Pa September 22, 2022, Khoti la Goranboy ku Azerbaijan likadumura kuti Mubali Seymur Mammadov wa vyaka 22, wakagwire jele myezi 9 chifukwa cha kukana kunjira usilikari. Khoti lati lapeleka waka chigamuro ichi, nyengo yeneyiyo ŵakamukaka. Chigamuro ichi chikulongora kuti ŵamazaza ŵatondeka kupulikira vigamuro viŵiri ivyo Khoti Lakuwona vya Wanangwa wa Ŵanthu ku Europe likapeleka ku boma la Azerbaijan.

Kufuma mu 2019, Khoti ili likapeleka vigamuro viŵiri ku boma la Azerbaijan pa mulandu wa pakati pa Azerbaijan na Mamedov kweniso Ŵanyake. Azerbaijan na Mekhtiyev kweniso Abilov na Azerbaijan. Vigamuro vyose viŵiri vikatenge Ŵakaboni ŵa Yehova ŵali na wanangwa wa kukana kunjira usilikari chifukwa cha vigomezgo vyawo vya chisopa, kuyana na Dango 9 la European Convention.

Pa milandu yose iyi, boma la Azerbaijan likazomera kuti likaswa nadi wanangwa wa ŵabali ŵithu ndipo ndakunozgeka kuŵalipira chifukwa cha ivyo likaŵachitira. Ndipouli, chifukwa cha ivyo boma lachita pa kuswa wanangwa wa Mubali Mammadov, vikulongora pakweru kuti lasulako waka vigamuro ivyo khoti ili likapeleka.

Seymur Mammadov wakachemeka kakwamba kuluta ku ofesi ya kulemba usilikari ya ku Chigaŵa cha Goranboy pa May 4, 2022. Wakaŵalongosolera ŵamazaza ivyo iyo wakugomezga ndipo wakapempha kuti wapike ntchito yinyake padera pa usilikari. Kweni ŵamazaza ŵakamukanira pempho lake. Nangauli vikaŵa nthena, kweni Mubali Seymur wakachita chikanga ndipo wakathera yayi.

Pasono, Seymur wali mu jele la mu msumba wa Ganja. Nangauli wakusangana na masuzgo ghose agha, kweni Seymur wakulutilira kuŵa wakukondwa. Iyo wakuyowoya kuti wafiska kupharazgira ŵanthu 30 awo wali nawo mu selo yimoza. Wakutiso ŵanyake mwa ŵanthu aŵa ŵakulongora kuti mbakunweka na uthenga wa mu Baibolo.

Loya wa Seymur wachita apilu chigamuro ichi. Tikulomba kuti mphanyi Khoti la Apilu la Ganja leruzga makora mulandu uwu na kudumura kuti mubali withu wafumiskike mu jele.

Tikukayika yayi kuti Yehova walutilirenge kumovwira Seymur pa nyengo yakusuzga iyi.—Yesaya 43:2.