Pa Sabata, November 21, 2021, Mubali Eric Raffaeli, wa mu Komiti ya Munthavi ya Angola, wakafumiska Baibolo la pa intaneti pera la Mang’anamuliro gha Charu Chiphya Mateyu-Uvumbuzi mu Chikimbundu. Ghakuchita kupulinta ghambenge kusangika mu 2022. Pulogiramu ya kufumiska Baibolo ili yikajambulikirathu ndipo ŵanthu pafupifupi 11,000 ŵakawonelera.

Kukwambilira kwa ma 1900, ŵamazaza ŵa boma la Chiphwitikizi ŵakalekeska Chikimbundu, pamoza na viyowoyero vinyake vya ku Africa kuti visambizgikenge mu masukulu. Ndipouli, pasono Chikimbundu chikuyowoyeka na ŵanthu pafupifupi 1.7 miliyoni ku Angola, kusazgapo na ŵanyake awo ŵakukhala mu msumba ukuru wa Luanda. Ntchimoza mwa viyowoyero vikuru mu charu ichi.

Mabuku gha Ŵakaboni ŵa Yehova ghakamba kusangika mu Chikimbundu kwamba kukwambilira kwa ma 1990. Kweni mpingo wakwamba wa chiyowoyero ichi ukapangika mu 2008. Pasono kuli mipingo 55 ya Chikimbundu, ndiposo ŵapharazgi 2,614.

Ku ŵanandi, Baibolo liphya ili ndipusu kupulikiska kuluska ilo likaŵako kale. Mwachiyelezgero, mu Baibolo lakale, lemba la Mateyu 5:3 likang’anamurika kuti: “Mbakutumbikika awo mbakavu mu mzimu.” Apo mu Baibolo la Mang’anamuliro gha Charu Chiphya lili kung’anamulika kuti: “Mbakukondwa awo ŵakumanya kuti ŵakukhumbikwira Chiuta.”

Yumoza uyo wakang’anamurako wakati: “Nkhukayika yayi kuti Baibolo ili ni thumbiko lapadera ku ŵabali ŵithu awo ŵakuyowoya Chikimbundu. Lamuŵawovwira kuti ŵasendelere kwa Yehova apo ŵakuligwiliskira ntchito pa kusambira paŵekha kweniso mu uteŵeti. Nkhuwona kuti ni mwaŵi wapadera kuchitako kachigaŵa kachoko waka pa ntchito yakung’anamura Baibolo ili. Nkhuwona kuti uwu mbukaboni wakuti Yehova wakutitemwa ndipo ngwalusungu.”

Tikumanya kuti Baibolo la mu Chikimbundu ili lovwirenge ŵabali na ŵadumbu ŵithu ŵa chiyowoyero ichi kuti ŵalutilire kovwira ŵakunweka “kupulikiska chisisi chakupatulika cha Ufumu wa Chiuta.”—Luka 8:10.