Khoti Lakuwona vya Wanangwa wa Ŵanthu ku Europe likadumura kuti boma la Belgium likachita vinthu mwambura urunji apo likati mipingo 9 ya Ŵakaboni ŵa Yehova ku Brussels uwo ni Msumba ukuru mu charu ichi, yikwenera kupeleka misonkho. Chigamuro ichi chikaŵa cha mulandu wapakati pa Christian Assembly of Jehovah’s Witnesses na ŵanyake na Belgium, ndipo chikapharazgika pa April 5, 2022. Nakuti chigamuro ichi chivikilirenge wanangwa withu wakusopa ku Belgium pera yayi, kweniso na mu vyaru vinyake ku Europe.

Visopa vyose vikapelekanga msonkho yayi mu Msumba wa Brussels pa malo ghawo ghakusopera m’paka mu 2018. Mu chaka ichi, malango gha mu chigaŵa ichi ghakasintha pa nkhani ya misonkho ndipo ghakatenge “visopa vyakuzomerezgeka” 6 pera ndivyo vikwenera yayi kupeleka msonkho. Dango ili likapangiska kuti Ŵakaboni ŵa Yehova ŵalipirenge misonkho yakukwera chomene pa Nyumba za Ufumu izo zili mu Msumba wa Brussels, ndalama pafupifupi madola 49,025 gha ku America chaka chilichose.

Khoti Lakuwona vya Wanangwa wa Ŵanthu ku Europe likati apo boma ili likadumura kuti “visopa vyakuzomerezgeka” 6 pera ndivyo vileke kulipira msonkho, likalongora pakweru kuti likuchita vinthu mwakutemwera ndipo likaŵachitira sankho Ŵakaboni ŵa Yehova kweniso likaswa malango gha wupu wa European Convention on Human Rights.

Mu chigamuro ichi, Khoti Lakuwona vya Wanangwa wa Ŵanthu ku Europe likakana ivyo boma la Belgium likabisamirako kuti Ŵakaboni ŵa Yehova nawo nthena ŵakalemba chikalata cha kupempha kuti ŵazomerezgekeso. Khoti ili likati mu charu cha Belgium, Nduna Yakuwona vya Urunji pera ndiyo yili na mazaza ghakuti chisopa chiŵe chakuzomerezgeka na boma. Ndipo pa nkhani iyi ni boma pera ilo lingakana panji kuzomerezga kuti chisopa chileke kupeleka msonkho.

Mu chigamuro chawo chaumaliro, Khoti Lakuwona vya Wanangwa wa Ŵanthu ku Europe likati mu charu cha Belgium, kuti chisopa chizomerezgeke na kumanyikwa ku boma “vikwendera waka mwaŵi na soka,” chifukwa chakuti “visopa vikuchita kulemba chikalata kupempha kuti vizomerezgeke kweni pankhani yakuleka kupeleka msonkho, boma likuchita kusora lekha.” Khoti ili likatiso boma la Belgium likwenera kuchita vinthu mwakuyana ku visopa vyose nanga kungaŵa ku Ŵakaboni ŵa Yehova.

Khoti Lakuwona vya Wanangwa wa Ŵanthu ku Europe likadidimizga fundo yakuti ŵamazaza ŵalije wenelero wakusankha kuti vigomezgo vya chisopa chinyake ni vyaunenesko panji umo ŵanthu ŵakwenera kuchitira na ivyo ŵakugomezga. Ivi viwovwirenge kuti vyaru vinyake vya ku Europe vileke kupanga malango agho ghangalongora kuti vikuchita vinthu mwakutemwera pa nkhani ya kupeleka misonkho.

Tikuwonga Yehova chifukwa cha kutovwira kuti titonde milandu yanthena na kufiska khumbo lithu lakuti timupe uchindami.—Chivumbuzi 15:4.