Ku Brazil, kuli misumba yinyake pafupifupi 1,500 iyo kulije mipingo. Yinyake mwa misumba iyi yili kutali chomene ndipo muli ŵanthu ŵanandi awo ŵandakumanepo na Ŵakaboni ŵa Yehova. Pa chifukwa ichi, ofesi ya Brazil yikakhumbanga kuti yinozge upharazgi wapadera mu misumba iyi kwambira mu September m’paka December 2020. Ndipo chifukwa cha COVID-19, upharazgi uwu ukachitika kwizira mu makalata. Ŵapharazgi ŵakufuma mu mipingo 3,000 ŵakachitako upharazgi uwu.

Ŵapharazgi ŵakapenjerezga fundo pa intaneti zakukhwaskana na misumba iyo ŵakagaŵirika, ndipo pakulemba makalata ŵakalembanga kuyana na ivyo ŵanthu ŵa mu misumba iyi ŵakakhumbikwiranga. Mwachiyelezgero, mupayiniya munyake wakalembera makalata ŵanthu ŵakukhala mu msumba wa ku chigaŵa cha Tocantins. Mupayiniya uyu wakasanga kuti chigaŵa ichi chikaŵa kuti chasakazika na moto wamthondo. Mu makalata ghake, wakalembamo fundo zakufuma pa Chivumbuzi 21:5 ndipo wakalongosora umo kunthazi Yehova ‘wazamuzgolera vinthu vyose kuŵa viphya’ na kumazga vinthu vyose ivyo vikunanga charu. Pati pajumpha mazuŵa ghachoko waka, mwanakazi munyake wakatumizgira mupayiniya uyu audio yakulongosora umo wakakondwera kuŵazga umo Chiuta “wazamunozgera vinthu.” Kufuma apo, mwanakazi uyu wakati wakukhumba kumanya vinandi.

Mweneko nyumba munyake uyo wakapokera kalata iyi wakalembera mudumbu uthenga wapafoni uwo ukalongora kuti upharazgi wapadera uwu ukaŵa wakovwira nadi. Uthenga wake ukaŵa wakuti: “Chakuyowoya chikunisoŵa pakuwona umo Chiuta wamutumirani imwe kuti mukumane nane. . . . Yewo chomene! Mwanovwira kwambaso kugomezga kuti Chiuta wakunitemwa kweniso wakunipwelelera ine na banja lane! Nawona kuti nkhutemweka nadi. Nangauli nkhumumanyani yayi, ndimwe zgoro la lurombo lwane! Yewo chomene nkhanira!”

Mulara munyake wa mpingo wa Itamarati ku Petrópolis, Rio de Janeiro, wakalongosora umo ŵabali na ŵadumbu awo ŵakachitako upharazgi uwu ŵakujipulikira, wakati: “Tikuŵa nga tili ŵapayiniya ŵapadera awo ŵakuluta ku malo ghakutali chomene. Uwu ni mwaŵi uwo ŵabali ŵanandi ŵangaŵa nawo yayi chifukwa cha umo vinthu viliri kweniso kupwelelera mabanja.”

Yehova wakatumbika nadi upharazgi wapadera uwu. Tili na mwaŵi kovwirapo kuti makani ghawemi ‘ghapharazgike mu chilengiwa chose kusi ku mtambo.’—Ŵakolose 1:23.