Pa September 24, 2020, Khoti Lakuwona vya Wanangwa wa Ŵanthu ku Europe, likapeleka vyeruzgo viŵiri ivyo vikaŵikira kumanyuma Ŵakaboni ŵa Yehova ku Azerbaijan. Cheruzgo chakwamba ntcha mulandu wa pakati pa Valiyev na Ŵanyake na Boma la Azerbaijan, ndipo chachiŵiri ntcha pakati pa Religious Community of Jehovah’s Witnesses na Boma la Azerbaijan. Ivyo khoti ladumura viwovwirenge chomene kuti ŵabali ŵithu ŵaŵe na wanangwa wakusopa mwakufwatuka.

Pa milandu yose yiŵiri, boma la Azerbaijan likazomera pakweru kuti likaŵaswera nadi wanangwa wakusopa ŵabali ŵithu. Kweniso boma la Azerbaijan lili kuzomerezga kuti liphepiskenge ŵabali ŵithu na ndalama zakukwana madola 22,146 gha ku America. Ivyo Khoti Lakuwona vya Wanangwa wa Ŵanthu ku Europe likadumura, vikulongora kuti likazomerezga ivyo boma la Azerbaijan likati lichitenge.

Mulandu wa pakati pa Valiyev na Ŵanyake na Boma la Azerbaijan uwo ŵakaluta nawo ku Khoti Lakuwona vya Wanangwa wa Ŵanthu ku Europe mu 2011, ukakhwaskanga chomene ŵabali ŵithu ŵa mu msumba wa Ganja. Kwa vyaka vinandi, ŵalaraŵalara ŵa mu msumba uwu ŵakakananga kuti tilembeske kuti gulu lithu liŵe lakuzomerezgeka. Ivi vikapangiskanga kuti ŵapolisi ŵatimbanizgenge maungano ghithu agho tikuchita mwamtende na kukaka waliyose uyo wasangikapo ndipo ŵanyake ŵakaŵalipiliskanga ndalama zinandi. Mubali munyake ŵakamupanga mulandu kanandi waka mwakuti ndalama izo wakalipira zose pamoza zikakwananga madola 11,375 gha ku America. Ŵabali na ŵadumbu ŵithu ŵanyake nawo ŵakakakikanga chifukwa chakuti ŵakatondekanga kulipira ndalama zinandi izo ŵakaŵatchajanga.

Mu 2013, ŵabali ŵithu ŵakalutaso na mulandu unyake ku Khoti Lakuwona vya Wanangwa wa Ŵanthu ku Europe, uwo ukaŵa wa pakati pa Religious Community of Jehovah’s Witnesses na boma la Azerbaijan, chifukwa boma ili likazomerezganga mabuku ghachoko waka gha Ŵakaboni ŵa Yehova kuti ndigho ghanjirenge mu charu ichi.

Nangauli boma lichali lindazomerezge kuti Ŵakaboni ŵa Yehova ŵalembeske wupu wawo mu msumba wa Ganja, kweni pasono vinthu viliko makora. Mu vyaka vya sonosono apa, ŵabali ŵithu ŵawungananga mu tumagulu tuchoko ku nyumba za ŵabali kwambura ŵapolisi kuŵatimbanizga. Chinyake ntchakuti, nangauli boma likwenera kughawona dankha mabuku ghithu pambere ghandanjire mu charu ichi, kweni likuŵazomerezga ŵabali ŵithu kuchemeska mabuku ghanandiko.

Mubali Kiril Stepanov uyo ngwa mu Dipatimenti Yakuthandazga Nkhani za Ŵakaboni ŵa Yehova, wakati: “Ivyo Khoti Lakuwona vya Wanangwa wa Ŵanthu ku Europe ladumura ni vyakuzirwa chomene ndipo tikugomezga kuti viwovwirenge kuti ŵalaraŵalara ŵa boma ŵazomere kuti tilembeske wupu withu mu msumba wa Ganja kweniso na misumba yinyake ya mu Azerbaijan. Tikugomezga kuti kunthazi boma lizamuleka vyakuti lighawonenge dankha mabuku ghithu pambere ghandanjire mu charu ichi.”

Tikumuwonga chomene Yehova chifukwa cha kutovwira pa milandu iyi. Ivyo khoti ili ladumura mbukaboni unyake uwo ukulongora kuti ‘palije chilwero icho chapangikira ŵanthu ŵa Chiuta chitondenge.’—Yesaya 54:17.