Ŵateŵeti ŵa pa Beteli ku Argentina ŵamara kusamira mu nyumba iyo ni ofesi ya munthavi yiphya. Awo tikaŵalemba ntchito yakuzenga nyumba iyi ŵakamalizga mulimo wawo mu chihanya mu chaka cha 2021. Kufuma waka panyengo iyi, awo ŵakuteŵetera pa Beteli na awo ŵakovwirapo pa mulimo wakuzenga ŵakulutilira kumalizga tuntchito tunyake tuchokotuchoko uto tukakhalira, nga nkhupakira vinthu vyakukhomakhoma, kutozga malo, upalambara kweniso ntchito yakukhwaskana na vya magesi.

Mu nyumba yiphya iyi muliso maofesi ndipo muli malo ghakugwiliramo ntchito yakukwana 136 kweniso muli vipinda vyakugonamo 98. Kumasinda uku milimo ya pa Beteli yikachitikiranga mu nyumba izo zikaŵa malo ghakupambanapambana. Kweni pasono milimo yose yikuchitikira mu nyumba yimoza. Nyumba iyi yili kuzengeka pa malo agho ngasani masikweya mita 8,524, kuwaro kwa Buenos Aires, uwo ni msumba ukuru wa Argentina.

Mubali Humberto Cairo, uyo ngwa mu Komiti ya Munthavi, wakuti: “Yehova walongora lusungu lwake pa ntchito iyi. Nyumba ziphya izi zikuŵara, chomenechomene kachimanyikwiro ka jw.org.”

Mubali Sebastian Rosso, uyo wakuteŵetera mu Dipatimenti ya Uteŵeti, wakuti: “Nyumba izi ntchawanangwa chakufuma kwa Yehova. Ni malo ghawemi chomene kwa ise. Ise kwithu nkhuwonga waka kuti tili na malo ghakutowa agho ni maofesi ghaphya.”

Tili na chigomezgo chose kuti Maofesi ghaphya agha ghawovwirenge kuti ntchito yende makora kweniso uŵenge ukaboni wakukwana ku ŵanthu ŵa ku chigaŵa ichi ndipo uchindami wose ulutenge kwa Yehova.—2 Midauko 7:1.