Mubali Royal Karimov na Seymur Mammadov ŵaŵafumiska mu jele ku Azerbaijan. Ŵabali aŵa ŵakakana kunjira ntchito ya usilikari chifukwa cha njuŵi yawo.

Nga umo tikayowoyera, khoti la Azerbaijani likakana pempho la Seymur lakuti wapike milimo yinyake ya boma padera pa usilikari. Ntheura wakakakika na kuŵikika mu jele myezi 9 pa September 22, 2022. Chigamuro ichi chikulongora kuti ŵamazaza ŵakatondeka kupulikira vigamuro viŵiri ivyo Khoti Lakuwona vya Wanangwa wa Ŵanthu ku Europe likapeleka ku boma la Azerbaijan. Maloya gha Seymur ghakachita apilu chigamuro ichi, ndipo pa December 12, 2022, Khoti la Apilu la Ganja likeruzga kuti chilango ichi ŵachisinthe m’malo mwakuti wakhalenge mu jele, khoti ili likati wakagwilirenge kuwaro. Nangauli pasono Seymur wali kufuma mu jele, kweni wachita apilu ku Khoti Likuru Chomene la Azerbaijan kuti ŵayiwoneso makora nkhani iyi na chilato chakuti ŵasinthe chilango chambura urunji icho ŵamupa.

Seymur wakazomerezgekanga yayi kuŵa na Baibolo panji kupokera makalata apo wakaŵa mu jele, kweni Yehova wakamukhozga nipera. Iyo wakuyowoya kuti: “Pambere zuŵa lakutegherezga mulandu wane lindakwane, nkhalemba pa kapepara mazgu gha pa Joshuwa 1:5, 6, agho ghakuti: ‘Nga umo nkhaŵira na Mozesi, ndimoso namuŵira na iwe. Namukugwentha yayi nesi kukusida.’” Mazgu agha ghakamukhozga chomene Seymur pamanyuma pakuti wakakika na kuŵikika mu jele. Iyo wakuyowoyaso kuti: “Mavesi agha ghakaŵa lemba lane la zuŵa na zuŵa.”

Ŵamazaza ŵakaphalira Royal kuti pa May 30, 2022 walute na kukamba ntchito ya usilikari ku Gadabay Region State Service. Royal wakakana ntchito ya usilikari chifukwa cha njuŵi yake ndipo wakapempha kuti ŵamupe ntchito yinyake. Kweni ŵakakana pempho lake. Pa July 25, 2022, ŵamazaza ŵakamukaka na kumujalira mu selo ya ŵasilikari m’paka pa November 1, 2022. Ndipo ivyo ŵakachita vikaŵa vyakupambana na dango. Royal wakupempha kuti ivyo ŵamazaza ŵa Gadabay Region State Service for Mobilization and Conscription ŵakachita vikwenera kufufuzikaso makora.

Royal wakuti: “Apo nkhaphalirika kuti nifumenge yayi mu selo ya ŵasilikari, nkhahangayika chomene. Kweni nkhakumbuka kuti pa nyengo iyi chipulikano chane chikuyezgeka.”

Pa nyengo iyo Royal wakaŵa ku jele, mudumbu wake wakazomerezgeka kukamuwona. Wakamupa Baibolo, ndipo Royal wakuti wakakhozgeka chomene mwauzimu. “Nyengo zinyake nkhongono zikanimaliranga. Kweni para vyaŵa nthena, Yehova wakanipanga nkhongono. Kuŵerenga Baibolo na kulomba kwa Yehova ndivyo vikanipanga mtende wakuruska.”

Tikulutilira kulomba kuti mphanyi ŵamazaza ku Azerbaijan ŵaleka kuŵika ŵabali ŵithu mu jele chifukwa cha chipulikano chawo kweni ŵapeleke ntchito zinyake izo ŵangachita m’malo mwa kunjira usilikari nga umo viliri mu vyaru vinyake.—1 Timote 2:1, 2.