Pa April 26, 2021, wupu wa UN Human Rights Committee ukapeleka chigamuro chakuzirwa chomene pa mulandu wapakati pa Aziz Aliyev na Ŵanyake na Azerbaijan. Aka nkhachitatu kuti wupu uwu uŵikire kumanyuma Ŵakaboni ŵa Yehova ku Azerbaijan na kulwera wanangwa withu wakuti tisopenge mwamtende.

Mulandu uwu ukukhwaskana na ivyo ŵapolisi ŵakachita pa kusecha nyumba ya Kaboni ku Aliabad mu Chigaŵa cha Zagatala. Pa September 21, 2013, ŵapolisi ŵakasecha mwakuchichizga nyumba ya Mubali Aziz Aliyev, iyo mukaŵa Ŵakaboni ŵa Yehova ŵanandi awo ŵakawungana kuti ŵachite maungano gha mpingo. Ŵapolisi aŵa ŵakasecha nyumba yose na kuŵawofya ŵabali na ŵadumbu ŵithu, kutora mabuku ghawo, vinthu vyawo vyakukhumbikwa na ndalama. Kufuma apo, ŵapolisi ŵakaŵatora ŵabali na ŵadumbu wose awo ŵakaŵapo na kuluta nawo ku ofesi kwawo. Apo ŵakaŵa mu nthowa, Mudumbu Havva Azizova wakakoreka na chizilisi ndipo wakazemphuka. Ŵapolisi ŵati ŵawona ivi, ŵakamutolera dankha mudumbu uyu ku chipatala. Wati wasisipuka waka, nyengo yeneyiyo ŵakaluta nayo ku ofesi ya ŵapolisi kuti ŵakamufumbe mafumbo.

Pamanyuma, Khoti la Zagatala likadumura kuti ŵabali na ŵadumbu ŵithu ŵanandi ŵalipire ndalama izo pa nyengo iyo zikakwananga madola 1,716 gha ku America. Khoti la Apilu la Sheki nalo likakolerana na ivyo khoti lakwamba likadumura. Ŵabali ŵithu ŵati ŵawona kuti palije icho chikuchitika nangauli ŵakachita ivyo ŵangakwaniska kuti makhoti gha ku Azerbaijan ghawoneso makora nkhani iyi, ŵakachita apilu ku wupu wa UN Human Rights Committee.

Wupu uwu ukadumura kuti boma la Azerbaijan likaswa wanangwa wa ŵabali ŵithu wa kusopa mwawanangwa kweniso ukati boma ili likakaka na kulanga ŵabali ŵithu pa vifukwa vyambura kupulikikwa. Mu chigamuro chake, wupu uwu ukati Ŵakaboni ŵa Yehova ŵakachitilika nkhaza na ŵamazaza kweniso ŵapolisi awo “ŵakaŵawofya kuti ŵamuŵajalira, kuyowoyera msinjiro ŵabali ŵithu ŵanyake, na kunyoza chisopa chawo, kweni kwambura kuŵaphalira ivyo ŵabuda, panji masuzgo agho chisopa na mabuku ghawo ghakwambiska.” Ntheura boma la Azerbaijan likaphalirika kuti liŵalipire ŵabali ŵithu na “kuchita chilichose icho lingafiska kuti vyanthena vileke kuzakachitikaso munthazi, kweniso likwenera kuweleramo malango ghake, na vyakuchita vyake.”

Tikukondwa kuti mu vyaka vyasonosono apa, ŵabali ŵithu ku Azerbaijan ŵazomerezgeka kusopa na kuwungana pamoza kwambura chakutimbanizga chilichose. Tikuwonga Chiuta withu, Yehova, chifukwa cha kovwira kuti unenesko ulutilire kukhozgeka mwakuyana na dango mu makhoti gha mazuŵa ghano.—Ŵafilipi 1:7.