Pa June 27, 2021, Baibolo la Malemba Ghakupatulika mu Mang’anamuliro gha Charu Chiphya likafumiskika la pa Intaneti mu Chiaymara. Pulogiramu iyo yikajambulikirathu yikawoneskeka pa Intaneti ku mipingo na magulu ghose ku Bolivia. Mubali Nelvo Cavalieri, wa mu Komiti ya Munthavi ya Bolivia, ndiyo wakafumiska Baibolo ili.

• Chiaymara chikuyowoyeka na ŵanthu ŵakujumpha 1.6 miliyoni awo chomenechomene ŵakukhala ku chigaŵa cha Nyanja ya Titicaca, icho chili ku Mapiri gha Andes

• Pa viyowoyero 36 vyakumanyikwa makora ivyo vikuyowoyeka ku Bolivia, Chiaymara ntchachiŵiri pa viyowoyero ivyo vikuyowoyeka chomene mu charu ichi

• Ŵapharazgi pafupifupi 2,000 ŵakuteŵetera mu mipingo yakujumpha 60 iyo yikuyowoya Chiaymara ku Argentina, Bolivia, Brazil, Chile, na Peru

• Ŵanthu 6 ndiwo ŵakachitako mulimo wakung’anamura Baibolo ili ndipo ukatora vyaka vinayi

Yumoza mwa awo ŵakang’anamurako Baibolo ili wakati: “Baibolo ili ntchawanangwa chikuru chomene chakufuma kwa Yehova icho wapeleka ku ŵanthu awo ŵakuyowoya Chiaymara. Pasono ŵangaŵerenga Baibolo mu chiyowoyero icho ŵakuyowoya na kuchipulikiska makora. Apo ŵakuŵerenga Baibolo ili, ŵajipulikenge kuti Yehova wakuyowoya nawo mwakudunjika.”

Mubali Mauricio Handal, wa mu Komiti ya Munthavi ya Bolivia, wakati: “Kufuma waka apo Baibolo la Mang’anamuliro gha Charu Chiphya mu Malemba Ghachigiriki likafumiskikira mu Chiaymara mu 2017, tapokera malipoti ghanandi ghakuwonga kuti Baibolo ili likuŵafika pamtima chomene ŵanthu. Pasono tili na Baibolo lose, Baibolo ilo lili kung’anamulika makora kweniso lambura kusuzga kulipulikiska. Tikugomezga kuti Baibolo ili liwovwirenge chomene ŵanthu kuti ŵapulikiske uthenga wake, ndipo chakuzirwa chomene ntchakuti, liŵawovwirenge kuti ŵasendelere kwa uyo Wakalilemba, Yehova.”

Tili na chigomezgo chose kuti Baibolo ili, lipangiskenge ŵabali na ŵadumbu awo ŵakuyowoya Chiaymara kujipulika nga ngwamasalimo, uyo wakati: “Nkhunwekera chiponosko chinu, pakuti mazgu ghinu ntchigomezgo chane.”—Salimo 119:81.