Pa May 7, 2023, ku Argentina kukachitika ungano wa dera wakwamba mu chiyowoyero cha Chiwichi. Ŵanthu ŵakawungana mu Nyumba ya Ufumu kuti ŵategherezge ungano wa mutu wakuti “Ŵabwezi Ŵamtende!” mu msumba wa Tartagal, Salta. Ŵanthu ŵakufuma mu vigaŵa vitatu ku Argentina ŵakajoyina pulogiramu iyi kwizira pa vidiyo konferensi. Wose awo ŵakaŵapo pa ungano uwu ŵakakwana 169. Ŵanthu ŵaŵiri ŵakabatizika.

Ŵanthu ŵanandi ŵa Chiwichi ŵakukhala kumpoto cha kumanjiliro gha dazi kwa Argentina kweniso kumwera cha kumanjiliro gha dazi kwa Bolivia. Vyaka 10 ivyo vyajumpha, pali kupangika mipingo yiŵiri, magulu ghatatu, na tumagulu 6 tuchokotuchoko. Ŵapharazgi 45 pa ŵapharazgi awo ŵalipo, Chiwichi ntchiyowoyero chawo chakonkhera apo ŵanyake ŵanandi ŵakusambira waka chiyowoyero ichi.

Ŵanthu ŵanandi awo ŵakiza ku ungano uwu, ŵakukhala ku vigaŵa vyakutali. Mubali munyake muchekuru zina lake Paulino wakukhala ku Tartagal, uwo ni mtunda wa makilomita 455 kuzakafika pa malo apo ungano uwu ukachitikiranga. Wakenda pa basi maora 12 kuluta pera kuti wakaŵepo pa ungano. Ungano wati wamara, mubali uyu wakayowoya kuti: “Nilije chakuti niyowoye kuwonga Yehova chifukwa cha ivyo ŵabali ŵachita mwakuti tisangwe na ungano uwu mu chiyowoyero chithu.”

Ŵanji kakaŵa kakwamba kupanga ungano wa dera wa Ŵakaboni ŵa Yehova maso na maso. Mama munyake uyo wakuyowoya Chiwichi, zina lake Delia wakamba kusambira Baibolo na Ŵakaboni ŵa Yehova mu nyengo ya muliri wa COVID-19. Wakenda pasi kwa ora limoza pamoza na ŵana ŵake ŵaŵiri ŵachokoŵachoko kuya ku ungano. Chinthu icho Delia wakakondwa nacho chomene ntchakuti nayo wakaŵapo pa ungano uwu maso na maso kweniso wakawonana na mudumbu uyo wakamusambizganga Baibolo!

Chimwemwe icho ŵabali na ŵadumbu ŵithu ŵakaŵa nacho pa ungano wakwamba uwu mu chiyowoyero cha Chiwichi mbukaboni wapadera wakulongora kuti Yehova wakupwelelera ŵateŵeti ŵake ŵakugomezgeka “mu nthowa yapadera.”—Salimo 4:3.