Wupu Wakulongozga ukukhumbisiska chomene kugwiliskira ntchito vyawanangwa ivyo ŵanthu ŵakupeleka kuzengera vinthu ivyo vingawovwira pa mulimo wakupharazga. Mwachiyelezgero, mu chaka cha uteŵeti cha 2023, Dipatimenti yakuwonelera mulimo wa vyakuzenga, yikagwiliskira ntchito ndalama zakujumpha madola 500 miliyoni gha ku America kuti yigulire, kuzengera kweniso kunozgera Nyumba za Ufumu na Malo Ghakuchitirapo Maungano. a Ndalama izi zikusazgapo ndalama izo mipingo ya Ŵakaboni ŵa Yehova pa charu chose yikagwiliskira ntchito pakupwelelera Nyumba za Ufumu.

 Ndalama izo ŵanthu ŵakupeleka zikugwiraso ntchito pakuzenga na kupwelelera maofesi gha munthavi pa charu chose agho ghakovwira kuti ntchito yakupharazga yilute panthazi. Tachepeskako ntchito zinyake pa maofesi gha munthavi na chilato chakuti ndalama zinandi ziwovwirenge pa mulimo wakuzenga na kunozgaso Nyumba za Ufumu kweniso Malo Ghakuchitiramo Maungano. Ndipouli pakukhumbikwaso ndalama zinandi kuti tipwelelere, kunozga kweniso kuzengaso maofesi gha munthavi. Chifukwa wuli ntchito izi ni zakuzirwa? Kasi maofesi gha munthavi ghakovwira wuli ntchito yakupharazga? Tiyeni tiwone.

 Maofesi ghanandi gha munthavi ghakhala vyaka vyakujumpha 30 panji 40. Nicholas, uyo wakuteŵetera mu Dipatimenti Yakuwona vya Mapulani na Kuzenga ya pa charu chose wakuti: “Nanga ni nyumba izo zikupwelelereka makora nazo zikunangika para pajumpha nyengo. Ntheura tikunozgaso panji kusintha pulani kuti zilutilire kugwira ntchito.”

 Maofesi gha munthavi nagho ghakukhumbikwira kusintha kuti ghakolerane na ivyo vikukhumbikwa. Chiŵelengero cha ŵapharazgi chasazgikira chomene pa charu chose kufuma waka apo maofesi ghanandi gha minthavi ghakazengekera. Ntheura pakukhumbikwa ŵanthu ŵanandi ŵakujipeleka kuti ŵakateŵetere pa maofesi agha. Nakuti maofesi agho pakwamba ghakakwananga makora, pasono ghakuchepa.

 Chinthu chinyake icho tikughanaghanirapo chomene ntchivikiliro. Apo tikusendelera ku umaliro nkhanira wa charu chiheni ichi, tikukumana na vinthu vinandi chomene ivyo vikuŵika umoyo withu pangozi nga masoka ghachilengiwa. (Luka 21:11) Ntheura para tikunozga panji kuzengaso tikulondezga nthowa ziphya zakuzengera, ivi vikovwira kuti awo ŵakuteŵetera pa malo agha ŵaŵe ŵakuvikilirika. Padera pakovwira pa mulimo wakupharazga, ku malo agha ndiko ŵabali na ŵadumbu ŵakuchimbilirako para kwachitika masoka gha chilengiwa kweniso ghakulutilira kovwira pa mulimo wakupharazga pamanyuma pakuti soka lachitika.

 Mu chaka cha uteŵeti cha 2023, Wupu Wakulongozga ukazomerezga kuti ntchito yakuzenga kweniso kunozgaso yichitike mu maofesi gha minthavi ghakukwana 43. Ichi chikung’anamura kuti pafupifupi hafu ya maofesi gha minthavi pa charu chose pakuchitika ntchito yakuzenga na kunozgaso. Wonani viyelezgero vichoko waka ivi, ivyo vikulongora umo mulimo wakuzirwa uwu ukuchitikira.

