Ŵakaboni ŵa Yehova pafupifupi 300 ku Australia ŵakachitako upharazgi wapadera uwo ukachitikira ku Wollongong, Australia, pa nyengo iyo kukaŵa maseŵero ghakutchova njinga (Union Cycliste Internationale Road World Championships) agho ghakaŵako pa September 18-25, 2022. Ŵalendo ŵakujumpha 200,000 kufuma mu vyaru pafupifupi 70 ŵakuŵangapo chaka chilichose pa chiphalizgano cha kutchova njinga.

Ŵabali na ŵadumbu ŵakagaŵira mabuku ghakujumpha 600 kweniso ŵakawovwira ŵanthu ŵanandi kupanga dawunilodi mabuku agho ŵakukhumba mu chiyowoyero chawo. Kweniso ŵanthu 18 ŵakapempha kuti ŵasambirenge Baibolo. Kufuma mu September, ŵanthu 5 awo ŵakambapo kusambira Baibolo ŵakuwungana na mpingo nyengo zose. Nga umo mubali munyake wakayowoyera: “Yehova watumbika chomene kuyezgayezga kwa ŵabali na ŵadumbu pa mulimo uwo ŵakachita.” Mupharazgi munyake nayo wakati: “Ŵabali na ŵadumbu ŵakalongora mtima waubwezi kwa ŵalendo awo ŵakaŵapharazgiranga. Nili kuwerako na chimwemwe ndipo nkhukumbuka viwemi vinandi ivyo vikachitika ndipo pasono nili na nkhongono zakusazgikira kuchita upharazgi.”

Tikukondwa na ŵabali na ŵadumbu ŵithu ku Australia apo mwachimwemwe ‘ŵakuyowoya vya ukuru wa Chiuta withu.’—Dotoronome 32:3.