Mu chaka cha 2023, ofesi ya munthavi ku Brazil yakwaniska vyaka 100 kufuma apo yikambira kugwira ntchito. Mu vyaka vyose ivi, chiŵelengero cha Ŵakaboni ŵa Yehova ku Brazil chalutilira kukwera chomene. Ivi vikulongora kuti Yehova wakutumbika mulimo uwo ukuchitika.

Ntchito yakupharazga ku Brazil yikamba ni kale chomene cha m’ma 1890, apo magazini gha Zion’s Watch Tower na Herald of Christ’s Presence ŵakamba kughagaŵira mu charu ichi. Ŵanthu ŵanandi ŵakamba kunweka na magazini agha. Ntheura mu March 1923, Mubali J. F. Rutherford wakatuma Mubali George Young kuti wasamire mu charu ichi mwakuti wakajure ofesi ya munthavi kweniso kuti wakanozge na kuwona umo ntchito yakupharazga yenderenge.

Mubali Young wakachita renti ofesi yichoko waka mu tawuni ya Rio de Janeiro, ndipo ndiyo yikaŵa ofesi ya munthavi yakwamba kugwira ntchito. Ofesi iyi yikalaŵiliranga milimo ya Ufumu mu charu cha Brazil kweniso ku South America. Wakanozga vyakuti paŵe mulimo wakung’anamura mabuku kufuma ku Chingelezi kuya mu Chiportuguese ndipo pamanyuma wakanozga vyakuti ghapulintike.

Mu 1925, Mubali Young wakalutilira kuchita uteŵeti wake wa umishonale ku Argentina, ndipo Mubali John Rainbow ndiyo wakimikika kuti waŵe mulaŵiliri wa ofesi ya munthavi ku Brazil. Mu 1926, ofesi ya ku Brazil yikapokera kamakina kachoko kakupulintira mabuku ako kakafuma ku Likuru la Ŵakaboni ŵa Yehova ku Brooklyn, New York, U.S.A. Ichi chikawovwira kuti ŵabali ŵapulintenge magazini ghawo kweniso tumabuku.

Kwamba mu 1945, ŵamishonale ŵakufuma ku Sukulu Yakusambizga Baibolo ya Giliyadi ŵakatumika ku Brazil kuti ŵakawovwire pa ntchito yakupharazga. Yehova wakatumbika chomene mulimo uwo ŵakachita, ndipo kufika vyaka vya pakati pa 1948 na 1968, chiŵelengero cha ŵapharazgi ŵa Ufumu chikakwera kufuma pa 1,000 m’paka pa 50,000. Pa vyaka vitatu ivyo vyajumpha, ŵanthu ŵakujumpha 21,000 pa avereji ŵakubatizika chaka chilichose. Mazuŵa ghano, mu charu ichi muli ŵapharazgi ŵa makani ghawemi pafupifupi 900,000. Beteli ya ku Brazil ŵali kuyinozga na kuyikuzga kanandi waka chifukwa cha kukura kwa chiŵelengero cha ŵapharazgi. Mu 1980, ofesi ŵakayisamuskira mu tawuni ya Cesário Lange, makilomita pafupifupi 150 kufuma ku São Paulo. Kufuma nyengo yira, ofesi iyi ku Cesário Lange ŵali kuyikuzgirako maulendo ghatatu. Mazuŵa ghano, ŵabali na ŵadumbu ŵakujumpha 1,200 ŵakuteŵetera ku malo agha.

Tili ŵakukondwa kuwona umo Yehova watumbikira mulimo wakuzgora ŵanthu kuŵa ŵasambiri ku Brazil pa vyaka 100 ivyo vyajumpha.—1 Ŵakorinte 3:7.