Ungano wapachaka wa nambara 38 wakuchemeka National Festival of Immigrant Communities ukachitika pa November 11 m’paka 21, 2022, ku Rosario, Argentina. Kukaŵa ŵalendo ŵakujumpha 1 miliyoni. Ndipo pa ungano uwu ŵakalongoranga ŵanthu ŵakupambanapambana ŵa ku Argentina kweniso mitheto yawo. Ofesi ya munthavi ya Ŵakaboni ŵa Yehova ku Argentina yikanozga vyakuti paŵe upharazgi wapadera pa nyengo iyi. Ŵakalongoranga ŵanthu vya webusayiti yithu ya jw.org, na kuŵagaŵira mabuku ghakulongosora Baibolo. Pakaŵa mabuku gha Chiyowoyero cha Mawoko cha ku Argentina, Chitchayinizi, Chingerezi, Chiguarani, Chicreole cha ku Haiti, Chiportuguese, Chiquechua (Bolivia), na Chispanish. Ŵabali na ŵadumbu ŵakujumpha 400 ŵakachitako upharazgi uwu.

Awo ŵakanozga chikondwelero ichi, ŵakazomerezga ŵabali ŵithu kuti ŵangaŵika tumashelufu twamatayala mu malo umo mukujumpha ŵanthu ŵanandi. Mulara yumoza wa mu msumba wakayowoya kuti: “Waliyose wavwara makora na kuwoneka makora, kweniso nkharo yinu yiwemi ntchiyelezgero chiwemi chomene.” Dokotala munyake wa ku Rosario wakafika apo pakaŵa mabuku ndipo wakati: “Mabuku ghinu nkhughamanya, ndipo nkhughatemwa chomene! Kanandi nkhughaŵazganga pamoza na ŵalwari ŵane.”

Pa November 14, 2022, nyuzipepara yakumanyikwa ya La Capital, mu msumba wa Rosario yikaŵa na nkhani yakulongosora umo ntchito yakupharazga yikendera. Mu nkhani iyi mukaŵaso linki ya jw.org ndipo ŵakalumba kuti pa webusayiti iyi pakusangika viyowoyero vinandi chomene.

Tikukondwa kuwona ŵabali na ŵadumbu ŵithu kufuma mu vigaŵa vyose pa charu chapasi kuti nawo ŵakuchitako mulimo wa ‘kuchitira ukaboni mwakukwana makani ghawemi’ pa m’pata uliwose uwo ŵali nawo.—Milimo 20:24.