Mu 2019, ku Australia kukawotcha chomene ndipo kukaŵa chilangalanga chakofya kuluska kumasinda kose. Ntheura kwamba mu September 2019, mu vigaŵa vinandi mukamba kubuka moto wakofya chomene. Vigaŵa ivyo vyakhwaskika chomene na moto uwu ni Victoria na New South Wales.

Pasono palije mubali panji mudumbu uyo wafwapo panji kupwetekeka chifukwa cha moto uwu, kweni nyumba zinandi zaphya na moto ndipo pa nyumba izi 9 zaphyirathu. Pasono ŵabali na ŵadumbu ŵithu ŵakujumpha 700 ŵasamuka mu nyumba zawo. Ŵabali ŵithu ŵanandi ŵasankha kusamuka chifukwa cha josi linandi ilo lili mu chigaŵa chawo. Ŵakaswiri ŵanyake ŵakugomezga kuti josi ili likunanga chomene mphepo ndipo ndakofya chomene kwa waliyose uyo wangathutako. Ŵabali ŵithu ŵanandi awo ŵachimbira mu nyumba zawo ŵakukhala na ŵachibali ŵawo, ŵanyawo, panji ŵapharazgi ŵa mu mipingo ya mu chigaŵa chakufupi uko moto undafikeko.

Ofesi ya munthavi ya Australasia yapanga Makomiti ghaŵiri ghakovwira para kwachitika soka kuti ghakhozge ŵabali ŵithu na fundo za mu Baibolo kweniso kupeleka wovwiri wakuthupi. Ŵalaŵiliri ŵadera ŵaŵiri na ŵabali awo ŵali mu Komiti ya Munthavi ŵakukhozga ŵabali na ŵadumbu mu vigaŵa ivyo vyakhwaskika na moto uwu. Nangauli ŵabali awo ŵakhwaskika mbakuvuka chomene ndiposo mbakwenjerwa, kweni ŵanandi ŵakuti ŵakhozgeka chomene na chitemwa chanadi icho ŵabali na ŵadumbu ŵakuŵalongora.—1 Petrosi 2:17.