Pa May 29, 2022, Mubali Sylvain Bois, uyo ngwa mu Komiti ya Munthavi ya Benin, wakafumiska buku la mu Baibolo la Makani Ghawemi Umo Wakalembera Mateyu mu Chifon. Buku la mu Baibolo ili likafuma la pa intaneti pera, ndipo pulogiramu yake yikajambulikirathu. Ŵapharazgi pafupifupi 7,000 na ŵakunweka ndiwo ŵakawonelera pulogiramu iyi. Lakuchita kupulinta lambenge kusangika mu December 2023.

Nangauli Mabaibolo gha Chifon ghakaŵapo kale pambere buku ili lindafumiskike, kweni ŵali kuwuskamo zina la Chiuta, ndipo mazgu ghanandi mu Mabaibolo agha ngakubudika. Chinyakeso ntchakuti Mabaibolo agha ngakudura chomene, ndipo ŵanandi awo ŵakuguliska ŵakukana kuguliska Ŵakaboni ŵa Yehova.

Buku la mu Baibolo ilo lafumiskika sono ili la Mateyu lili kung’anamulika makora chomene. Mwachiyelezgero, lemba la Mateyu 10:28 lili kung’anamulika kuti: “Kopa awo ŵakukoma thupi chara pakuti ŵangakoma umoyo chara.” Mazgu ghamusi gha pa vesi ili ghakuti lizgu ilo likagwiliskirika ntchito mu Chiyowoyero chakwambilira icho Baibolo likalembekera lakuti “mzimu” likung’anamura “umoyo.” Vinthu nga ni ivi vyamovwira ŵapharazgi kuti ŵasambizgenge makora ŵanthu ŵakunweka para ŵali mu uteŵeti.

Mubali Palle Bjerre, uyo ngwa mu Komiti ya Munthavi ya Benin, wakuti: “Mu mabuku ghithu ghanandi muli fundo zinandi izo zikukora mazgu gha mu buku la Mateyu. Pakuti pasono tili na buku la Makani Ghawemi umo wakalembera Mateyu ilo ndakung’anamurika makora chomene, viwovwirenge chomene pa ntchito ya kupharazga na kusambizga ŵanji makani ghawemi. Tikuwonga chomene Yehova kweniso awo ŵakang’anamurako buku la mu Baibolo ili.”

Tikugomezga kuti kufumiskika kwa buku ili kuwovwirenge kuti ŵabali na ŵadumbu ŵithu awo ŵakuyowoya Chifon ŵalutilire kukhozga ubwezi wawo na Yehova kweniso kovwira ŵanthu ŵanandi kuti nawo ŵaŵe paubwezi na Chiuta.—Mateyu 5:3.