira kuti tifumiske mavoliyumu agha ni vyakukwera mtengo maulendo 123 kujumpha ivyo vikukhumbikwa kuti tifumiske waka Baibolo ilo tose tikugwiliskira ntchito. Kuti tipange waka vikopi vya seti yimoza ya mavoliyumu 25 pakukhumbikwira ndalama pafupifupi madora 150 gha ku America.

 Kasi awo ŵakovwirapo pakupanga mabuku mu vilembo vya braille ŵakujipulika wuli na ntchito yawo iyo ŵakuchita? Nadia, uyo wakuteŵetera ku ofesi ya munthavi ya ku South Africa wakuti: “Ŵabali na ŵadumbu ŵithu ŵachibulumutira panji awo ŵakusuzgikira kuwona umoyo ngupusu yayi kwa iwo, ntheura nkhuwona kuti ni thumbiko kupanga chinthu chinyake icho chingaŵawovwira. Uwu mbukaboni wakuti Yehova wakuŵatemwa chomene.”

 Kweni wuli usange munthu uyo ngwachibulumutira wakumanya yayi kuŵerenga vilembo vya braille? Vyaka vichoko waka ivyo vyajumpha, tikafumiska kabuku kakuti Learn to Read Braille (Sambirani Umo Mungaŵerengera Vilembo vya Braille) ako kakaŵa na vilembo vya braille kweniso mazgu ghakulembeka. Kali kupangika munthowa yakuti munthu wakuwona na wachibulumutira wose ŵangagwiliskira ntchito. Kabuku aka kali na chigaŵa icho munthu wachibulumutira wangagwiliskira ntchito pakulemba vilembo vya braille. Uyo wakusambira braille wakugwiliskira ntchito sileti na phesulu ivyo vili kupangikira ŵanthu ŵachibulumutira kuti wapange yekha chilembo chilichose chakukhwaskana na braille. Para nyengo zose wakuchita ivi, vikumovwira uyo wakusambira kuti wakumbukenge chilembo chilichose cha braille ndiposo vikovwira kuti wamanyenge ivyo vilembo ivi vikung’anamura para wavikhwaska waka.

 Kasi ŵabali na ŵadumbu awo mbachibulumutira panji ŵakusuzgikira kuwona ŵakupindura wuli na mabuku agha? Ernst uyo wakukhala ku Haiti, wakalutanga ku maungano gha mpingo, kweni wakaŵavya buku lililose la mu vilembo vya braille. Ntheura wakagomezganga waka chomene pakusungilira vinthu pa mtima kuti wakayowoye nkhani ya mu sukulu ndiposo kuzgorapo pa nkhani ya mafumbo na mazgoro pa maungano. Iyo wakuti: “Kweni pasono, nkhuwuska woko na kuzgorapo nyengo yiliyose. Kuyowoya unenesko nkhujipulika kuti nili pamoza na ŵabali na ŵadumbu ŵane. Tose tikupokera chakurya chauzimu chakuyana!”

 Jan wa ku Austria uyo wali na suzgo lakuwona kweniso ni mulara ndiposo wakuchitiska sambiro la Gongwe la Mulinda na Sambiro la Baibolo la Mpingo wakati: “Mabuku ghithu ghakupulikikwa makora chomene kuluska mabuku ghanyake gha mu vilembo vya braille agho nili kuŵerengapo. Mwachiyelezgero, mapeji ghali na manambara, ntchipusu kusanga mazgu ghamusi kweniso mabuku ghithu ghali na mazgu ghakulongosora vithuzi.”

 Seon-ok ni mupayiniya ku South Korea, ndipo ngwachibulumutira kweniso wakumangwa. Kumanyuma uku wakathembanga waka chiyowoyero chamawoko chakuchita kukhwaskana pa maungano, kweni pasono wakukwaniska kuŵerenga yekha Baibolo la braille. Iyo wakuti: “Mabuku ghanyake gha mu vilembo vya braille ngakusuzga chomene kuŵerenga chifukwa tumadoti tunyake pakuŵavyanga, mizere yikuŵa yakunjilirananjilirana, panji pepara likuŵa likomi yayi. Kweni Ŵakaboni ŵa Yehova ŵakugwiliskira ntchito mapepara ghawemi chomene kweniso tumadoti tukuŵa tukuru makora, ndipo ivi vikupangiska kuti chiŵe chipusu kwa ine kuŵerenga.” Kweniso wakasazgirapo kuti: “Kumanyuma uku, nkhasambiranga mabuku ghakuyowoya vya Baibolo na wovwiri wa ŵanthu ŵanyake. Ndipouli pasono, ningaŵerenga mabuku agha panekha. Vikunikondweska chomene kuti nkhukwaniska panekha kunozgekera maungano gha mpingo na kutoramo chigaŵa mwakukwana. Nkhuŵerenga mabuku ghithu ghose gha mu vilembo vya braille. Mabuku agha ‘naghazgoŵera chomene’ mwakuti ningakhala yayi kwambura kughaŵerenga.”

 Nga umo ghaliri mabuku ghithu ghose, mabuku ghithu gha mu vilembo vya braille nagho ghali na mazgu agha: “Buku ili ndakuguliska yayi. Chilato chake nkhovwira ŵanthu pa charu chose kuti ŵasambire Baibolo, ndipo ŵanthu ŵakovwirapo na vyawanangwa.” Tikumuwongani chomene chifukwa cha kovwirapo na vyawanangwa vinu mwakugwiliskira ntchito nthowa izo zili pa donate.pr418.com. Chifukwa cha mtima winu wakupa vikovwira kuti tiŵe na chakurya chauzimu ku ŵanthu wose, kusazgapo ŵachibulumutira kweniso awo ŵali na suzgo lakuwona.