Pa April 16, 2018, Khoti Likuru la ku Azerbaijan likakolena na ivyo khoti lichoko likadumura kuti Irina Zakharchenko na Valida Jabrayilova ŵaŵaphepiske chifukwa chakuŵajalira mu jele myezi 11 pa vifukwa vyambura kupulikikwa. Kukwambilira kwa February mu 2017, Khoti likuru likati ŵanakazi aŵa ŵalije mulandu pa mulandu uwo ŵakaŵapa wakuti ŵakagaŵiranga mabuku gha chisopa kwambura kuzomerezgeka dankha na Boma. Ndipouli, Khoti Likuru laŵika nkhani ya kuŵaphepiska mu mawoko gha makhoti ghachokoghachoko.

Khoti Likuru lati ladumura kuti ŵalije mulandu, Zakharchenko na Jabrayilova, awo Mbakaboni ŵa Yehova, ŵakapempha ku makhoti ghachokoghachoko kuti ŵaŵaphepiske chifukwa cha nkhaza izo ŵakaŵachitira. Mu August 2017, khoti lichoko likeruzga kuti ŵaŵaphepiske, kweni Unduna wa Vyachuma ukachita apilu nkhani iyi. Mu November 2017, khoti la apilu likakolerana na ivyo khoti lakwamba likadumura. Unduna uwu ukakhorwaso yayi na chigamuro ichi, ndipo ukakadandaura ku Khoti Likuru mu 2018. Khoti Likuru nalo likakana apilu iyi, na kukolerana na chigamuro cha pakwamba, icho chikati ŵanakazi aŵa ŵaŵaphepiske.

Pamanyuma pakupeleka chigamuro chake, Khoti Likuru ili likatiso likumanya nkhaza izo ŵalaraŵalara ŵa boma ŵakachitira Zakharchenko na Jabrayilova, ndipo ŵakachita vinthu mwakutalulira chomene na kuswa wanangwa wa ŵanakazi ŵambura mulandu aŵa.