Kwamba pa January 18, 2020, ku vigaŵa vya Espírito Santo na Minas Gerais ku Brazil kukalokwa chivula chikuru icho chikapangiska kuti maji ghasefukire. Maji ghakusefukira agho ghakendanga mu misewu ghakananga nyumba, ghakakokolora magalimoto, na kuzgura makuni. Kuyana na ivyo ŵalara ŵa boma ŵakuyowoya, ŵanthu masauzandi ŵaleka nyumba zawo ndipo ŵanthu ŵakujumpha 60 ŵafwa.

Mu tawuni ya Iconha na Alfredo Chaves, maji ghakusefukira ghakananga nyumba 9 za Ŵakaboni ŵa Yehova, ndipo ŵabali na ŵadumbu ŵithu 27 ŵali kukhwaskika. Ndise ŵakukondwa kuti palije nanga njumoza wa ŵabali ŵithu uyo wali kupwetekeka panji kufwa.

Ŵakaboni ŵa Yehova pafupifupi 100 ŵakufuma mu chigaŵa ichi ŵakajipeleka kuti ŵawovwire ŵabali awo ŵali kukhwaskika na maji ghakusefukira. Mwakulongozgeka na ŵabali ŵalara, ŵabali ŵakapeleka chakurya, maji, na vyakuvwara. Ŵabali ŵakawovwiraposo pa ntchito ya kuphyera na kuwuskamo mathipa mu nyumba za ŵabali withu kweniso za ŵazengezgani awo mbakaboni yayi.

Palije yumoza wa ŵabali ŵithu uyo wali kupwetekeka panji kufwa. Ndipouli, Nyumba za Ufumu zinkhondi zikanangika ndipo mabanja 50 gha Ŵakaboni ghakafumamo mu nyumba zawo. Ŵabali ŵanyake ŵakatondekanga kufuma mu nyumba zawo zakudikanya chifukwa maji ghakaŵa ghanandi chomene ndipo ŵakachita kuzakaŵatora pa boti. Ŵabali na ŵadumbu wose awo ŵakaleka nyumba zawo ŵakakhalanga mu nyumba za Ŵakaboni ŵa Yehova ŵanyawo.

Ofesi ya munthavi yikanozga kuti papangike Makomiti Ghakovwira Para Kwachitika Masoka ku Espírito Santo na Minas Gerais kuti ghalaŵilire mulimo wakovwira awo ŵakhwaskika na masoka. Makomiti agha ghakugwira ntchito pamoza na mulaŵiliri wadera na ŵalara kuti ŵapeleke wovwiri wakuthupi na wauzimu ku ŵapharazgi awo ŵakhwaskika na soka la chilengiwa ili.

Tikulutilira kuŵalombera ŵabali ŵithu awo ŵakhwaskika na kusefukira kwa maji. Tikuwonga Yehova chifukwa chakuŵapa nkhongono, kuŵapembuzga, na kuŵapa wovwiri wakuthupi kwizira mu ŵabali na ŵadumbu ŵithu.—Salimo 28:7.