 Ku Angola. Matt, uyo wali mu Komiti ya Munthavi ku Angola wakuti: “Tikujiwonera tekha umo uchimi wa pa Hagayi 2:7 ukufiskikira. Mu vyaka 10 ivyo vyajumpha, ŵapharazgi mu chigaŵa cha ofesi yithu ya munthavi ŵasazgikira na 60 peresenti. Kuti tovwire makora ŵapharazgi wose aŵa, chiŵelengero cha awo ŵakuteŵetera pa Beteli chikeneranga kusazgikira katatu. Kweni pakuti ofesi yithu njichoko, mbwenu tikachemanga waka ŵanthu ŵachoko waka. Ivi vikapangiskanga kuti ŵabali ŵithu aŵa ŵafyenyekenge na ntchito ndipo nyengo zinandi ŵakagwiranga ntchito kwa maora ghanadi kuluska agho ŵakeneranga kugwira.”

 Ŵabali ŵanyake ŵakatumika kuti ŵakafufuze umo tingamazgira suzgo ili. Pakwamba ŵakawona kuti nthowa yipusu kweniso yakovwira nkhunozgaso waka nyumba izo zikaŵapo kale pa Beteli. Kweni ŵati ŵasanda mwakupwelelera, ŵakawona kuti nthowa iyi, njiwemi viŵi yayi. M’malo mwake, ŵakawona kuti chiwemi ŵagure waka nyumba yinyake iyo yikaŵa pafupi na ofesi na kuyinozga waka. Matt wakati: “Ŵabali ŵakati ŵaphalira Komiti ya Munthavi vyakuti tigure na kunozga waka nyumba iyo yilipo, tikamba kufipa mtima kuti nyumba iyi yingayana yayi na izo zili pa Beteli izo tikuzenga tekha. Kweni pasono tikujiwonera tekha kuti masachizgo agha ghakaŵa ghawemi chomene. Yehova watumbika ivyo tikasankha.”

 Munthazi umu ofesi ya munthavi ya Angola yikwenera kuti yizamukhumbikwira kuti tisazgireko. Kweni nyumba ziphya izo ŵakuzenga sono pa Beteli nizakuti zingasinthikaso na kugwira ntchito zakupambanapambana. Ndipo ofesi yikupangaso renti nyumba zinyake, ivi vikovwira kuti ntchito ya kupharazga yende makora chomene.

 Ku Japan. Nyumba zinandi izo zili pa ofesi ya ku Japan zikazengeka pafupifupi vyaka 40 ivyo vyajumpha, ndipo zinandi mwa nyumba izi zindanozgekepo chomene. Nangauli ŵabali ŵakuzipwelelera kweniso kuzinozga, kweni zakhaliska chomene ndipo zikukhumbikwira kunozgeka mwapadera. Ntheura pasono ŵabali ŵali mukati kunozga ofesi ya ku Japan.

 Kweniso vinthu vinandi pa Beteli vyasintha chomene. Pambere chaka cha 2015 chindakwane, ŵabali ŵa ku khichini ndiwo ŵakaphikanga chakurya cha mulenji, muhanya na mise. Ntheura vipinda vinandi vyakugonamo vya pa Beteli ku Japan vikaŵa na tumakhichini tuchokotuchoko. Sono ŵabali awo ŵakuteŵetera pa Beteli kanandi ŵakuphikanga ŵekha chakurya. Ntheura vipinda vinandi ivyo ŵakunozgaso sono pa Beteli vili na makhichini ndipo ivi vikovwira awo ŵakukhala pa Beteli kuti ŵaphikenge mwambura kusuzga. Mudumbu Kumiko, uyo wakuteŵetera pa ofesi ku Japan wakuti, “Sono nkhujipulika nga nili waka kukaya, nakuti makhichini agha ghanovwira kuti nikhozgerenge na mtima wose ndondomeko ya pa Beteli.”

