Pa April 6, 2024, Mubali Jeffrey Winder wa mu Wupu Wakulongozga wakajulira ofesi yiphya ya munthavi ku Buenos Aires, ku Argentina. Ŵabali na ŵadumbu pafupifupi 500 ŵakaŵapo pa mwambo wakujulira uwu ndipo ŵakakhala mu vipinda vitatu vya mu nyumba yiphya ya pa Beteli. Ndipo ŵabali na ŵadumbu ŵanyake ŵakukwana 5,844 awo ŵakawungana ku Malo Ghakuchitirako Ungano kufupi na tawuni ya Ezeiza ŵakategherezga pulogiramu iyi kwizira pa videoconference. Pa zuŵa lakulondezgapo nkhani yapadera yikayowoyeka pa Malo Ghakuchitirako Ungano ndipo mipingo yose ku Argentina na Uruguay yikategherezga nkhani iyi. Mu malo ghose ŵanthu awo ŵakategherezga nkhani iyi ŵakakwana 181,643.

Pakanozgekaso ndondomeko kuti ŵanthu ŵize kuzakawona ofesi ya munthavi yiphya, kuchezga na ŵabali na ŵadumbu kweniso kuchitako vyakuchitika vinyake vyapadera. Ŵanyake mwa ŵanthu awo ŵakiza ŵakaŵa ŵabali na ŵadumbu ŵakujumpha 230 awo ŵakafuma mu vyaru 25. Mubali Sergio Spaccasassi, uyo pasono wakuteŵetera ku Ecuador, nayo wakawovwirapo pa mulimo wakuzenga ofesi ya munthavi yiphya ku Argentina. Pakuyowoya za ŵabali na ŵadumbu ŵanandi awo ŵakiza kufuma mu vyaru vyakupambanapambana iyo wakati: “Yehova wakugwiliskira ntchito nyengo zapadera nga ni izi kuti tiŵe paubwezi wakukhora nga ni banja limoza la ŵasopi ŵake.”

Mubali Juan Carlos Nigro, uyo njumoza wa ŵabali wa mu Komiti ya Munthavi ku Argentina wakayowoya kuti: “Tangujiwonera tekha umo Yehova wakatilongozgeranga na kutumbika vyose ivyo vyachitikanga pa ntchito iyi. Iyo ndiyo watipa malo ghakutowa agha agho ghakuchindika zina lake.”

Tose pamoza na ŵabali kweniso ŵadumbu ŵithu ku Argentina, tikuwonga Yehova, uyo ‘wakupanga chilichose chakutowa mu nyengo yake,’ nga umo viliri na Beteli yiphya iyi.—Mupharazgi 3:11.