Chigaŵa chakwamba chakujambura Vidiyo nambara 1 ya Uthenga Uwemi Wakuyowoya vya Yesu chikamara kujambulika pa August 12, 2022. Ntchito iyi yikayima dankha pachoko waka, ndipouli chigaŵa chachiŵiri chambenge kujambulika mwasonosono ndipo chizamumara kujamburika mu October 2022.

Nga umo tikayowoyera mu lipoti ilo lajumpha, ŵabali ŵakamba mulimo wakujambura vidiyo ya Uthenga Uwemi Wakuyowoya vya Yesu pa May 20, 2022, chomene ŵakajambuliranga mu nyumba. Panyengo iyo, ŵabali ŵakalindiliranga mazgu ghakuchita kulemba gha mu vidiyo iyi, agho ghali na vyakuchitika ivyo vingakhumba kujambulira mu nyumba na kuwaro wuwo. Mazgu ghakuchita kulemba agha ghakamalizgika pa July 15, 2022. Dipatimenti ya vyakuzenga ku ofesi ya Munthavi ya Australasia yikapeleka nyumba zakujambulirako vidiyo iyi ku Dipatimenti Yakuwona Vyamavidiyo. Nyumba izi pasono nizakuti ŵangamba kujambulirako vidiyo iyi.

Ŵabali na ŵadumbu ŵakujipeleka ŵakujumpha 500 kufuma ku Australia na New Zealand ndiwo ŵakawovwirapo pa mulimo wakuzenga pa malo ghasani kujumpha masikweya mita 7,000 ghakujambulirako vidiyo iyi. Pakuyowoyapo pa mulimo wakuzenga, Mubali Russell Grygorcewicz, uyo ni mulaŵiliri mu Komiti ya Vyakuzenga, wakuti: “Nangauli tikasangana na masuzgo ghanandi, kweni tajiwonera tekha kuti ni Yehova watovwira kutonda masuzgo agha. Tikukayika yayi, vyose ivyo tili kufiska kuchita ntchifukwa cha mzimu utuŵa wa Yehova.”

Mubali Ronald Curzan, movwiri mu Komiti Yakusambizga, wakaŵapo apo chigaŵa chakwamba chikambanga kujambulika. Iyo wakati: “Kukolerana kweniso mtima wa ubwezi uwo ukaŵa pakati pa awo ŵakachitanga mulimo wakuzenga kweniso mbumba ya Beteli kukaŵa kuwemi chomene. Ntchakukondweska chomene kuwona umo malo ghakujambulirako vidiyo iyi ghakugwilira ntchito yake pamanyuma pa vyaka vinandi vyakunozgekera mulimo wakuzenga. Tikuwonga chomene wovwiri wakufuma ku ŵabali na ŵadumbu ŵa mu chigaŵa chose cha ofesi ya munthavi ya Australasia. Tili na chigomezgo chose kuti vidiyo ya vigaŵa 18 iyi, yakulongosora vya umoyo wa Yesu na visambizgo vyake yamuŵafika pamtima ŵanthu ŵanandi pa charu chose.”

Mubali Kenneth Cook wa mu Wupu Wakulongozga, wakaŵapo apo Vidiyo nambara 1 ya mavidiyo agha yikaŵa pafupi kumalizgika kujambulika. Iyo wakati: “Ntchakuwonekerathu kuti Dada withu wachitemwa Yehova wakovwirapo pa ntchito iyi. Tikuwonga Yehova na wose awo ŵakachitako mulimo wakuzenga kweniso kujambura vidiyo chifukwa cha mzimu wawo wakujipata na wakulimbikira ntchito. Ni lurombo lwithu kuti mphanyi vidiyo yapadera iyi yawovwira ŵanandi kulondezga Yesu na kuŵa paubwezi wakukhora na Yehova.”