Pa January 7, 2023, Mubali Mark Sanderson, wa mu Wupu Wakulongozga, wakapatulira Nyumba ya Ufumu iyo yikazengeaso ku Great Abaco Island ku Bahamas. Nyumba ya Ufumu yikanangika mu September 2019 na chimphepo chakuchemeka Hurricane Dorian. Muliri wa COVID-19 ukatimbanizga ntchito yakuzenga Nyumba ya Ufumu iyi kwati kwakhala masabata ghatatu kuti yimare kuzengeka mu March 2020. Ŵabali ŵakujipeleka pakuzenga ŵakalutaso ku malo agha mu 2021 kukamalizga mulimo uwu.

Mubali Sanderson wakayowoya nkhani yakujulira Nyumba ya Ufumu mwakukhuka. Iyo wakati: “Apo chimphepo cha hurricane chikaputanga chikwenera kuti chikanyamura vinthu vinandi, kweni mwakusimikizga nkhumanya kuti chikanyamura yayi chigomezgo chinu. Chikanyamura yayi ubwezi winu na Yehova.”

Nyumba ya Ufumu iyi ndiyo yekha iyo yazengeka pa chirwa ichi mwakuti para kungizaso chimphepo cha hurricane yinganangika yayi. Mu Nyumba ya Ufumu iyi mukuwungana ŵapharazgi 49 awo mba mipingo yiŵiri, wa Chingelezi kweniso wa Chicreole cha ku Haiti. Pakujulira Nyumba ya Ufumu iyi pakawungana ŵanthu 175 kweniso ŵanyake 167 ŵakalumikiza ku pulogiramu iyi. Pakujulira Nyumba iyi pakaŵa Ŵakaboni ŵa Yehova kweniso ŵanyake awo ŵakaŵa Ŵakaboni ŵa Yehova yayi.

Mubali Jake Majure wakaŵa yumoza wa awo ŵakajipeleka pa mulimo wakuzenga apo mulimo uwu ukayimiskika. Iyo wakayowoya kuti “Chikaŵa chakuŵinya chomene. Mulimo uwu ukendanga luŵiro chomene mwakuti ukaŵa pafupi kumara. Nakuti tikaghanaghananga vyakuchitiramo Chikumbusko mu Nyumba ya Ufumu yiphya iyi, kweni mulimo uwu ukayimiskika.” Mu 2021 mubali uyu wakalutaso kukawovwirapo pa mulimo wa kumalizga Nyumba ya Ufumu iyi kweniso milimo yinyake.

Mubali Sanderson wakayowoya kuti: “Umo Nyumba ya Ufumu iyi yazengekera ntchilongolero chakuti ŵanthu ŵa Yehova mbakukolerana kweniso kuti ŵakutemwana yumoza na munyake. Ntchakukondweska chomene kuwona kuti pasono mu January 2023 nyumba iyi yili kumara kweniso kuwona umo ŵabali na ŵadumbu ŵakukondwera.”

Tili na chigomezgo chose kuti Nyumba ya Ufumu yiphya iyi yiwovwirenge kuti ŵanthu ŵalumbe Chiuta withu Yehova.—Ezira 3:10.