Wupu wa United Nations Human Rights Committee (CCPR) ukapeleka vigamuro viŵiri mu November na December 2021 ivyo vikaŵikira kumanyuma wanangwa wa Ŵakaboni ŵa Yehova wa kuphalirako ŵanyawo ivyo ŵakugomezga. Vigamuro ivi vikakhwaskanga ŵadumbu awo ŵakakakika na ŵamazaza ku Azerbaijan chifukwa cha kuphalirako ŵanyawo uthenga wa mu Baibolo.

Pa November 5, 2021, wupu wa CCPR ukaŵikira kumanyuma wanangwa wa kupharazga wa Mudumbu Matanat Gurbanova na Saadat Muradhasilova. Ŵadumbu aŵa ŵakakakika na ŵamazaza mu November 2014 pamanyuma pakuti ŵanthu ŵanyake ŵambura kumanyikwa makora ŵamanyiska ŵamazaza ivyo ŵakachitanga. Ŵadumbu aŵa ŵakaphalirika kuti waliyose walipire ndalama zakukwana madola 880 gha ku America. Wupu wa CCPR ukati ivyo ŵamazaza ŵakachita apa vikasuskananga na dango ndipo ukati boma la Azerbaijan liwoneseske kuti vyanthena vileke kuzakachitikaso munthazi.

Matanat na Saadat, awo mphaukuru na unung’una ndipo mba nyumba yimoza, ŵakati: “Nangauli ŵapolisi na mweruzgi ŵakayezga kutiwofya, kweni ivyo vikachitika apa vikakhozga chomene chipulikano chithu. Yehova wakalongora pakweru kuti woko lake ndifupi yayi, ndiposo kuti wakumanya makora nyengo na umo wangavikilira ŵateŵeti ŵake.”

Mu chigamuro chakuyana waka pa December 21, 2021, wupu wa CCPR ukati ŵapolisi ŵa ku Azerbaijan ŵakaswa dango apo ŵakakaka Mudumbu Jeyran Azizova na Gulnaz Israfilova chifukwa cha “kuchita vyakukhwaskana na chisopa chawo mu chigaŵa chinyake.” Mu chigamuro chake, wupu wa CCPR ukadidimizga fundo yakuti ŵadumbu ŵaŵiri aŵa ŵakabuda chilichose yayi apo ŵakaphalirangako ŵanyawo ivyo ŵakugomezga.

Apo Jeyran na Gulnaz ŵakaluta kukawona ŵabwezi ŵawo ku Chigaŵa cha Goranboy ku Azerbaijan mu November 2016, ŵakaphalirangako ŵanyawo uthenga wa mu Baibolo. Wamazaza munyake wa mu chigaŵa ichi wakakaphara ku polisi, ndipo ŵadumbu ŵithu ŵakakakika. Apo ŵakeruzganga mulandu uwu, mweruzgi wakati ŵadumbu aŵa ni mphachi ndipo ŵalipire ndalama zakukwana madola 1,176 gha ku America. Khoti la apilu nalo likakhozgera chigamuro ichi. Mbwenu ŵadumbu aŵa ŵakawona kuti ŵachite waka apilu ku wupu wa CCPR.

Vigamuro ivyo vikuvikilira wanangwa withu vikutovwira kuti tipharazgenge mwakufwatuka makani ghawemi, iyo ni ntchito yakuzirwa chomene. Nase tikukondwa lumoza na ŵadumbu ŵithu awo ŵakalongora chiyelezgero chiwemi, pa nkhani ya kupharazga makani ghawemi mwachikanga.—Mateyu 10:18.