Kwamba pa May 20 m’paka pa June 11, 2023, chiphalizgano cha FIFA U-20 World Cup chikachitika mu misumba yikuruyikuru yinayi ku Argentina. Ŵanthu ŵakujumpha 400,000 ŵakufuma mu charu chenechichi kweniso mu vyaru vinyake ŵakaŵapo pa chiphalizgano ichi, icho chikachitika kwa masabata ghatatu. Tumashelufu twamatayala tukaŵikika mu malo ghakupambanapambana kweniso pa nyengo yakupambana. Ŵabali na ŵadumbu pafupifupi 500 ŵakachitako upharazgi wapadera uwu, ndipo ŵakagaŵira mabuku ghakupambanapambana ghakujumpha 500. Ŵanthu ŵanandi ŵakaŵaphaliranga vya webusayiti ya jw.org kuti ŵasange mazgoro gha mafumbo ghawo.

Dada munyake wakiza pa kashelufu ka mabuku ndipo wakayowoya kuti wakukondwa chomene kutegherezga nkhani zakuchita kujambura pa nyengo iyo wakuchita maseŵero ghakukhozga thupi. Yumoza mwa ŵabali ŵithu wakamuphalira vya webusayiti ya jw.org na kumulongora umo wangachitira dawunilodi mabuku ghithu ghakuchita kutegherezga. Dada uyu wakayowoya kuti wambenge kutegherezga mabuku ghithu.

Kuti ŵafikire ŵanthu ŵanandi awo ŵakiza pa chiphalizgano ichi, mabuku ghithu ghakaŵikika pamashelufu mu viyowoyero vyakupambanapambana 9. Kweniso ŵapharazgi ŵanandi ŵakasambira umo ŵangatawuzgira ŵanthu mu viyowoyero vyakupambanapambana na chilato chakuti ŵakwaniske kuyowoya na waliyose uyo wiza pa tumashelufu utu. Ŵabali ŵithu ŵanyake awo ŵakachitako upharazgi uwu ŵakayowoya kuti: “Kuŵa na mwaŵi wakufikira ŵanthu ŵanandi awo ŵafuma mu vigaŵa vyakupambanapambana vyatovwira kumanya kuti Yehova ngwalusungu kweniso walije sankho. Ntchinthu chakukondweska chomene.”

Chakukondweska ntchakuti awo ŵakalongozganga chiphalizgano ichi ŵakazomerezga Ŵakaboni ŵa Yehova kuŵika tumashelufu twawo mu malo agho ngakukanizgika chifukwa cha chivikiliro, ndipo kanandi ku malo agha ŵanthu ŵakuzomerezgeka yayi kufikako. Munyake uyo wakanozgangako vya maseŵero agha wakati, “Tikumanya kuti Ŵakaboni ŵa Yehova mbamtende ndipo palije chiheni chilichose icho chingachitika.” Ntheura ivi vikawovwira kuti tipharazgire ŵanthu awo ŵakalaŵiliranga vya chivikiliro.

Ntchakukondweska chomene kuwona ŵateŵeti ŵa Yehova ŵakuyezgayezga kufikira ŵanthu ŵa mitundu yose na kuseŵa mbuto zaunenesko za Ufumu pa charu chose.—Mupharazgi 11:6.