Pa December 13, 2019 ku Buenos Aires, Argentina kukachitika ungano wa mitundu yose. Paungano uwu Ŵakaboni ŵa Yehova ŵakapharazga vya kufumiskika kwa Baibolo la Malemba Ghakupatulika Mu Mang’anamuliro Gha Charu Chiphya Mateyu—Chivumbuzi mu chiyowoyero cha mawoko cha ku Argentina. Aka nkhakwamba kuti Baibolo la Malemba Ghachigiriki ling’anamulike mu chiyowoyero cha mawoko cha ku Argentina.

Ntchito yakung’anamura Baibolo yikamba pa December 3, 2014, buku la Mateyu ndilo likamba kung’analimuka. Pakuti mabuku gha mu chiyowoyero cha mawoko ghakuŵa mu vidiyo, usange buku limoza la mu Baibolo lamara kung’anamulika likaŵikikanga pa JW Library Sign Language app.

Kuyana na kafukufuku munyake, ŵanthu pafupifupi 400,000 ŵachiyowoyero cha mawoko cha ku Argentina ŵakugwiliskira ntchito JW Library Sign Language app. Paliso ŵapharazgi pafupifupi 2,700 awo ŵakugwiliskira ntchito chiyowoyero cha mawoko cha ku Argentina ndipo pa ŵapharazgi aŵa 470 mbakumangwa. Mudumbu Laura Losada, uyo ngwakumangwa ndipo wakuchimanya makora chiyowoyero cha mawoko cha ku Argentina, wakuti: “Ndine wakukondwa ndipo nkhumuwonga chomene Yehova chifukwa cha lusungu lwake. Kale apo nkhaŵavya Baibolo mu chiyowoyero ichi, nkhaŵikangapo mtima kuŵazga Baibolo la Chisipanishi kweni nkhapulikiskanga yayi ivyo nkhaŵazganga. Kweni Baibolo liphya ili ndakupulikikwa makora, ndipo nkhuwona kuti ubwezi wane na Yehova ngwakukhora chomene.”

Ŵabali na ŵadumbu awo ŵakugwiliskira ntchito chiyowoyero cha mawoko cha ku Argentina ŵakuwonga chomene Yehova chifukwa cha Baibolo lakupulikikwa makora ili, ilo liŵawovwirenge kuti ŵaŵe na chipulikano chakukhora. Tili na chigomezgo chose kuti Baibolo liphya ili, liwovwirengeso ŵapharazgi kuti ŵawovwire ŵanthu ŵanandi ŵakumangwa ku Argentina kuti ŵaŵe ŵabwezi ŵa Chiuta.—Milimo 13:48.