Pa 13 January, 2024, Mubali Jeffrey Winder, wa mu Wupu Wakulongozga, wakafumiska Baibolo la Mang’anamuliro gha Charu Chiphya Mateyu-Uvumbuzi mu Chichokwe. Baibolo ili likafumiskika pa ungano wapadera uwo ukachitikira pa ofesi ya munthavi ku Luanda, Angola. Ŵabali na ŵadumbu ŵakukwana 187, ŵakategherezga pulogiramu iyi maso na maso, ndipo ŵanyake ŵakukwana 353,427 ŵakategherezga kwizira pa videoconference. Chiŵelengero ichi chikusazgapo ŵabali na ŵadumbu 1,644 awo ŵakuyowoya Chichokwe. Awo ŵakaŵapo pa ungano uwu ŵakapokera Baibolo la Mateyu-Uvumbuzi lakuchita kupulinta. Ndipo la pa intaneti naloso likamba kusangika kuti ŵanthu ŵachite dawunilodi.

Ŵanthu pafupifupi 3 miliyoni ŵakuyowoya Chichokwe ku Angola, Democratic Republic of the Congo, na Zambia. Pasono ku Angola kuli ŵabali na ŵadumbu ŵakukwana 462 awo ŵakuteŵetera mu mipingo 10 ya Chichokwe. Paliso ŵabali na ŵadumbu ŵanyake ŵakukwana 734 awo ŵakuteŵetera mu mipingo 21 ya Chichokwe ku Democratic Republic of the Congo.

Apo wakadumbanga nkhani yake yakufumiska Baibolo, Mubali  Winder wakayowoya kuti Baibolo la Mang’anamuliro gha Charu Chiphya Mateyu-Uvumbuzi likuzunura zina la Chiuta lakuti Yehova mu malo 237. Mubali munyake wakayowoya kuti: “Lemba la Ŵaroma 10:13 likuyowoya kuti ‘waliyose uyo wakuchema pa zina la Yehova wazamuponoskeka.’ Kweni ma Baibolo ghanyake mu Chichokwe ghakulongosora makora yayi ivyo lemba ili likung’anamura. Ndine wakunweka kugwiliskira ntchito Baibolo la Mateyu-Uvumbuzi kuti novwire ŵanthu kumanya kukolerana uko kulipo pakati pa zina la Yehova na chiponosko. Ichi ntchawanangwa chapadera chomene!”

Tili na chigomezgo chose kuti Baibolo la Mang’anamuliro gha Charu Chiphya Mateyu-Uvumbuzi mu Chichokwe liwovwirenge ŵanthu ŵanandi kumumanya makora Yehova na kumutemwa na mtima wawo wose na nkhongono zawo zose.—Mariko 12:33.