Pa October 24, 2021, Mubali Douglas Little, uyo ngwa mu Komiti ya Munthavi ya Bolivia, wakafumiska Baibolo la Malemba Ghakupatulika mu Mang’anamuliro gha Charu Chiphya, mu Chiquechua cha ku Bolivia. Baibolo ili likafumiskika la pa intaneti pera mu pulogiramu iyo yikajambulikirathu ndipo ŵanthu ŵakujumpha 4,000 ku Bolivia ŵakawonelera. Vikuwoneka kuti Baibolo lakuchita kupurinta lambenge kusangika mu April 2022.

Chiquechua cha ku Bolivia chikupambanapambana kuyana na chigaŵa, mazgu ghakuŵa na ng’anamuro lakupambana kuyana na chigaŵa icho munthu wali. Pakughanaghanira vya suzgo ili, Baibolo la Mang’anamuliro gha Charu Chiphya, lili na mazgu gha musi ghanandi agho ghakovwira kulongosora mang’anamuro gha mazgu kuyana na chigaŵa.

Mabaibolo ghakamba kusangika mu Chiquechua cha ku Bolivia, kwamba mu 1880. Ndipouli, ghanandi mwa Mabaibolo agha ghakuzunura zina la Chiuta lakuti Yehova, mu mazgu ghamusi pera, panji zina ili likulembeka waka kuti “Dada Chiuta.” Munthu munyake uyo wakuchita mulimo wakung’anamura wakati, “Ndine wakukondwa chomene kuti pasono tili na Baibolo ilo lili na zina la Chiuta.”

Apo Baibolo ili likang’anamulikanga, awo ŵakachitanga mulimo wakung’anamura ŵakasangananga na masuzgo ghanandi, nga nkhupwelelera ŵachibali ŵawo awo mbalwari. Muliri wa COVID-19 nawo ukapangiskaso masuzgo ghanyake agho ghakatenge ghatimbanizgenge mulimo wakung’anamura. Munthu munyake uyo wakuchita mulimo wakung’anamura wakati: “Na wovwiri wa Yehova lekani Baibolo ili likamara kung’anamurika na kufumiskika mwaluŵiro pambere deti ilo likaŵikika likaŵa kuti lindakwane.”

Tikugomezga kuti Baibolo la Mang’anamuliro gha Charu Chiphya, mu Chiquechua cha ku Bolivia liwovwirenge ŵanandi ŵachiyowoyero ichi kuti “ŵamanye makora unenesko na kuponoskeka.”—1 Timote 2:4.