Pa December 15, 2020, wupu wa UN Human Rights Committee ukapeleka vyeruzgo vyakuzirwa viŵiri ivyo vikaŵikira kumanyuma Ŵakaboni ŵa Yehova ku Azerbaijan. Milandu yake yikaŵa ya pakati pa Rahima Huseynova na Azerbaijan; kweniso Saladdin Mammadov, Rashad Niftaliyev na Sadagat Abbasova na Azerbaijan. Pa milandu yose iyi, wupu uwu ukeruzga kuti boma likaswa wanangwa wa Ŵakaboni ŵa Yehova, ndipo ukati boma la Azerbaijan lisinthe malango ghake mwakuti lizakaleke kuswa wanangwa wanthena uwu munthazi.

Mulandu wa pakati pa Rahima Huseynova na Azerbaijan ukaŵa wakukhwaskana na ivyo ŵapolisi ŵa ku Baku ŵakachita pakukaka Mudumbu Rahima Huseynova mu December 2014 chifukwa chakuti wakaphalirangako ŵanyake ivyo wakugomezga. Kufuma apo, khoti la mu chigaŵa ichi likamulipiska ndalama zakukwana madola 882 gha ku America, chifukwa chakuti pa nyengo iyo chisopa cha Ŵakaboni ŵa Yehova chikaŵa chambura kulembeskeka ku Baku. a Mudumbu wakati wachita apilu chigamuro ichi, Khoti la Apilu la ku Baku likakolerana na ivyo khoti lakwamba likadumura. Mudumbu Huseynova wakaghanaghana vyakuluta na mulandu uwu ku khoti likuru chomene.

Wupu wa UN Human Rights Committee ukadumura kuti Boma likaswa Dango 18(1) la malango gha International Covenant on Civil and Political Rights (ICCPR). Wupu uwu ukati boma la Azerbaijan limuphepiske pakumupa ndalama mudumbu uyu. Chakukondweska ntchakuti, pa ivyo wupu uwu ukalemba mu nyuzipepara, ukati boma la Azerbaijan likweneraso “kuchitapo kanthu na kuwoneseska kuti lachita vyose vyakukhumbikwa mwakuti vyanthena ivi vizakaleke kuchitikaso munthazi. Ivi vikusazgapo kuweleramo malango ghake, na vyose ivyo likuchita na chilato chakuti lileke kuswa wanangwa uwo uli mu dango 18 la [ICCPR].”

Mulandu wa Saladdin Mammadov, Rashad Niftaliyev na Sadagat Abbasova na Azerbaijan ukaŵa wakukhwaskana na kagulu ka ŵabali na ŵadumbu ku Ganja awo ŵakawungana kuti ŵasambire Baibolo mu nyumba ya Mubali Saladdin Mammadov. Mu October 2014, ŵapolisi ŵakatimbanizga ungano wa ŵabali ŵachoko waka aŵa na kusecha nyumba yose, ndipo ŵakatora Mabaibolo na vinthu vinyake. Mubali Mammadov, Mubali Rashad Niftaliyev, na Mudumbu Sadagat Abbasova, ŵakaŵakaka na kuluta nawo ku ŵapolisi uko ŵakaŵasunga kwa maora ghakujumpha 6. Pakati pajumpha mazuŵa ghaŵiri, ŵakaphalirika kuti ŵalute ku Khoti la mu Msumba wa Ganja la Nizami. Khoti ili likadumura kuti ungano wa ŵabali aŵa ukaŵa wambura kuzomerezgeka chifukwa chisopa chawo chikaŵa chambura kuzomerezgeka na boma mu Ganja. Khoti likalipiska waliyose ndalama zakukwana madola1,176 gha ku America. Ŵabali na ŵadumbu aŵa ŵakachita apilu chigamuro ichi ku Khoti la Apilu la Ganja. Chachitima ntchakuti khoti ili likakolerana na ivyo khoti lakwamba likadumura. Kufuma apo ŵakachita apilu ku wupu wa UN Human Rights Committee.

Wupu uwu ukasanga kuti boma la Azerbaijan likaswa malango ghanandi gha ICCPR ndipo ukati boma liŵalipire Ŵakaboni ŵatatu aŵa. Nakuti wupu uwu ukati “Khoti la mu chigaŵa ichi likalongosora yayi chifukwa icho ŵabali ŵakeneranga kulembeska dankha chisopa chawo ku boma pambere ŵandambe kulondezga ivyo ŵakugomezga na kuwungana pamoza.” Fundo iyi yikulongora pakweru kuti ŵabali ŵithu ku Azerbaijan ŵali na wanangwa wa kuwungana pamoza kuti ŵasope nangauli vingaŵa kuti ŵandalembeske chisopa chawo.

Mwakuyana waka na mulandu wa Rahima Huseynova, wupu uwu ukapemphaso boma la Azerbaijan kuti liweleremo “malango na vyakuchita vyake” kuti liwoneseske kuti likuchindika wanangwa uwo uli mu malango gha ICCPR.

Tikuwonga chomene kuti kwamba mu vyaka vyasonosono apa, vyamba kwenda makora ku Azerbaijan ndipo ŵamazaza ŵakuswa yayi wanangwa wakusopa wa ŵabali ŵithu. Tikugomezga kuti vyeruzgo viŵiri ivi viwovwirenge kuti ntchito yithu yakupharazga makani ghawemi yilute panthanzi ku Azerbaijan.—Ŵafilipi 1:7.