Pa February 8, 2017, Khoti Likuru ku Azerbaijan (Supreme Court of Azerbaijan) likati Irina Zakharchenko na Valida Jabrayilova ŵalije mulandu. Iwo ŵakakakika chifukwa chakuti boma likuti likaŵazomerezga yayi kupeleka mabuku ghakulongosora Baibolo ku ŵanthu. Jaji Hafiz Nasibov, wa Khoti Likuru (Criminal Board of the Supreme Court), wakapharazga kuti Khoti lasanga kuti palije icho Ŵakaboni ŵa Yehova ŵaŵiri aŵa ŵakananga, ndipo likususka na kukana ivyo makhoti ghachoko ghakadumura.

Pakupulikizga mulandu uwu, maloya gha Zakharchenko na Jabrayilova ghakalongosora kuti boma likaswa wanangwa wakubabika nawo chifukwa cha kusuzga Ŵakaboni ŵa Yehova aŵa kwambura mulandu. Khoti likapempha ŵanakazi ŵaŵiri aŵa kuti ŵalongosore nkhaza izo ŵazizipizga kwa myezi yakujumpha 11 kufuma apo ŵakakakikira kweniso umo ŵakhwaskikira.

Loya wakuwona wanangwa wa ŵanthu pa charu chose, Jason Wise wakati: “Ndise ŵakukondwa chomene kuti Khoti Likuru lamazga mulandu uwu. Nakuti nkhakwamba ku Ŵakaboni ŵa Yehova mu charu cha Azerbaijan, kuwona kuti khoti likuru lasuska na kukana ivyo makhoti ghachoko gha mu charu ichi ghakadumura. Tikugomezga kuti khoti la Baku Sabail District Court liwoneseskenge kuti wanangwa wakuti ŵanakazi ŵaŵiri aŵa ŵakwenera kupika ndalama zakuŵaphepiska, wagwira ntchito.”