 Ntchito iyo yikuchitika pa ofesi ya munthavi ya Japan njakuzirwa chomene ku Ŵakaboni ŵa Yehova pa charu chose. (Mateyu 28:19, 20) Ofesi ya Japan njimoza mwa maofesi ghaŵiri agho ghakupulinta Baibolo lose. Ntheura ntchito yinyake yakuzirwa chomene iyo yili mukati nkhuŵika mashini ghakonkha chuvu kuti awo ŵakugwira ntchito ku malo gha kupulintira mabuku agha, ŵaŵe ŵakuvikilirika. Kugura na kuŵikira mashini agha kukukhumbikwa ndalama zakukwana pafupifupi madola 1 miliyoni gha ku America, ivi viwovwirenge kuti mulimo wakusindikizga mabuku uleke kuyima.

 Mulimo wakupulinta Mabaibolo ukayima yayi apo ŵakanozgangaso ofesi iyi. Mubali Trey, uyo wali mu Komiti ya Munthavi ya Japan wakuti: “Apo tikanozganga ofesi iyi, Mabaibolo ghanandi ghakafumiskika mu viyowoyero vyakupambanapambana ndipo mulimo wakupulinta Mabaibolo ukasazgikira chomene pa charu chose. Madipatimenti ghanandi ghakeneranga kugwilira lumoza ntchito mwakukolerana kuti Mabaibolo ghapulintike panyengo yake kweniso kuti ntchito yakuŵika mashini agha yende makora.” Nangauli pakaŵa masuzgo, kweni pakati pa myezi ya March na August 2023, Mabaibolo pafupifupi 220,000 ghakapulintika. Nakuti panyengo iyi, ndipo ntchito yakunozga ku malo ghakupulintira Mabaibolo yikafika pachinyina. Ntchito yose iyi yikamara ndipo yikarya ndalama zinandi chomene yayi.

 Chinthu chinyake icho tikughanaghanira chomene para tikunozgaso malo ni umo tingachitira kuti tileke kugwiliskira ntchito magesi ghanandi. Tambenge kugwiliskira ntchito magesi gha sola, ndipo ivi vitovwirenge kuti chaka chilichose tiponoskenge ndalama zakukwana pafupifupi madola 120,000 gha ku America. Tiŵikengeso mawindo ghaphya agho ghatovwirenge kuti tileke kukhumba magesi ghanandi ndipo ivi vitovwirenge kuti chaka chilichose tiponoskenge ndalama zakukwana pafupifupi madola 10,000. Nangauli vinthu ivi vikhumbenge ndalama zinandi, kweni vitovwirenge kuponoska ndalama zakujumpha pafupifupi madola 3.5 miliyoni gha ku America. Viwovwirengeso kuti malo ghithu ghawonekenge makora.

 Ntchito izo zikuchitika mu maofesi ghaŵiri agha, zikulongora waka umo vinthu ivyo tikuzenga vikovwilira kuti ntchito yakupharazga yilute panthazi. Kweni ntchito yindamare. Mubali Aaron uyo wakuteŵetera mu Dipatimenti Yakuwona vya Mapulani na Kuzenga ya pa charu chose wakuti: “Nangauli tachitapo vinandi kweni pachali ntchito yinandi yakuti yichitike.” Kasi tingafiska wuli mulimo uwu? Aaron wakutiso: “Padera pa vyawanangwa ivyo mukupeleka kuti tizengere vinthu vyose ivi, tikuwongaso chomene ŵabali na ŵadumbu awo ŵakujipeleka mu gulu la Yehova. Wovwiri uwo ŵabali na ŵadumbu imwe mukupeleka mbukaboni wakuti Yehova wakutitumbika nadi.”—Salimo 110:3.

 Kuti mulimo wa kuzenga na kunozgaso wende makora, ukuthemba pa vyawanangwa ivyo ŵabali na ŵadumbu ŵakupeleka, ndipo ŵanandi ŵakupeleka kwizira pa donate.pr418.com. Tikumuwongani chomene chifukwa cha mtima winu wakupa.